Beblia

	NTETO INJEGA CIA MURUNGU KIRI ANTU BONTHE 2018 Ngitichisio 1


Save Notes

1
Obe Teofiluse, nahu kufunda mukanda wa kwibedi, wa mwanda wa bioso bibabangile Yesu kukita na kulambukisha.

2
Mpaa na kwifuku diabatambwilwe mwiilu, habahwile kuha batumibwa babasangwile milangilo mu Kikudi-E-Selelee.

3
Kumongo kwa lufu lwe belesheshe kwabadi atala mu bishiso bibungi bishi matohe, bamwenwe n’abo mafuku makumi ananka, kwete kwibalungula namu myanda yinemene ’mbufumu bw’Efile.

4
Na hakwikoñena n’abo hamune, bebakankamikile’shi: Tanukatukanga mu Yelusalema, anka nutengyele mulayilo wa Yaiya, wanubahushishe kwandji’mi.

5
Mwanda Yoano badi abatshisha binyibinj’i mu mema; anka’nwe anukabatshishwa mu Kikudi-E-Selelee takwi mafuku ebungi.

6
Binyibiabia habadi bekoñene hamune, abamwihwishe’shi: A Mwanana, okālusha dimonyi bufumu kwi Isalele binobino su?

7
E bebālulwile’shi: Akia, ta ’nkienu kushingula bihindji, sunga mieshi bibatule Yaiya ’matalwa e, ooo.

8
Anka’nwe anukatambula bukome ahakafiki Kikudi-E-Selelee hanudi: n’anwe anukekala balungudi bande bakulumgula mu Yelusalema, na mu Yudea, na mu Samadia, mpaa na kunfudilo kwa nsenga.

9
Habahwile kwakula yino myanda, habadi ababandjila, bebosheshwe mwiilu, n’ekumbi dibamutambwile, tabakibamumone.

10
Habadi abatala kwiilu kanāna kubadi akamina, talangai, bana-balume babidi abemene kwabadi bafwale bilamba bitoka;

11
Abo namu abakwile’shi: Anwe bana-balume ba ku Ngadilea, a nkinyi kianubaimena kubandjila mwiilu? Uno Yesu winyi henwiboshwa mwiilu, anka mwanubamumwēna kwete kwenda mwiilu, nyi mwakafikila.

12
Henyihaha abalukile ku Yelusalema, abakatukile ku ngulu ya Olefeta, ayo yi kula na Yelusalema bu kihindji kia luendo lw’efuku dia Sabado.

13
Habatwēle mwanka, abaikamine mu kadimbo kabadi mwiilu, nyi mubabombelele Petelo, na Yakoba, na Yoano, n’Andeleyo, na Fidipa, na Tomase na Batolomeu, na Mateo, na Yakoba mwan’a Alefusa, na Shimono Selote, na Yudasa, mukwabo na Yakoba.

14
Bano boso abayididile n’eshimba dimune mu luteko na kwiyaiya, na bana-bakashi, na Madiya nyin’a Yesu, na bakwabo na Yesu namu.

15
Mu aa mafuku Petelo bebwele munkatshi mwa banaba-bukishi bw’Efile’shi (bungi bwa mashina bubadi bu lukama na makumi abidi).

16
Anwe bakwetu, kino kifundwe ki’Efile nkihwandjikile kukumbashwa hanka, kibakwile Kikudi-E-Selelee mu kanwa mwa Dafidi kala, ha mwanda wa Yudasa, winyi badi mulombodi a baba abakwete Yesu.

17
Mwanda e badi mubadikwe n’etu, badi mutambule namu kihindji kia uno mufubo.

18
Tala, uno muntu baule efuba ku bwedi bwa bubi; na habahone ki mutwe mūshi, basanikile hankatshi, na mala oso abahātukile.

19
Uno ubeukile kwi boso abadi babombele mu Yelusalema; nyi kiabetanyine diadia efuba mu dinyi edimi diabo bu Akeledama, kuhatula nyi nkwambashi, Efuba dia mase.

20
Mwanda ubafundjiiwe mu mukanda wa Ñono ya Milangwilo’shi: Kwē kwikale ta bishiboshibo, Tamubombelanga muntu; na Bulami bwe mungi āte bwanka.

21
Henyihaha ku bano bantu abadi abatambuka n’etu mafuku oso habadi Nfumwetu Yesu atwele na kutuka munkatshi mwetu.

22
Kubanga ku lubatshisho lwa Yoano, mpaa na kwifuku dibetutambwidilwe mwiilu munkatshi mwetu, ku bano nkuhwandjikile kusangulwa umune kwikala n’etu bu kamonyi ka lusangukilo lwe.

23
Biabia abasangwile babidi, Yosefe alumbwa bu basabasa, winyi badi atemunwa namu bu Yusutusa, na Mateasa.

24
Binyibiabia abatekyele Efile Mukulu’shi: Obe, Mwanana, n’obe euku mashimba a boso etuleshe a ku bano babidi odi musangule.

25
Āte kihindji kia buno bulungudi bw’Efile na butumibwa, bwinyi bubahonene Yudasa ku busodi, biadia kwenda ku yee mbalo.

26
Biabia abatēle bubale; bubale bubatahile Mateasa, n’e babadikilwe na batumibwa ekumi na umune kumune.


Songe Bible 2018 KIMERU BIBLE WITH DC ©Bible Society of Kenya, 2009, 2018