Beblia

	NTETO INJEGA CIA MURUNGU KIRI ANTU BONTHE 2018 2 Petero 1


Save Notes

1
Shimona Petelo mpika na bu mutumibwa a Yesu Kidisitu, kwi baba abatambwile lukumino luneme, hamune n’atwe ha kululama kw’Efile Mukulu etu na Muhashietu Yesu Kidisitu;

2
Bu-muntu bufwimishibwe kwanudi, na kufukama ha kiukidilo ki’Efile Mukulu na kia Yesu Nfumwetu.

3
Bu bukome bwa bwifile bwe bubetuhele bintu bioso (binemene) ku muwa na ku bwin’Efile Mukulu, ha kiukidilo kia yawa betwitanyine ku ntumbo na buwa bukalabale,

4
nyi henyi habetuhele milayilo yeneme yikilekile bukata’shi; kwi yinyi ’yo nyi kwatudi bekele bakwibungila ku bwin’Efile, hakuhwa kuhanda ku kunyanga kwi hanohansenga, ha mwanda wa bia ngabiabi.

5
Ha uno mwanda namu hakuhwa kusasakata, nutentekye ku lukumino lwenu bukome bw’eshimba, na ha bukome bwe’shimba kiukilo,

6
na ha kiukilo butontshi bwa mbidi, na ha butontshi bwa mbidi mufwaka, na ha mufwaka bwin’Efile;

7
na ha bwin’Efile kalolo ka ba mukwabo na mukwabo, na ha kalolo ka ba mukwabo na mukwabo kifulo.

8
Mwanda su yino myanda yi mwanudi, na kufwima yifwimi, (biabia) yikenukitshine kwikala bashī na iotolo sunga mba kukutwa bikuba ku kiukidilo kia Nfumwetu Yesu Kidisitu.

9
Anka yawa akutwa yino myanda e mpofu, e na meso e mindjua, baīlwe kusulwa kwe kwa milwisho ye ya kala.

10
Binyibiabia bakwetu, nukishekishe kwilundjila kwenu’shi, lwitamino lwenu na kusangudibwa kwenu bikale binyiñamane hoo; mwanda su anukitshi yino myanda tanukakokola sunga mpa kinyi sunga mpa kinyi, ooo,

11
Nyi anka biabia anukahebwa kitwēlo kikilekile bukata kia mu bufumu bwa ikala-ika bwa Nfumwetu Yesu Kidisitu.

12
Ha uno mwanda ami tankahuftanya kwinutentekyesha bukyelebukyele mu yino myanda sunga anwiyiuku, na kukankamikwa mu biabinyibinyi bia bino.

13
Ee, natentekyesha ngulombane’shi: ha nki mu kino kibombelelo (nyi mbidi) kwinubasula hakwinunangushena:

14
hakwiuka’shi, kukumba kwa kino kibombelelo kiande ku luhese takudi hehi, anka mubandesheshe Nfumwetu Yesu Kidisitu.

15
Nankasasakata namu’shi, nwiukye kunangushena mafuku oso yino myanda, hatampwile kufwa.

16
Mwanda’twe tatubalondanga miele yibakitshinwe na bulamalama hatubenuukishe bukome na hakufika kwa Nfumwetu Yesu Kidisitu, anka tubadi tumonyi twa bukata bwe bukalabale.

17
Mwanda bahahwile kutambula kw’Efile Mukulu Yaiya kinemo na ntumbo, hakubatukile eyi di bino kwadie, ku ntumbo yikilekile buwa’shi: Uno’u nyi Mwan’ande mutomibwe kifulo, andji mutokyele bibuwa mwishimba.

18
Dino eyi namu dibatukile mwiilu, tubedihushishe hatubadi n’e mu yinyi ngulu yiliatulwe-yi-kishila.

19
Twi na Mwanda utemukwe ukambe kukankamikwa hoo, nyi kwaudi’o nukite bibuwa biakwiudimuka, hamune buitala adimunyika hantu he mufito, mpaa nāhamweka lutokyela, mpaa nāhakatunduka lwenyenye lwa munkyelo mu mashimb’enu,

20
hakwiuka kino kia kwibedi’shi, takwi lutemuko lwa Bifundwe-bi’Efile alwihatulwila lu na mwinyi.

21
Mwanda lutemuko talubafikile su mpa kihindji kinyi su mpa kihindji kinyi bu mubakyebel’eshimba dia muntu, ooo, anka bantu bahatulwe-be-kishila b’Efile Mukulu abākwile mwabatwadilwe na Kikudi-E-Selelee.


Songe Bible 2018 KIMERU BIBLE WITH DC ©Bible Society of Kenya, 2009, 2018