Beblia

	Ebaibuli 1961 Yob 1


Save Notes

1
Kojai etuŋanan kakwap naka Us, ekekiror Yob; kerai etuŋanan ŋol lomam itoronitai, loeteni, loayoŋit Edeke, kosacite da aronis.

2
Kourite idwe lusap ikanykaarei, ka lupesur iuni.

3
Ido iboroke araas amerekekin alukumin akanykaarei, ka akaalai alukumin auni, ka ajookon akwat akany nuka imoŋin iareiarei, ka asigirian nuŋor akwat akany, ka ikejaanakinak luipu noi; kanuka ŋun kerai etuŋanan loapol aitelekar idwe kere lukokide.

4
Koloto odweke kipooto epueit ŋolidiopet kotogoke kapaaranike; kijukanarete anyaraunun ainaeanakee auni ainyam ka aimat nepepe kakes,

5
Kosodi ketuboros apaarasia nuka epucitikee, kijuka Yob kitalau kes, kodilonokin anyounun tupuruc, koinanak ainakineta nuieweio kwape ketiaikee kere: naarai kobala Yob ebe, “Musiki adiakasi odweka, aiŋer Edeke toma otauonokec.” Kwape kwaŋin abu Yob kirueurue aiswamaenen.

6
Kosodi kapaaran adiopet kopotu odwe luka Edeke aitodiar kakonyen nuka EJAKAIT, kobu Satan da nepepe kakes.

7
Kobala EJAKAIT ebe, “Satan, kibuni kai?” Koboŋok Satan kobala ebe, “Abuni kabonobono keilat kakwap kariariat lailo ka laiie.”

8
Kobala EJAKAIT Satan ebe, “Iwomit ijo nuka ekakejaanakinan Yob? Naarai emamei loeputos kaŋes kakwap, etuŋanan lomam itoronitai, loeteni, loeyonit Edeke, esaeit da aronis.”

9
Kosodi Satan aboŋokin ebe, “Eyonit kereka Yob Edeke atai?

10
Mam ibwaikinit abwas aisirimor nes, ka etogoke, ka iboro kere luejaatar, kowaitin kere? Isirerenit aswam naka akaninike, iyatakina ikeboro kakwap.

11
Konye korio cani akanikon, kotiro kere lueiaatar, ido kinerokini ŋesi jo kakonyenekon.”

12
Kobala EJAKAIT Satan atiar,” Koany, kere luejaatar ejaas toma akanikon, konye mam iriori akanikon mama ejai ŋesi elopet.” Konyou do Satan kama ejai EJAKAIT.

13
Kapaaran adiopet kenyamete ikedwe lusap ka lupesur, komasete da ebino kotogo loka onaeekee lokapolon,

14
kobu ekiyakia neejai Yob, kotema atiar, “Ajaas imoŋin ekoriete, kodakasi asigirian osiepikee:

15
aŋatasi Isabean ayanaasi kes; eebo, aarata ikatumunak kakwanis naka ekileŋ; eoŋ bon aku alimokin jo.”

16
Eroko inera ŋesi, kobu eee kotema atiar, “Ebirun akim naka Edeke edokuni kokuiu, anyama amerekekin, ka ikatumunak, amudia kes; eoŋ bon aku alimokin jo.”

17
Eroko inera ŋesi, kobu eee kotema atiar, “Etemokis Ikaludean irioneta iuni, aŋatasi akaalai, ayanaasi kes, eebo, aarata ikatumunak kakwanis naka ekileŋ; eoŋ bon aku alimokin ijo.”

18
Eroko inera ŋesi, kobu eee da kotema atiar, “Anyamete ikonidwe lusap ka lupesur amasete da ebino kotogo loka onaeekee lokapolon:

19
ido koany, kobu ekwam loepol kamodiŋ, kinom agoria aoŋon nuka etogo, korapak ikatumunak, atwaka da; eoŋ bon aku alimokin jo.”

20
Kosodi Yob anyoun kocil elouke, kobaren akekou, kibirokin kwap, koma;

21
Kobala ebe, “Abu kalom kakoik naka totoka emujalal, aboŋori da emujalal: EJAKAIT nes abu kainak, ido EJAKAIT nes alemaa; kituritete ekiror loka EJAKAIT,”

22
Kotoma kanun kere mam abu Yob kodiaka mam da abu komoro Edeke abaŋaanut.


Teso Bible 1961 Ateso Old Version Bible © United Bible Societies, 1961