Beblia

	Xitsonga (Bibele) 2012 TIPISALEMA 106


Save Notes

1
Dzunisani Yehovha! Dzunisani Yehovha, hikuva u lulamile, Hikuva tintswalo ta yena hi leti nga heriki.

2
I mani la tivaka ku vula mitirho leyi tlakukeke ya Yehovha? La nga ta twarisa ku dzuna ka yena hinkwako xana?

3
Ku katekile lava hlayisaka milawu, Lava endlaka swinene hi mikarhi hinkwayo!

4
Yehovha, ndzi tsundzuke, hikwalaho ka rirhandzu ra wena eka tiko ra wena! U ndzi tela hi ku hlayiseka ka wena,

5
Leswaku ndzi ta vona ku kateka ka vahlawuriwa va wena, Ndzi va ndzi titsakela hi ku tsaka ka tiko ra wena, Ndzi tidzunisa swin'we ni vadyandzhaka va wena.

6
Hi dyohile kukota vatata wa hina, Hi fambile hi ku homboloka, hi endlile leswo biha.

7
Vatata wa hina a va tsundzukanga mahlori ya wena eEgipta, A va anakanyanga ku tala ka mikateko ya wena, Kambe va tiarisa ekusuhi ni lwandle, eLwandle-ro-Tshwuka.

8
Hambiswiritano, a va ponisa hikwalaho ka vito ra yena, Leswaku a ta kombisa matimba ya yena.

9
A tshinya Lwandle ro Tshwuka kutani ri oma; A va fambisa exikarhi ka swidziva, kukotisa exikarhi ka mananga.

10
A va lamulela evokweni ra loyi a va vengeke, Kutani a va lwela evokweni ra nala.

11
Mati ma khubumeta vaxanisi va vona: A ku salanga na un'we.

12
Kwalaho va pfumela marito ya yena, Va yimbelela ku twala ka yena.

13
Kambe va hatlisa va rivala mitirho ya yena, A va tshembanga makungu ya yena.

14
Va ngheniwa hi ku navela emananga, Va ringa Xikwembu laha ku nga akiwiki.

15
Kutani xi va nyika hi ku kombela ka vona, Kambe xi va rhumela ku vabya.

16
A va tshohoka Muxe emixaxeni, Na Aroni, muhlawuriwa wa Yehovha.

17
Misava yi handzuka, yi mita Datani, Yi funengeta ntlawa wa Abirama.

18
Ndzilo wu pfurha exikarhi ka nhlengeletano ya vona, Kutani malangavi ma lovisa lavo biha.

19
Va tiendlele rhole eHorebe, Va khinsamela xifaniso lexi chuluriweke,

20
Ku kwetsima ka vona, va ku hundzula Xifaniso xa homu leyi dyaka byanyi.

21
Va rivarile Xikwembu, mukutsuri wa vona, Lexi endleke swilo leswikulukumba eEgipta,

22
Ni swihlamariso emisaveni ya Hamu, Ni swikombiso leswi chavisaka eLwandle-ro-Tshwuka.

23
Xi vurile leswaku xi ta va herisa, Kambe Muxe, muhlawuriwa wa yena, a va lamulela, Leswaku vukari bya xona byi miyela, va nga ti herisiwa.

24
Va nyenya tiko lero nandziha; A va pfumelanga rito ra xona,

25
Kambe va dzumadzuma emitsongeni ya vona, Va nga yingisanga rito ra Yehovha.

26
Hikwalaho xi tlakusile voko ra xona ehenhla ka vona, Xi hlambanya leswaku xi ta va wisa emananga;

27
Xi cukumeta rixaka ra vona exikarhi ka vamatiko, Xi va hangalasela ematikweni hinkwawo.

28
Va namarhela Baala-Peyori. Va dya tinyama ta swifuwo leswi tlhaveriweke vafi.

29
Va karihisa Xikwembu hi mitirho ya vona leyo biha, Ku fikela ntungu wu nghena exikarhi ka vona.

30
Hi loko Finiyasi a humelela, a rihisela Yehovha, Kavaloko ntungu wu yima;

31
Kutani hi mhaka yoleyo a vuriwa la lulameke, Exikarhi ka tinxakaxaka hi laha ku nga heriki.

32
Va hlundzukisa Xikwembu ematini ya Meriba; Hikwalaho ka vona Muxe a humeleriwa hi khombo,

33
Hikuva va karihisile moya wa yena, Na yena a vulavula hi nomu hi ku hatlisa.

34
Kambe a va herisangi matiko Hi laha Yehovha a va leriseke hakona;

35
Kambe va hlanganile na vona, Va dyondza mikhuva ya vona.

36
Va tirhela swikwembu swahava swa vona, Leswi va khunguvanyiseke.

37
Va tlhavela swikwembu swa mavunwa Vana va vona va vavanuna ni vanhwanyana va vona,

38
Va halata ngati leyi nga riki na nandzu, Ngati ya vana va vona ni vanhwanyana va vona, Lava va va tlhaveleke swifaniso swa Kanana, Kutani misava yi nyamisiwa hi ngati leyi halatiweke.

39
Na vona va tichela hi thyaka hi mitirho ya vona, Ni mitirho ya vuoswi bya vona.

40
Vukari bya Yehovha byi pfurhela tiko ra yena, Ndzhaka ya yena yi hundzuka xilo lexa manyala.

41
A va nyiketa emavokweni ya vamatiko, Kutani va fumiwa hi vavengi va vona,

42
Va xanisiwa hi valala va vona, Va tsongahatiwa ehansi ka mavoko ya vona.

43
Hakanyingi Yehovha u va kutsurile, Kambe vona va tiarisa hi ku tirhandzela makungu ya vona, Kutani va tilahla hi ku biha ka vona.

44
Hambiswiritano a va languta loko va ri eku xanisekeni, A yingisa swirilo swa vona.

45
Kutani a tsundzuka ntwanano wa yena hikwalaho ka vona, A va tsetselela hikwalaho ka tintswalo ta yena letikulu.

46
A va pfuxela tintswalo eka hinkwavo lava va va boheke, Lava ngi va ri vakhomiwa eka vona.

47
Yehovha, Xikwembu xa hina, hi kutsule! Hi hlengelete exikarhi ka matiko, Leswaku hi ta yimbelela vito ra wena leri kwetsimaka, Hi ta tikurisa hi ku ku dzunisa!

48
A ku khensiwe Yehovha, Xikwembu xa Israele, Ku suka eku sunguleni, ku yisa laha ku nga heriki! Tiko hinkwaro a ri vule: “Amen!” Dzunisani Yehovha!


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.