Beblia

	Ebaibuli 1961 Kosea 2


Save Notes

1
Kolimokisi ikusiinacan ebe, “Ami”; ka akusiinaean ebe, “Rukama.”

2
Kiŋaiŋaata totokus, kiŋaiŋaata; Naarai mam erai akaberu, Eoŋ da mam arai okilenike: Kosae ŋesi adoteuke kakonyeneke, Ka eporoke kokisinake;

3
Kenyek aitumujalal ŋes, aibwaikin kwape kapaaran naauriere, Ketuput ŋes kwape amodiŋ, Kebwaik ŋes kwape akwap naconit, Kaar ŋes kakure.

4
Eebo, mam etimi ikedwe; Naarai eraas idwe luka adoteu.

5
Naarai adotear totokec: Eswama ŋin naapotuunit kes nukileic: Naarai abala ebe, ‘Alosi mama ejaas ipaelonoka, Lueinakinete eoŋ atapaka, ka akipika, Ajuloka ka abiraika, akinyeteka ka numatanaka.’

6
Aso do koany, abwai ekonirot kikukwa, Aduki arwatat kaneejai ŋesi, Tetere mam edumuni ikerotin.

7
Etupari ŋesi ipaelonoke, Konye mam edolokini kes: Emoi kes, konye mani edumuni: Kosodi do ebala ebe, ‘Alosi Aboŋori mama ejai okilenika losodit Naarai ajai ejok kolo adepar kwana.’

8
Naarai mam ŋes ajeni ebe Eoŋ ŋes ainakinit ŋes Akima ka ebino ka akinyet, Keyatak mama ejai epuesa ka esabu Luejaanakiniata Baal.

9
Ŋes enyakunia akimaka kapakike, Ka ebinoka kokaruke, Alemari da aiuloka ka abiraika Nutikerapiata amu; alalake,

10
Kwana da etoduuni ikeleic Kakonyen nuka ipaelonoke, Emameun yeneyuuni ŋes kakanika.

11
Etanaŋi da aiyalamake kere, Ipucinoke, ailamunun naka ilapioke, asabatonoke, Ka atukokinetake kere nukaiyamakina,

12
Etiswapi imusabibunuke ka itininike, Luabu ŋesi kotema ebe, ‘Lu kes eropitika, Loapotu ipaelonoka kainakis eoŋ’; Etuluori kes amagoro, Enyamete da kes itian luka ais.

13
Ebala EJAKAIT ebe, “Etieani ŋes Kanuka apaarasia nuka Ibaalim, Luabu ŋesi kisupurik lukisupurununo, Kisiri kitetio ka itibineke, Kibwapa ipaelonoke, kimurwok eoŋ,

14
“Aso do koany, emaimai ŋes, Ayauni ŋes amodiŋ, Enerakin ŋes nuitalakarete.

15
Ainakini ŋes kaŋina amanatake nuka emusabibu, Aditot naka Akor araun ekek loka amun: Eboŋokini ŋesi kaŋina, kwape kapaarasia nuka eiditeuke, Kwape kapaaran naanyounio kakwap nako Misiri,

16
Ebala EJAKAIT ebe, “Kosodi kapaaran kaŋin, kimaikini eoŋ, Okilenika” mam bobo kimaikinit eoŋ ‘Baalika’,

17
Naarai alemari ikiroria luka Ibaalim kaitukuke, mam bobo elimitoi ikiroriakec,

18
Kapaaran kaŋin etutukikini kes aitutuket kitian luka ais, ka akweny nuka apak, ka lueliatos kakwap: abili akabwa ka ekileŋ ka ejie anyoun kakwap, esiperikini kes inapakina.

19
Kesineri jo ikar kere; eebo, kesineri jo kadolit, kotube, kasianut-nakamin, ka aitimio da.

20
Kesineri teni jo kamunonut: ijenuni do EJAKAIT,”

21
Ebala EJAKAIT ebe, Kosodi kanen kapaaran kaŋin, Aboŋokini, aboŋokini akuj, Ŋes da eboŋokini akwap;

22
Eboŋokini akwap akima, ka ebino, ka akinyet; Eboŋokinete kesi da Yesereel.

23
Ayeikini ŋes akwap kanukaŋ; Etimi ŋin namam lem itimitoi: Alimokini ŋul lumam araas ikatuŋa ebe, ‘Iraas yesi ikatuŋa’; Kes da inerasi ebe, “Ŋono Ekadeke.’”


Teso Bible 1961 Ateso Old Version Bible © United Bible Societies, 1961