Beblia

	Ebaibuli 1961 Ilebin 25


Save Notes

1
Kotema EJAKAIT Musa komoru Sinai atiar,

2
“Kolimok idwe luka Isirael ebe, Kidoloto yesi akwap nakainakini yes, ŋes konyet idaria akwap asabato mama ejai EJAKAIT.

3
Iyei emanikorikon ikar ikanykape, idimi amanakon naka emusabibu ikar ikanykape, itukonokini araitoke.

4
Konye okaru lokikanyetekaarei ejaun asabato naka aibworar nakayamakina naka akwap, asabato mama ejai EJAKAIT: mam iyei emanikorikon, karaida aidim amanakon naka emusabibu.

5
Mam isaki nuebwaŋunete bon, mam itukonokini araito nuka emusabibukon lomam ecapap: eraun ekaru loka aibworar nakayamakina naka akwap.

6
Eraun asabato naka akwap inyamat kamakus; kamakon, ka ekejaanakinanikon, ka akejaanakinanikon, ka ebulesitikon loiwotei, ka imoitikon yeniboie kamakon;

7
Kama ibarenekon, ka itiaŋ luejiaas akwapukon, amioke kere eraun inyamat.

8
Imari ijo asabaton akanykaarei nuka ikar, kes ikar ikanykaarei irwan ikanykaarei; eraunos kamakon apaarasia nuka asabaton akanykaarei nuka ikar, kes ikar akaisaoŋon ka lukanykaoŋon.

9
Kosodi akutakin arupepe naeruo noi kapaaran nakitomonet naka elap lokikanyetekaarei; ikutakini arupepe kapaaran naka ailuc airimor akwapukus kere.

10
Italaunete ekaru lokakaisakany, ilimorete da aosikinio airimor akwap mama ejaas luibojete kotoma kere: eraun eyubili kamakus; inyakakinete ŋinituŋanan alupoke, inyakarete da ŋinituŋanan okekike.

11
Eraun ekaru ŋol lokakaisakany eyubili kamakus: mam iyeete, karaida aisak nuebwaŋunete bon, karaida atukonokin araito nuka emusabibuke lomam ecapap.

12
Naarai erai eyubili; eraun lokalaunan kamakus: inyamete amioke nakotoma omanikor.

13
Kokaru kaŋol loka eyubili inyakakinete ŋinituŋanan alupoke.

14
Arai itwegeli ibore iidunyetekon, arai agwel kakan naka iidunyetekon, sirikiswamanakinos aronis.

15
Kwape ejaar etiai loka ikar luetupakinete eyubili igwcli kaidunyetekon, kwape ejaar etiai loka ikar luka aisak kitwegeli ŋesi jo.

16
Kwape ejaar aipues naka ikar iyatakini ijo apesanake, kwape ejaar aikidiokus naka ikar iŋoŋoori ijo apesanake, kitwegeli ŋesi jo kwape ejaar etiai loka ikar luka aisak,

17
Sirikiswamanakinos aronis; konye koyoŋ Ekonideke, naarai arai eoŋ EJAKAIT Ekusideke.

18
Kanuka ŋun kitodoloto ikakisila, koricito itubesiaka kiswamata; kiboiete kakwap inapakina,

19
Erai akwap araitoke, kimonikinos, kiboikinos inapakina.

20
Arai itemarete ebe, “Kinyami inyo kokaru lokikanyetekaarei? Koany, mam kiyei, karaida atukonokin amiokosi:”

21
Kasodi aicorakin arereŋuka mamakus kokaru lokikanyetekape, erai araito nuka ikar ŋul luuni.

22
Iyeete okaru lokikanyetekauni, inyamete araito, nuŋorok nueŋadakinitai; inyamete nuŋorok nueŋadakinitai aitodol okaru lokikanyetekaoŋon, aitodol naelomunia araitoke,

23
Mam egwelario alup ayaŋaar ikar kere; naarai erai akwap nakaŋ: naarai iraas yesi ipejok ido luiboiororos kamakaŋ.

24
Kakwap kere naka airumetekus isunupete akwap alakunio.

25
Arai icana onacekon, kogwela alupoke ace, kosodi ekalakunanike abunore, elakuni ŋun nuagwelarit onaceke.

26
Arai emamei ituŋanan yenelakuni, kebar ŋesi kodum Iuedaunete alakun:

27
ŋes konyet imaria ikar luagwelaritor, kinyakak ameda mama ejai ituŋanan loagwelit; eboŋori ŋesi alupoke,

28
Konye arai mam epedori ainyakun kanuke, kosodi nuagwelarit apaikin akan naka ŋol kaloagwelit aitodol okaru laka eyubili: kosodi koyubili eosikinio, eboŋori. Ŋesi da alupoke.

29
Arai kegwela etuŋanan etogo kore loirigaunitai karwatat, epedori alakun ŋes eriŋa etuboro ekaru ediopet ageun kagwelarike: ekaru ediopet ejai apedor alakun.

30
Arai mam elakunitai eriŋa etuboro ekaru ediopet, kosodi etogo loejai ore loirigaunitai karwatat itogogonitai ŋol loagweli ikar kere anatar aturioke: mam eosikinio koyubili.

31
Konye itogoi lukoreria lumam irigaunitai karwatat imarakinitai kimanikoria lukorony: epedorio alakun, eosikinio koyubili.

32
Konye ireria luka Ilebin, itogoi lukoreria luka alupokec, epedorete Ilebin alakun apak kere.

33
Arai elakuni ediopet koLebin, kosodi etogo loagwelaritai, ka ere loka alupoke eosikinio koyubili: naarai itogoi lukoreria luka Ilebin eraas alupokec kodwe luka Isirael.

34
Konye emanikor loka ironyia lukoreriakec mam epedorio agwelar; naarai erai alupokec ikar kere.

35
Arai icana onacekon, kokurwok akanike kamakon; ibus ijo aigaŋ ŋes; iboie kamakon kwape emoit ka ekeboiororon.

36
Sirikiyaŋa ameda kaneejai ŋesi karaida luiyatakina; konye koyon Ekonideke; tetere iboie onacekon kamakon.

37
Sirikiinak ŋes apesanakon adumun ameda, karaida ainakin ŋes inyamatakon adumun luiyatakina,

38
Arai eoŋ EJAKAIT Ekusideke, loketolomuni yes kakwap nako Misiri, ainakin yes akwap nako Kanaan, araun Ekusideke.

39
Arai icana onacekon kamakon, kogwelari bon mamakon; siritubuleseni ŋes aijaanakin jo:

40
Eraun kamakon kwape ebulesit loiwotei, kwape ekeboiororon; ijaanakini jo aitodol okaru loka eyubili;

41
ŋes konyet eosikinor ŋesi kamakon ka ikedwe kaŋes, eboŋori okekike, eboŋori da alup nuka lukapapake.

42
Naarai eraas ikakejaanakinak luabu ketolom kakwap nako Misiri: mam egwelario kwape ibulesin.

43
Mam iyait ŋes kagogoŋ; konye koyoŋitenenei Ekonideke,

44
Ido ibulesinikon ka abulesinikon luijaunete kajo; igwelete ibulesin ka abulesin katekerin nukirimoritos yes.

45
Bobo da igwelete kodwe luka imo luiboiororete kamakus, kokekiakec luejaas kamakus, luaurikis kesi akwapukus: eraunos airumetekus.

46
Itaraunete yesi kes airumet naka idwekus lukitupanakinete, aitiŋ araun airumet; iyaŋaarete ibulesinikus kamakec ikar kere: konye siriyaito iinacanakus idwe luka Isirael idiopet ayait yenice kagogoŋ.

47
Arai kebar emoit arai ekeboiororon kamakon, onacekon da icana eapie kaŋes, kogwelari bon mama ejai emoit ekeboiororon kamakon, arai mama ejai ateker naka ekek loka emoit:

48
Kedau agwelario epedorio alakun; epedori ediopet koinacanake alakun ŋes:

49
Epedori onace loka ikauriakake, arai okoku loka onace loka ikauriakake alakun ŋes, arai ŋolituŋanan loipajanas kaŋes epedori alakun ŋes; arai kebar elopet epedori alakun bon,

50
Imarakini ŋol loagwelit ŋes ageun kokaru loagwelaritor mama ejai kiton okaru loka eyubili: ejaun etiai loka agwelarike kwape eaar etiai loka ikar; kwape ejaar etiai loka ikar luka ebulesit loiwotei ejaun kaŋes.

51
Arai eroko esalito ikar luipu, kwape ejaatar kesi inyakakini etiai loka alakunike kapesan nuagwelunere.

52
Arai esalito ikar luikidioko kiton okaru loka eyubili, kosodi aimarakin ŋes; kwape ejaatar ikaruke inyakakini etiai loka alakunike.

53
Kwape ebulesit loiwotei ŋolikaru ejaun kaŋes; mam eyait ŋes kagogon kakonyenekon.

54
Arai mam elakunio kaŋul, eosikinio ŋes kokaru loka eyubili, ka ikedwe kaŋes.

55
Naarai eraas idwe luka Isirael ikejaanakinak kamaka: eraas ikakeiaanakinak luabu ketolom kakwap nako Misiri arai eoŋ EJAKAIT Ekusideke.


Teso Bible 1961 Ateso Old Version Bible © United Bible Societies, 1961