Beblia

	NTETO INJEGA CIA MURUNGU KIRI ANTU BONTHE 2018 1 Petero 5


Save Notes

1
Binyibiabia nalanga bakulu (ba bikoñeno bi’Efile) be munkatshi mwenu, ami mukulu n’abo, na bu kamonyi ka bia kufwambuka kwa Kidisitu, mubungilwe namu ku yinyi ntumbo yianakafumbulwe.

2
Lamai lombe lw’Efile Mukulu lwi munkatshi mwenu, nuate bukulu bwa kilelo, bushī bwa kufinyikwa, ooo, anka bwa musanku, bushī mwanda wa kukimba mono yifutulukye, anka bw’eshimba dimene.

3
Sunga mbu bakambi kumunana hanundu ha buhyanyi bw’Efile Mukulu, ooo, anka nwikale bihwandjikisho kwi lombe.

4
Biabia ahakafumbulwa Mumunyi mukilekile bukata, nwanakatambule kilongo kia ntumbo kishyakikalwila.

5
Anwe be bu bakulu bwa binyibiabia, nwibofushe anwe bana bene kwi bakulu. Ee, nwibofushene kwi muntu na muntu, nwikale bafwadikwe na kwihelesha kw’eshimba, mwanda Efile Mukulu etuhishena na basha kwinemeka, anka ahanā bu-muntu kwi bahohele.

6
Biabia nwihoheleshei mushi mweyasa dikata di’Efile Mukulu’shi, enukamishe ha kihindji akikalombana.

7
Nusumbule bia kwibasukila bienu hadie, mwanda e enusambā.

8
Nuhilei, nutengyelei, mwanda mwituhishyanyi n’obe diabola, akindakana bu ntambwe kwete kukumba na kukimba adia kukokota:

9
e winyi numushikilei anka hoo mu lukumino, ha kwiuka’shi, kwinyi kufwambuka kubamwene bakwenu be hanohansenga.

10
Anka winyi Efile Mukulu sha bu-muntu boso, winyi e betwitanyine ku ntumbo ye ya ikala-ika kwi Kidisitu Yesu, hanukahu kufwambuka kihindji, enulombashe biya, na kwinukankamisha, na kwinunyisha, na kwinushadisha.

11
Kwadie kwikale lubikyelo lwa kwikala mpaa na ikala-ika, Amena.

12
Kwi Shifanusa mukwetu a kishima, nyi ntentekyesha, nenufundjile bihela, kwinulungula ha bukoho na kwinulanga ’shi: Buno mbu-muntu bwa biabinyibinyi bw’Efile Mukulu bwa nwibemanyinyine.

13
(Kikoñeno ki’Efile) ki ku (Babylone) kisangudibwe hamune n’anwe, kibenwimuna; na mwan’ande Mako namu.

14
Nwīmushenei anwe bana bene na kwififyena kwa kifulo. Kufukama kwikale kwanudi’nwe boso mu Kidisitu, Amena.


Songe Bible 2018 KIMERU BIBLE WITH DC ©Bible Society of Kenya, 2009, 2018