Beblia

	Xitsonga (Bibele) 2012 2 SAMIELE 18


Save Notes

1
Kutani Davhida a kamba tiko leri ngi ri ri na yena, a veka ehenhla ka vona tindhuna ta madzanadzana ni tindhuna ta madzana;

2
kutani Davhida a rhuma tiko: ku avanyisa ka vunharhu a ku ri emavokweni ya Yowabu, ni ku avanyisa kun'wana emavokweni ya Abixayi, n'wana Seruya, makwa Yowabu, ni ku avanyisa ka vunharhu kun'wana emavokweni ya Itayi wa Gati, kutani hosi yi ku eka tiko: “Na mina ndzi ta huma na n'wina.”

3
Kambe tiko ri ku: “U nga ka u nga humi; hikuva kutakuloko hi fanele ku tsutsuma, a va nga vuli nchumu ha hina, hambi ku nga fa hafu ya hina, a va nga vuli nchumu ha hina, hikuva wena u ringanisa khume ra madzanadzana ya hina. Kambe sweswi, swi sasekile loko u hi pfuna u ri emutini.”

4
Kavaloko hosi yi ku eka vona: “Ndzi ta endla leswi mi swi pimisaka leswaku hi leswinene.” Sweswo hosi yi yima etlhelweni ra nyangwa, kutani tiko hinkwaro ri huma hi madzana ni madzanadzana.

5
Hosi yi lerisa Yowabu, na Abixayi, na Itayi, yi ku: “Ndzi tsetseleleleni jaha Abixalomu,” kutani tiko hinkwaro ri yingisa ku lerisa ka hosi eka tindhuna hinkwato ehenhla ka Abixalomu.

6
Tiko ri huma erivaleni ku ya hlangana na Israele, kutani ku lwa ku va kona exihlahleni xa Efrayimi.

7
Tiko ra Israele ri hluriwa kona hi malandza ya Davhida; ku dlawa ku va lokukulu siku leri; ku dlayiwa vanhu va 20 000.

8
Ku lwa ku eneta tiko hinkwaro, kambe xihlahla xi heta vanhu siku leri ku tlurisa tlhari.

9
Abixalomu a hlangana ni malandza ya Davhida, kambe Abixalomu a a khandziyile mula, kutani mula yi nghena emarhavini lama hlanganeke ngopfu ya nkuhlu lowukulu, kutani nhloko ya Abixalomu yi phasiwa enkuhlwini, a sala a hayekiwa exikarhi ka tilo ni misava, yona mula leyi ngi yi ri hansi ka yena, yi hundzela emahlweni.

10
Wanuna un'wana a n'wi vona, kutani a ya byela Yowabu, a ku: “Waswivo, ndzi vonile Abixalomu a hayekiwe enkuhlwini.”

11
Yowabu a ku eka munhu la n'wi byeleke mhaka leyi: “U n'wi vonile! Kasi a ku n'wi tlhavanga ha yini, a wa hansi xana? A ndzi ta fanela ku ku ha tixikele ta khume ta silivhere ni vamba.”

12
Munhu loyi a ku eka Yowabu: “Hambi ndzi nga pima tixikele ta khume ra madzana, hi voko ra mina exikalweni, ndzi nga ka ndzi nga tlakusi voko ra mina ehenhla ka n'wana wa hosi, hikuva hi swi twile hi tindleve ta hina loko hosi yi ku lerisa swin'we na Abixayi na Itayi, yi ku: ‘Un'wana ni un'wana a a tsetselele jaha Abixalomu.’

13
Kumbe loko ndzi endlile vutomi bya yena hi mona, hosi a yi fihleriwi nchumu na wena ingi u ta va mbhoni ya mina.”

14
Yowabu a hlamula, a ku: “Ndzi nga ka ndzi nga hlweri sweswo emahlweni ka wena!” Kavaloko a teka mafumu manharhu, a tlhava Abixalomu ha wona embilwini, hikuva a a ha hanya exikarhi ka nkuhlu;

15
kutani majaha ya khume lama tameleke matlhari ya Yowabu, ma rhendzela Abixalomu exikarhi, ma n'wi tlhava, ma n'wi dlaya.

16
Yowabu a yimba nanga, kutani tiko ri tlhela eku hlongoriseni ka Israele hikuva Yowabu a a tsetselela tiko.

17
Kutani va teka Abixalomu va n'wi cukumeta exihlahleni, ekheleni lerikulu, va hlengeleta ehenhla ka yena nhulu leyikulu ngopfu ya maribye; kutani Vaisraele va tsutsuma, un'wana ni un'wana entsongeni wa yena.

18
Kambe Abixalomu a a tiakerile loko a ha hanya, xitsundzuxo lexi nga enkoveni wa hosi, hikuva a a te: “A ndzi na n'wana wa wanuna ku hlayisa xitsundzuxo xa vito ra mina,” kutani a xi thya hi vito ra yena; xi thyiwile ku fika namuntlha xitsundzuxo xa Abixalomu.

19
Ahimaasi, n'wana Sadoki, a ku: “Ndzi tshike ndzi tsutsuma ku ya vikela hosi mahungu yo saseka hilaha Yehovha a n'wi rihiseleke hakona evokweni ra valala va yena.”

20
Yowabu a ku eka yena: “U nga ka u nga vi muvikeri wa mahungu yo saseka namuntlha; u ta ya vika mahungu siku rin'wana, kambe u nga fambi namuntlha leswi n'wana wa hosi a feke.”

21
Kutani Yowabu a ku eka Mukuxi un'wana: “Famba u ya vikela hosi leswi u swi voneke.”

22
Mukuxi a khinsama emahlweni ka Yowabu, kutani a tsutsuma. Ahimaasi, n'wana Sadoki, a engeta kambe a ku eka Yowabu: “Hambi ku nga humelela yini wanga ndzi tshika ndzi tsutsuma na mina endzhaku ka Mukuxi.” Yowabu a ku: “U ta tsutsumela yini, n'wananga, leswi mahungu ya wena ma nga sasekangiki xana?” “Hambi ku nga humelela yini,” ku vula Ahimaasi, “ndzi rhandza ku tsutsuma.”

23
Kutani Yowabu a ku eka yena: “Tsutsuma.” Kavaloko Ahimaasi a tsutsuma hi ndlela ya rivala a hundza Mukuxi.

24
Davhida a a tshamisile exikarhi ka tinyangwa letimbirhi; kutani mulanguteri a khandziya elwangwini ra nyangwa, erirhangwini, kuteloko a tlakusa mahlo, a languta a vona munhu la tsutsumaka a ri swakwe.

25
Mulanguteri a huwelela a tivisa hosi; kutani hosi yi ku: “Loko a ri swakwe, u ni mahungu enon'wini.” Kambe a a ha tsutsuma a tshinela.

26
Mulanguteri a vona un'wana munhu la tsutsumaka; kutani mulanguteri a huwelela eka mutshameri wa nyangwa, a ku: “Munhu u kona la tsutsumaka a ri swakwe.” Kutani hosi yi ku: “Na loyi i muvikeri wa mahungu.”

27
Mulanguteri a ku: “Ku tsutsuma ka lowo rhanga ku fana ni ku tsutsuma ka Ahimaasi, n'wana Sadoki.” Hosi yi ku: “I munhu lonene; a ta a ri ni mahungu ya ku saseka.”

28
Ahimaasi a huwelela, a ku eka hosi: “Ku rhula!” Kutani a khinsama emahlweni ka hosi, mombo wa yena wu ri hansi. Kambe a ku: “A ku dzunisiwe Yehovha, Xikwembu xa wena la hluleke vanhu lava tlakuseke voko ku lwa ni hosi, n'wini wanga.”

29
Hosi yi ku: “Xana ku rhula ku kona ni ka jaha Abixalomu xana?” Ahimaasi a ku: “Ndzi vonile nkitsikitsi lowukulu loko Yowabu a rhuma nandza wa hosi ni nandza wa wena, kambe a ndzi tivi xana a yi ri yini?”

30
Hosi yi ku eka yena: “Hundzuka u yima la!” Kutani a hundzuka a yima kona.

31
Kavaloko Mukuxi a fika, a ku: “Hosi, n'wini wanga a a amukele mahungu layo saseka, hikuva Yehovha u ku rihisele namuntlha emavokweni ya hinkwavo lava ku pfukeleke.”

32
Kutani hosi yi ku eka Mukuxi: “Xana ku rhula ku kona ni ka jaha Abixalomu xana?” Mukuxi a ku: “Valala va hosi, n'wini wanga, ni hinkwavo lava ku pfukeleke hi nsele a va ve kukotisa jaha leri.”

33
Kutani hosi yi twa ku vaviseka ngopfu embilwini, yi khandziyela endlwini leyi nga ehenhla ka nyangwa, kutani yi rila; loko yi ri karhi yi famba, yi vula sweswo yi ku: “N'wananga Abixalomu! N'wananga, n'wananga Abixalomu! Ingi ku file mina ematshan'weni ya wena Abixalomu, n'wananga, n'wananga!”


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012.