Beblia

	Ebaibuli 1961 Yeremia 1


Save Notes

1
Akiro nuka Yeremia okoku loka Kilikia, lokonabin luajaas Anatot akwap naka Benyamin,

2
Loabuni akirot naka EJAKAIT mamakeŋ kapaarasia nuka Yosia okoku loka Amon, ekabaka loka Yuda, kokaru lokitomonet kauni loka airumuke.

3
Kobu da kapaarasia nuka Yekoiakim okoku loka Yosia, ekabaka loka Yuda, kiton osaŋe loka ekaru lokitomonet kalodiop loka Sedekia okoku loka Yosia, ekabaka loka Yuda; kiton neejoreorere luko Yerusalem olap lokikanyet,

4
Kosodi kobu akirot naka EJAKAIT mama ajal eoŋ kobala ebe,

5
“Eriŋa kesuba jo kotoma akoik abu kajen jo, Ido eriŋa ilomuna kakoik abu ketalau jo: Kaseu jo araun enabi mama ejaas atekerin.”

6
Kasodi eoŋ atemar atiar, “Wu okwe, EJAKAIT Edeke! Koany, mam apedori einer: naarai arai esapat.”

7
Konye kabala EJAKAIT eoŋ ebe, “Sirikiner ebe, ‘Arai eoŋ esapat:’ Naarai ilosenenei mama ejaas ŋul kere lukejukanari jo, Inerenenei da ŋun kere nukecoranakini joo

8
Ebala EJAKAIT ebe: Sirikikurianar kes: Naarai ajaenena kajo ayuun jo,”

9
Kosodi EJAKAIT arior akekan kotiroria akaituk; kabala EJAKAIT eoŋ ebe: “Koany, ebwaik akakiro aitukukon:

10
Koany, kadakak jo lolo ayait atekerin ka ajakanuto, Arutun ka abilibil, Amudiar, ka atiyaikin; Aiduk ka aira da,”

11
Ido da kobu akirot naka EJAKAIT mama ajai kobala ebe, “Yeremia, ianyu inyo?” Kabala ebe, “Aany ebela loka ekuŋur,”

12
Kosodi EJAKAIT atemar eoŋ atiar, “Iany ejok: naarai edarenenei akakirot aitodolikin.”

13
Kobu akirot naka EJAKAIT nakiareit mama ajai kobala ebe, “Ianyu inyo?” Kabala ebe, “Aany amot naekulai; kipuŋuno da kagolitomei.”

14
Kosodi EJAKAIT atemar eoŋ atiar, “Ebuni atohis abelun kagolitomei mama ejaas kere luiboienenete kakwap kana.

15
Naarai ebala EJAKAIT ebe, Koany, anyarauni atekerin kere nuka ajakanuto nuka agolitomei; epote do, esipokinete kesi ŋinituŋanan ekeicoloŋ loka ajakanut neelomarere orutei luka Yerusalem, asurokin arwatatinike kere airimor, asurokin da ireria kere luka Yuda.

16
Ido alimori ikatubesia aluikin kes kanuka nukaronokokec kere; naarai kajalata, kisupurunonokis lukisupurununo icedekesio, komaata da aswamisio nuka akaninikec.

17
Aso do jo koen aŋabetekon, konyou, kolimok kes kere nukecoranakini jo: sirikiyaloŋoŋ nukee, kenyek eoŋ aisiyaloŋoŋ jo kakonyenekec,

18
Naarai koany, ketuluo jo lolo ere loebwaitai, epir da lokasuat, arwatatin nukaisinin, aluikin akwap kere, aluikin ikabakan luka Yuda, aluikin ikapolokoke da, aluikin isasedotinike, ido aluikin ituŋa luka akwap kana.

19
Ejiikinos kesi kajo: konye mam kipikorete: naarai ebala EJAKAIT ebe, Ajaenena eoŋ kajo ayuun jo.”


Teso Bible 1961 Ateso Old Version Bible © United Bible Societies, 1961