Beblia

	NTETO INJEGA CIA MURUNGU KIRI ANTU BONTHE 2018 Yakobo 1


Save Notes

1
Yakoba mpika ’Efile Mukulu n’a Nfumwetu Yesu Kidisitu ku bisaka ekumi na bibidi bibahalakene ku mpese yoso, nenwimunai.

2
Bakwetu, nwiyihwandjikishe ya kusehela hanuhonā mu ya mitompo ya bihaso na bihaso,

3
hakwi-uka’shi, kutompibwa kwa lukumino lwenu akufisha mufwaka.

4
Anka mufwaka ukite mufubo wa’o ukumbane’shi, nwikale bakumbane na balumbuedidīle, bashī balobeshe kintu.

5
Anka su kwi umune ’ēnu mulobeshe binangu, atekye Efile Mukulu nyi aheyā boso na mpango, tekusulā, ooo, n’akio akikamuhebwa.

6
Anka atekye na lukuluhilo, lushī na mialasheno. Mwanda yawa e na mialasheno, e bu ntanki ya mema a kalunga ayitakulwa na luhahi na kuhalakashwa.

7
Mwanda yawa muntu tatentekyeshanga’shi: Nankatambula kintu kwi Nfumwetu, ooo.

8
Muntu e mashintba abidi e muteakane mu nyikashi ye yoso.

9
Mukwenu shī na kinemo, etumbishe hakunemekwa,

10
anka mpeta etumbishe hakuheleshwa, mwanda e akashimina bu tulongo twa mu lubishi.

11
Mwanda nguba bakāmine na kibobo kie akishikā, kibaumishe lubishi, na tulongo twa’lo tubafumbile, na kushālama kwa’to kubalwikile: anka biabia na mpeta namu, akashimina mu nyikashi ye.

12
Mwabi kwi (yawa) muntu anyiñamana mu kutompibwa, mwanda e hakushisha mwanka anakatambule kilongo kia bushindanyi kia muwa, kibalayile Nfumwetu kwi’ba abamufulā kifulo.

13
Muntu hakutompibwa, takumanga kwakula’shi: Nyi mutompibwe n’Efile Mukulu, ooo; mwanda Efile Mukulu teuku kutompibwa na bubi, n’e namu tutompa muntu, ayoyo,

14
anka muntu ese e mutompibwe hakukakibwa na bia ngabiabi yi’e namwinyi nakubembibwa.

15
Henyihaha habahwile kwimita ngabiabi ayitandā milwisho, na milwisho (namu) hakukumbana ayitanda lufu.

16
Tanulubishibwanga bakwetu batomibwe kifulo.

17
Biabuntu bioso bibuwa na biabuntu bioso bikumbane abifika mwiilu, abiyikā kwi Yaiya a matata, winyi e teuku kwaluluka, sunga mpahelahela, sunga nkwihwandjikisha kwāluluka.

18
Nyi anka amukyebela eshimba die betutandjile ku Mwanda wa biabinyibinyi’shi, twikale hamune bu bikuba bibedi bia bihangibwe bie.

19
Binyibiabia bakwetu batomibwe kifulo, muntu ese ekale na lubilo ha kuhusha, eshinke ha kwisamba na ha nsungu ye;

20
mwanda nsungu ya bantu taikita kululama kw’Efile Mukulu.

21
Binyibiabia hakuhenga bibutete bioso na kukishakisha kwa bibubi, nutambule na luhohelo Mwanda ukunwe (munda,) winyi awiuku kuhasha bikudi bienu.

22
Anka nwikale bakitshi ba Mwanda, kushī anka (bu) bahushi, na kwibembula, ooo.

23
Mwanda su muntu (nganka) muhushi a Mwanda, shī mukitshi (ao,) e, e hamune na muntu atala mpala ye ya butandwa mu lumwene.

24
Mwanda ētal’e na mwinyi, akatuka, kahindji n’aka eilwa na kihaso kia mwadi mwikele.

25
Anka yawa ashinkika mu kishila kikumbane kia buluñantu, na kwididila (mwanka,) e, hakwikala (bu) muhushi shī na kilwa, anka (bu) mukitshi a kikitshino, uno (muntu) akedibwa mwabi na bikitshino bie.

26
Su kwi muntu munkatshi mwenu ahwandjikisha’shi: nyi mwina Efile, n’e takakā edimi die, anka ēdimba eshimba die, biabia bwin’Efile bwa yawa muntu mbwa bisumanga.

27
Bwin’Efile bwi selelee na bushī kushūlwa kishila ku mpala kw’Efile Mukulu Yaiya nyi mbuno: Kutembela bana-ba-nshiye na bakashi-ba-bafwe mu bishiotshi biabo na kwilama e na mwinyi kushī n’ebashi dia bubi dia hanohansenga.


Songe Bible 2018 KIMERU BIBLE WITH DC ©Bible Society of Kenya, 2009, 2018