Beblia

	Ebaibuli 1961 2 Samuel 1


Save Notes

1
Kosodi kanen kedau Saul atwanare, keboŋu Daudi kaiar Imalekain, kodaunite da Daudi apaarasia aarei koSikilag;

2
Kosodi kanen kapaaran nakiwuniet, koany, kobu etuŋanan koidukurun kama ejai Saul kocilicilite ikenapen, kojukite alupot da akouke; kosodi kedol mama ejai Daudi, kisuded, kiyoga.

3
Kobala Daudi ŋes ebe, “Laali bo kibunio?” Kotema atiar, “Akui koidukurun luka Isirael.”

4
Kobala Daudi ŋes ebe, “Ekote bo ai? Keŋaiŋait kolimokinai.” Koboŋok ebe, “Akera ituŋa kojie, ido ebiroros ituŋa luipu atwaka; Saul ka okokuke Yonatan atwaka kesi da.”

5
Kobala Daudi etelepat lokelimokini ŋes ebe, “Kijenuni biai ebe atwana Saul ka okokuke Yonatan?”

6
Kotema etelepat lokelimokini ŋes atiar, “Napajaar eoŋ moru Giliboa, koany, kogoŋakin Saul akwarake; ido koany, agalin ka luibwanenito kituburuunitos.

7
Kosodi keŋolia kau, kaany eoŋ, kanyara. Kaboŋok ebe, “Eoŋ lo.’

8
Katemaeoŋ atiar, ‘Iŋai bo ijo?’ Kaboŋok ŋes ebe, “Eoŋ Emalekait.’

9
Katema eoŋ atiar, ‘Keŋaiŋait, kobwo kosiepika, koar eoŋ, naarai kerumut iean; naarai akaijar eroko ejari kotomakaŋ.’

10
Kasodi aibwo kosiepike, kaar ŋes, naarai abu kajen cut ebe mam epedori araut ekajaran kedau aibirokin kwap; kayaŋa aboko naajai akouke, ka aisinit naajai akanike, ido ayaunit mama ejai ekajakait.”

11
Kosodi kitiŋ Daudi ikenapen kocil; kiswamata da kwape kwaŋin ituŋa kere lukejaas kaŋes.

12
Kibworoto, komonyata akiyo, koluŋata aitiwar akwap, kanuka Saul, kanuka Yonatan da okokuke, kanuka ituŋa luka EJAKAIT, kanuka ekek da loka Isirael; naarai ebiroros kekileŋ,

13
Kobala Daudi etelepat lokelimokini ŋes ebe, “Lokai bo ijo?” Koboŋok ebe, “Arai eoŋ okoku loka emoit, Emalekait.”

14
Kobala Daudi ŋes ebe, “Kanukinyo mam kiyoŋia arior akonikan amudiar ŋol loinyonyoikinit EJAKAIT akinyet?”

15
Konyarau Daudi ediopet kotelepai, kolimok atiar, “Kikunyak, kosomakin.” Kicum ŋes kotwana.

16
Kobala Daudi ŋes ebe, “Akoniwokot kobeata akoukon; naarai akoniituk ŋes akajenan kamakon inera atiar, ‘Aar ŋol loinyonyoikinit EJAKAIT akinyet.’’’

17
Kosodi kokuudian Daudi Saul ka Yonatan okokuke akuudian na:

18
Kicorak aisisianakin idwe luka Yuda ekosio loka akabwa: koany, kiwadikatai oitabo loka Yasar. Kobala ebe:

19
“Aibusesukon, WU okwe Isirael, aari kaiboisiokon nuiceleleete! Wu okwe ebiroros itikirigin!

20
Sirikilimonokis koGat, Sirikisiarakis orotin luka Asukelon; Kinyeis adwe nuka Ipilisitian aiyalama, Kinyeis adwe nuka kalumam ekepitai ailel.

21
Yes iroŋan luka Giliboa, Kinyeis akopyo karaida akiru ajaut kokujukus, Karaida imanikoria luka kaluiinakina; Naarai ŋina acakakinio kileic ebuku loka itikirigin, Ebuku loka Saul bala lomam enyonyoikinitai akinyet.

22
Kaokot nuka ŋul kalukearia, Kasiepa da nuka itikirigin, Akabwa naka Yonatan mam aboŋunenei kau, Ka ekileŋ loka Saul da mam aboŋunenei atitai.

23
Saul ka Yonatan araas lukajokak ido luitalakaarito kaijarakec; Mam aponi kotiakai katwanarekec; Atiroko aitelekarit imorukaalen, Agogoŋ aitelekarit iŋatunyo.

24
Yes adwe nuka Isirael, kibworoto Saul, Lokitanapi yes lukareŋak lukaitojoka, Lokisiri ikusinapen kesabu.

25
Wu okwe ebiroros itikirigin Kokidiŋ ojie! Aari Yonatan kaiboisiokon nuiceleleete.

26
Eturur kanukon, onaceka Yonatan; Ibu kitalakaanari eoŋ noi noi; Akonomin mamakaŋ arai nakaumokin, Adepar amin naka aŋor.

27
Wu okwe ebiroros itikirigin, Amudiaros da lujiis luka ajore!”


Teso Bible 1961 Ateso Old Version Bible © United Bible Societies, 1961