Beblia

	Ebaibuli 1961 Awaragasia 23


Save Notes

1
Arai kiboikin aimor nepepe kalokapolon, Koomoom noi loejai kakonyenekon;

2
Kibwaik ekileŋ ologorotokon Arai irai ijo etuŋanan lokerana.

3
Sirikinobel lukajijimakake; Naarai kes inyamat lukaimod.

4
Siritaaritoi adumun abar; Kopalu acoakon ŋin.

5
Igipakinit cabo akonikonyen ibore yenemamei? Naarai abeit esubuni abar abebenoka, Kwape emorukaalet loeporori kuiu noi.

6
Sirinyamenenei inyamat luka ŋol kaloibitiono, Karaida aiŋobel lukaiiiimakake:

7
Naarai kwape eomitor ŋesi kotomake, ikoni nen: Kiitema ŋesi jo ebe, “Konyam, komat”; Konye etauke mam ejaas nepepe kajo.

8
Ilekari aoduneta nuinyama, Kosodi atwaniar akirokon nuejok.

9
Sirinera kopupi ebaŋ; Naarai emeni ŋesi acoa naka akonikiro,

10
Sirikiiul aanyunet naka eikor losek, Karaida alomar omanikoria luka luemameete lukapapakec:

11
Naarai egogoŋ Ekalakunanikee; Epurokini ŋesi kes aluikin jo.

12
Kibwaik ekonitau toma aisisianakinio, Akiikon da akiro nuka aijen.

13
Sirikitikok ikoku apueunio; Arai kileco nes kebela mam etwani.

14
Koleco ŋes kebela, Koyu aijarake kokatwak.

15
Okokuka, arai keeou etaukon, Iyalamikini ekatau, loka ba:

16
Eebo, elelete ikaneretenya, Arai inera akoniituk nukajokak.

17
Kinyek ekonitau aikokoteikin ikadiakanarak: Konye koiaenena kayoŋ it EJAKAIT aitiwar akwap.

18
Naarai abeit ejai eropit; Mam etwaniari amunonutukon.

19
Kiira ijo, okokuka, kocou, Kiteteni ekonitau korot.

20
Siriiaananas kanul kaluemeranakinos; Kaŋul da luisinyooko ainyam akiriŋ:

21
Naarai edolokini ailwaritoi ekameran ka loisinyoono: Ailuranar da itanapi etuŋanan inyilinyilia.

22
Kiiranari papakon lokiwuriei, Ido sirimwanenenei totokon kemoioŋ.

23
Kogwel abeit, sirigwelanari; Eebo, kogwel acoa, ka aituutoorio, ka ajenun da.

24
Iyalamikini noi papa loka ekadoliton: Ŋol da loeuriei ikoku yenikacoa isiyalamikini ŋes.

25
Kiyalamikinos papakon ka totokon, Kolele ŋin nakiwuriei joo

26
Okokuka, ae ekonitau, Kisiyalamikis akonikonye ikarotin.

27
Naarai erai naadote asoogot naidul: Erai da aberu nakerimon aipany naedidin,

28
Eebo, eperuni bala ekerurwon, Iyatakini luebilete ibotei kotuna.

29
Iŋai bo eburunit? Iŋai bo eanyunit ican? Iŋai bo ejai aŋolopa? Iŋai bo enuuriani? Iŋai bo ejaas amusuŋun nuutai? Iŋai bo da iterenit akonye?

30
Kes nul luinoosikinos toma aion: Kes nul luelosete airi ajon nuinyalinyala.

31
Siriseseni ajon nueupapanata, Kitodias aputokec kotoma adere, Naijililiarotor.

32
Kokau kitodete bala emun, Kiswalarete bala emusaga.

33
Eanyunete akonikonye nuilocokino, Ineranakin ekonitau da epali.

34
Eebo, isubi bala ŋin yeneperi kataro, Arai yeneperi kokuju opir loka ataker.

35
Inera ijo kwana ebe, “Kebuŋai, komam arieba: Kenomonomoi, komam ajeni: Akwenyuni wori? Kerii bobo kes.”


Teso Bible 1961 Ateso Old Version Bible © United Bible Societies, 1961