Beblia

	NTETO INJEGA CIA MURUNGU KIRI ANTU BONTHE 2018 Matayo 6


Save Notes

1
Nudimuke, tanukitanga biabuntu bienu kumpala kwa bantu’shi, benumone, ooo; mwanda su mbiabia tanwi na bwedi kwi Shyenu E mwiilu.

2
Binyibiabia hokitshi biabuntu (biobe) ha kuhana, twelanga mpungi kumpala kobe, bu amukitshine bansesa mu bitumbwilo na mu mpata, mwa biadia kutumbishibwa kwi bantu. Nenulungula, binyibinyi’shi, abakwete kutambula bwedi bwabo.

3
Anka ha kuhana biabuntu biobe, tweukishanga eyasa diobe dibakashi kikite eyasa diobe dibalume;

4
Biabia biabuntu biobe bikale ku bufyefye; na Shyobe amono mu bufyefye, na mwinyi akakuha bwedi ha toka.

5
Hōtekye, twekalanga bu bansesa; mwanda abasehela kwimana mu bitumbwilo na ku masank’a mpata mwa kumwekibwa kwi bantu. Nankulungula, binyibinyi abakwete kutambula bwedi bwabo.

6
Ank’obe hōtekye, twela mu kadimbo kobe, hobohwile kushita kibi kiobe, otekye kwi Shyobe E mu bufyefye, na Shyobe amono mu bufyefye, akakuha bwedi ha toka.

7
Anka hanutekye, tanutontomonanga mitontomonyi bisuntanga bu basendji, mwanda’bo abatentekesha’shi, atukahushwa ha mwanda wa kwakula kwetu kwi bungi.

8
Tanwifwananga’bo, mwanda Shyenu euku abia bintu bianudi n’abio lukalo kwibedi kwa nutekye.

9
Binyibiabia nutekye anka bino’shi, Yaiya etu E mwiilu, Eshina diobe dishilwe kishila.

10
Bufumu bwobe bufikye. Bikitwe hanoha-nsenga abikyeb’eshimba diobe, bu biabidi bikitshibwe mwiilu.

11
Etuhe lelo uno bidibwa bietu kwifuku n’efuku.

12
Etulekyele kusola kwa myanda yetu bu mwatubalekyela be n’etu kusola kwa myanda.

13
Twetufishanga mu kutompibwa, anka etumañune ku bubi: Mwanda bufumu nyi mbobe, na katshintshi, na ntumbo, mpaa na kwikalaīka. Amena.

14
Mwanda su anulekyela bantu kusola kwabo, Shyenu a mwiilu namu akenulekyela kusola kwenu.

15
Anka su tanulekyela bantu kusola kwabo, Shyenu a mwiilu takenulekyela kusola kwenu namu.

16
Dimonyi, hanushidi biakudia namu, tanwikalanga bongame bu bansesa, mwanda’bo abanyengye nkyebo yabo bebamone’shi mbashile biakudia. Binyibinyi, nenulungula’shi, abakwete kutambula bwedi bwabo.

17
Ank’obe hōshidi biakudia, shinga mwimu ha mutwe hobe, wetumpe mema ha lukyebo lwobe.

18
Biabia tomweka na lushilo kwi bantu, anka kwi Shyobe e mu bufyefye, na Shyobe amono mu bufyefye akakuha bwedi ha toka.

19
Tanwibombeleshanga buheta buneme hano-ha-nsenga, nyi hanka tubaubau na nkongolo abilwisha, na bangifi abatubwīla kwiba:

20
Anka nwibombeleshe buheta buneme mwiilu, mushī tubaubau sunga nkongolo abilwishā, na bangifi bakutubwila mukwiba.

21
Mwanda, hē buhete buneme bwobe, eshimba diobe adikekala hanka namu.

22
Etata dia mbidi nyi eiso, binyibiabia su eiso diobe adikala sōo, mbidi yobe yishima ngitoshwe n’etata.

23
Anka su eiso diobe dibubi, mbidi yobe yishima ayikaulu mufito. Biabia su etata di munda mwobe di mufito, bukata bwa uno mufito bwi na minyi?

24
Ta kwi muntu euku kufubila banfumu babidi, ooo: mwanda su akekala na umune mushikwa, na mungi kifulo, su akalamata kwi umune, akabende mungi. Tanwiuku kufubila Efile Mukulu na buheta hamune.

25
Binyibiabia nenulungul’amishi, tanwinyenganga mwanda wa muwa wenu’shi, Atudi kinyi? sunga’shi, atutomo kinyi? sunga mbia mbidi’shi; Atukafwala kinyi? Muwa tangukile bidibwa su? na mbidi tangikile bilamba su?

26
Talai tonyi twa mwiilu, mwanda tatukunā sunga kuumbulā, sunga kubomboleshā mu mikulu anka Shyenu a mwiilu etudishā; Anwe tanwibetukile?

27
Muntu kinyi a munkatshi mwenu euku kulunga kishisa kie bu centimetre makumi atano’nyi hakwinyenga mwishimba?

28
A ha mwanda kinyi namu anukamba kutentekyesha ha bifwalwa? nwambulai ku bilongo bia mahia mwabimena, abio tabifubā, sunga kuluka:

29
Anka ’mi nenulungula’shi: Sunga Solomone mu ntombo ye yoso tabadi mufwadikwe bu kimune kia bino, ooo.

30
Binyibiabia, su Efile Mukulu afwadika lubishi lwa ku mahia, alo lwi kwanka lelo uno, na maloba alwedibwa mwidingidingi dia kālo, E teuku kukila kwinufwadika su? anwe ba lukuluhilo luhela.

31
Binyibiabia, tanwinyenganga mwishimba’shi: Atudi kinyi? sunga’shi: Atukatomo kinyi? sunga’shi: atukafwadikwa na kinyi?

32
(Mwanda, bino bintu bioso nyi abikimbi Badjentaila:) Mwanda Shyenu a mwiilu euku’shi, nwi na lukalo lwa bino bintu bioso.

33
Anka kwibedi kimbai bufumu bw’Efile Mukulu, na kululama kw’eshimba kwe, na bino bintu bioso abikenutentekyelwa.

34
Binyibiabia, tanwiyenganga mwishimba ha mwanda wa bia maloba; mwanda maloba adikanyenge ha mwanda wa bintu bia’bio. Bubi bwifuku bubalombana bwadio.


Songe Bible 2018 KIMERU BIBLE WITH DC ©Bible Society of Kenya, 2009, 2018