Beblia

	NTETO INJEGA CIA MURUNGU KIRI ANTU BONTHE 2018 Yoana 1


Save Notes

1
Kwibedi n’ebedi Mwanda ubadi kwanka; winyi mwanda ubadi n’Efile Mukulu, na mwinyi mwanda ubadi Efile Mukulu (na mwinyi).

2
Ñanka e badi n’Efile Mukulu mu kibangilo.

3
Bintu bioso bibahangilwe kwadi, takwi kintu sunga nkimune kishī kihangibwe n’E.

4
Muwa ubadi mwadi E, muwa namu ubadi etata dia bantu.

5
Etata namu aditosha ’mufito, na mufito tawidishingula, ooo.

6
Kubafikile muntu, batuminwe n’Efile Mukulu, eshina die mbu Yoano.

7
Nyi winyi bafikile bu kamonyi, mwanda wa kuhatula’shi, nkebahatulwile mwiyile aya ya mwitata’shi, boso bakuminyine handji’mi.

8
E na mwinyi tabadi etata, ooo, anka batuminwe kuhatula mwiyile (dinyi) etata.

9
Etata dia binyibinyi nyi dibadi aditoshesha bantu boso abafiki hano ha nsenga.

10
E na mwinyi badi hano ha nsenga, na hano ha nsenga namu habadi hahangwe kwadi; anka bahanohansenga tambamwiukye.

11
Bafikile ku b’e na mwinyi, anka b’e na mwinyi tambamutambule, ooo.

12
Anka muhunda baba abamutambwile, nyi badi muhe matalwa a kwikala bu bana b’Efile Mukulu, nyi kwi baba abakumina mwishina die.

13
Kwi’bo bashī batandjibwe ku mase, sunga nkwishimba dia ku mbidi, sunga nkwishimba dia muntu, ñanka kw’Efile Mukulu.

14
Biabia winyi Mwanda ubalulukile taudi bu muntu, abombela munkatshi mwetu, (twabandjila ntumbo ye, ntumbo yinyi bu ya mwan’eleka kwi nshye,) muule bu muntu na biabinyibinyi.

15
(Yoano bamwisambile, bēle musase’shi: Nyi winyi anakwile’shi: Akandondo munkile kinemo: mwanda e badi ku mpala kwande.

16
Atwe boso tubatambwile ku kukumbana kwe, bu-muntu ha bu-muntu.

17
Mwanda mukanda-wa-bishila ubahelwe (bantu) ha Mosesa; bu-muntu na biabinyibinyi bibafikile ha Yesu Kidisitu.

18
Takwi muntu sunga ngumune bamwene Efile Mukulu sunga mpahelahela, winyi Mwan’umun’enka eleka E mu kiadi kia nshye; ñanka E bamutemwine.

19
Biabia yino nyi bu kamonyi bwa Yoano, habatumine Bena Yuda batshiite-bakwidi, na Bena Lewi ba mu Yelusalema kumwihusha’shi: Obe we’nyi?

20
E besokwele, tamutune, besokwele’shi: Ami nki Kidisitu, ooo.

21
Biabia tabamukokōla’shi: A na minyi? We Elaidja su? E namu’shi: Ooo. Obe we (winyi) mutemuki su? Bālulwile’shi: A a.

22
Henyihaha abo nkumwalula’shi: A (biabia) we nyi? mwatudia kukahatulwila kwi betutumine. Wetemunā bu’nyi obe na mwinyi?

23
Biamba’shi: Ami nyi eyi adiele musase mu kabāka’shi: Ludikai eshinda dia Yehowa bu mubakwidile mutemuki Eseasa.

24
Benyi abatuminwe abadi ba ku Bafadiseo.

25
Biabia tabamwihusha’shi: A henyihaha nkinyi kiobatshishā su twe (winyi) Kidisitu, sunga mbu Elaidja, sunga mbu (winyi) mutemuki?

26
Yoano bebālulwile’shi: Ami nabatshishā mu mema; anka munkatshi mwenu mubaimana umune anushyanwiuku.

27
Nyi winyi andondo ku nyima munkile kinemo; ye mioshi ya ku biashino nkimuhwandjikile kwiyiangula.

28
Yino myanda yibakitshinwe mu Betabala adi’eshia dia Yodano kubadi Yoano abatshishā.

29
Biabia habubatokyele Yoano bamwene Yesu afiki kwadi, bambile’shi: Talangai Mwan’a mukoko ’Efile Mukulu, akashā milwisho ya bahanohansenga.

30
Nyi winyi anambile’shi: Ku nyima kwande akukafiki muntu munkile kinemo, mwanda E badi kwibedi kwande.

31
N’ami ntamushingulanga, ooo, anka mwadia kwisokwela kwi Isalele, nyi mbiabia nafiki nkwete kubatshisha na mema.

32
Biabia Yoano besambile bu kamonyi’shi: Namwene Kikudi-E-Selelee ayiki mwiilu bwikutshi, na kumushala.

33
Tanadi mumushingule: anka winyi bantumine kubatshisha mu mema, nyi bandungwile’shi: Ha yawa okamono Kikudi-E-Selelee ayiki na kushala ha mbidi he, yawa nyi akabatshishā mu Kikudi-E-Selelee.

34
N’ami namwene, nesambile bu kamonyi’shi: Uno nyi Mwan’Efile Mukulu.

35
Dimonyi, habubatokyele, Yoano badi mwimane, na bana-be-babukishi babidi;

36
Hakumona Yesu mwabatambukilanga, bambile’shi: Talai Mwan’a mukoko ’Efile Mukulu!

37
Biabia aba bana-ba-bukishi babidi abamuhushishe kwete kwisamba, tabakalondo Yesu.

38
Binyibiabia Yesu bealu lwile, ebamona abamulondo, tebehusha’shi: A nkinyi kianu kyebe? Abamwalulwile’shi: Labi, fkuhatula nyi nkwamba’ Mulambukishi,) obombelā kwi kunyi?

39
E namu’shi: Fikai nukamone. Abafikile, bamona kwabadi mubombele, ababombelele n’e diadi’efuku: mwanda nsa yibadi tayikyebe kufika h’ekumi.

40
Ku baba babidi abahushishe Yoano, tabalondo Yesu; kubadi Andeleo mukwabo na Shimona Petelo.

41
E, babadidile kuheta Shimona mukwabo ē na mwinyi, tamulungula’shi: Atwe tubamono Meseasa, kuhatula’shi: Nyi Kidisitu.

42
Bamufishishe kwi Yesu. Biabia Yesu hakumumona, tamba’shi: Obe we Shimona mwan’a Yona, okaudikwa bu Kefasa, kuhatula’shi: Nyi’bwe.

43
Habubatokyele Yesu bakyebele kwenda mu Ngadilea, basañene Fidiha, bamulungwile’shi: Ndonde.

44
Winyi Fidiha badi mwina Betesaida, kibalo kia Andeleo na Petelo.

45
Fidiha basañene Natanyele, bamulungwile’shi: Tubasañana winyi badi mufundwe kwi Mosesa mu mukanda-wabishila, na muwa batemuki, Yesu a Nasaleta mwan’a Yosefa.

46
Natanyele bamwalulwile’shi: Aaa! A kilumbulukye kitukye mu Nasaleta su? Fidiha’shi: Fik’okamone.

47
Yesu bamwene Natanyele afiki kwadi, bamwambile’shi: Talai Mwina Isalele a binyibinyi, mwadi e tamwi bulamalama!

48
Natanyele’shi: A bonukile na minyi? Yesu bamwalulwile’shi: Habadi Fidiha takakwitanyine, hobodi mushi mwa mutshi wa kikuku, nakumwene.

49
Natanyele bamwalulwile’shi: Labi, obe we Mwan’Efile Mukulu, obe we Nfumu a Isalele.

50
Yesu bamwambile’shi: Mwanda nakulungula’shi: Nakumwene mushi mwa kikuku, takukumina kobokumina’ku’be? okamono bintu bikile bino bukata.

51
Biabia bamulungwile’nyi’shi: Mbinyibinyi mbinyibinyi nakwamba’shi: Anukamono eilu dishitukye, na bamwikeilu b’Efile Mukulu bakaminanga, bayikanga ha Mwan’a Muntu.


Songe Bible 2018 KIMERU BIBLE WITH DC ©Bible Society of Kenya, 2009, 2018