Beblia

	NTETO INJEGA CIA MURUNGU KIRI ANTU BONTHE 2018 1 Timoteo 1


Save Notes

1
Paulu mutumibwa a Kidisitu Yesu mwiyile mulangilo w’Efile Mukulu Muhashi etu, na Kidisitu Yesu lutengyelo lwetu.

2
Kwi Temote mwan’ande a kishima mu lukumino: Bu-muntu bw’Efile na lusa na kufukama (bifikye) kw’Efile Mukulu Yaiy’etu, na Kidisitu Yesu Nfumwetu.

3
Anka munakusendelele’mi’shi: Tokatukanga mu Efesesa, hanayile mu Masedonya, bodio kukayikila bamo’shi: Tanulambukishanga lungi lulambukisho,

4
sunga nkutee eshimba ku miele na ku myanda ya ku musuku yishī na nfudilo, ayibushā nyihusho, he kusangulushwa kw’Efile kwi mu lukuluhilo:

5
Anka kunfudilo kwa mulangilo nyi nkifulo kia kwishimba diselelee, n’eshimba di munda dibuwa, dianka na lukumino lushī lwa kudimba,

6
kū’lo bamo abehengye ku bia bwakulakule bia bisumanga.

7
Hakukyeba’shi: Twikale bu balambukishi ba mukanda-wa-bishila, (biosobi) tambashingule sunga mbia bākula sunga mbia bakankamika

8
Ank’atwiuku’shi mukanda-wa-bishila wibuwa, su muntu eulonda mwiyile bishila biao;

9
hakwiuka bino’shi, mukanda-wabishila taushidikwa muntu mululame, ooo, anka ha mwanda wa basha mpuha na bashyabakokyela, na bashī n’Efile na balwishi, na bashī bahatulwe-bakishila, na basha kasābu kā-nkanwa, na bantahanyi ba bashyabo na banyin’abo, na bangi bantu,

10
na basha lusandji, n’abelwisha abo ba na bene, bana-balume na bana balume, na babombodi ba bantu, na basha madimi, na batshihi ba madimi, na su kwi kingi kintu, su nkinyi su nkinyi akilekena na lulambukisho lushima:

11
mulombene mukāndu-wibu-wa wa ntumbo y’Efile Mukulu ahebwe mwabi na mwabi, ubambikilwe.

12
Natumbula Kidisitu Yesu Nfumwetu bankitshishe bukome, mwanda e bantemwine bu a kishima, na kumula mu bulungudi bw’Efile;

13
biosobi ami kala nadi musabudi’Efile, na mubingibingi (abantu) na mukanyi; anka naleshwa lusa, ha mwanda nekikitshine nki mwiukye mu shīlukumino.

14
Na bu-muntu bwa Nfumwetu bubakilakila bungi na lukuluhilo na kifulo bi mu Kidisitu Yesu.

15
Uno mwanda ngwa kishima, na kuhwandjikila kukuminwa koso’shi, Kidisitu Yesu bafikile hanohansenga mu kuhasha balwishi; kwabadi nyi mukilekile (boso).

16
Anka ha uno mwanda nyi wanatambwila lusa’shi, Yesu Kidisitu aleshe kahuñanyi mwandji’mi kwikala bu kihwandjikisho kwi’ba abakakumina mwadi e mpaa na ku muwa wa ikala-ika.

17
Binobino kwi Nfumu a ikala-ika, shyafwiyā, shyamweka, nyi ñanka Efile Mukulu sha binangu buhenka bwe, ekale na kinemo, na ntumbo mpaa na kwikala-ika. Amena.

18
Luno lukayikilo natulu kodibe, mwan’ande Temote, mwiyile mitemuko yibatemukile kwibedi hodi’shi, kwayidi, bodio kulwa ngoshi yibuwa;

19
Olamate lukuluhilo n’eshimba dia munda dibuwa: dīnyi’dio, bamo hakuhwa kwidifutala, ha mwanda wa lukumino bahu kukita kushimishwa, hamune bu masua abaitshikila ’mema;

20
be biabia nyi mba Hymeneusa na Alekesanda, abo nyi ba natudile kwi Satana’shi, bāmbule kuleka kusabul’Efile Mukulu.


Songe Bible 2018 KIMERU BIBLE WITH DC ©Bible Society of Kenya, 2009, 2018