Beblia

	Xitsonga (Bibele) 2012 SWIVURISO 25


Save Notes

1
Swa ha ri swona swivuriso swa Solomoni leswi tsariweke hi vanhu va Hezekiya, hosi ya Yuda.

2
Ku twala ka Xikwembu i ku fihla mhaka; kambe ku yi kambisisa i ku twala ka tihosi.

3
Ku tlakuka ka matilo ehenhla ni ku enta ka misava, Ni timbilu ta tihosi a swi na ku kambiwa.

4
Susa manyelo esilivhereni, Kutani xifuri xi ta endla mbita ha yona.

5
Susa lowo biha emahlweni ka hosi, Xitshamo xa yona xi ta tiyisiwa hi ku lulama.

6
U nga tikurisi emahlweni ka hosi, U nga tshami exitshan'weni xa lavakulu;

7
Hikuva swi nga saseka loko va ku eka wena: “Tlhandlukela halenu,” Ku nga ri loko va ku tsongahata emahlweni ka hosi leyi u yi vonaka hi mahlo.

8
U nga hatlisi ku ya eku tengeni, U nga ti tshuka u nga tivi lexi u nga ta hlamula xona makumu, Loko u kanetiwa hi warikwenu.

9
Hambi u tenga ni warikwenu, U nga boxi makungu ya un'wana,

10
A nga ti tshuka a swi twa, a ku sandza, A ku khomisa tingana leti ku namarhelaka.

11
Marito lama vulavuriweke hi nkarhi Ma kotisa malamula ya nsuku entewaneni wa silivhere.

12
Eka tindleve ta munhu loyi a yingisaka, la layaka hi ku twisisa U kotisa senga ra nsuku ni harhi ya nsuku lowunene.

13
Ntsumi leyi tshembekeke eka lava yi rhumeke Yi kotisa gamboko lero titimela enkarhini wa ku tshovela, Ri titimeta mbilu ya hosi yakwe.

14
La tidzunisaka hi ku hanana ka mavunwa, U kotisa papa ni mheho leyi hungaka, mpfula ku ri hava.

15
Hi ku lehisa mbilu, hosi ya fambisiwa, Ni ririmi ra ku olova ri tshova marhambu.

16
Xana u kumile vulombe? U dya hi mpimo, Kumbe xana u nga kolwa u tlhela u hlanta.

17
U nga toloveli ngopfu ndyangu wa warikwenu, A nga ti kolwa ha wena, a tlhela a ku venga.

18
Munhu la hembaka vunwa ku onha warikwavo, I xigombo, ni fumu, ni nseve wo hlokohla.

19
Xihunguki lexi u xi tshembeke hi siku ra khombo, I tino ro tshoveka ni nenge wo tsekatseka.

20
Ku funungula nguvu hi siku ra xirhami, Ni ku chela ntsuvi ehenhla ka nitra (murhi wa ku leva), I ku tlhavela mbilu ya nhlomulo tinsimu ta ku tsaka.

21
Loko nala wa wena a ri ni ndlala, n'wi he swakudya a dya; Loko a ri ni torha, n'wi he mati a nwa;

22
Ma ta va makala yo hisa u n'wi hlengeletelaka enhlokweni, Kambe Yehovha u ta ku tlherisela.

23
Moya wa dzonga wu humesa mpfula, Ririmi leri tshivelaka exihundleni ri humesa mombo lowo kariha.

24
Ku tiakela emafulelweni ya yindlu, Swi tlula ku tshama endlwini leyikulu ni nsati wa ku leva.

25
Timhaka to nandziha leti humaka etikweni ra le kule, Ti kota mati ya ku tenga eka munhu la karheleke.

26
Xihlovo lexi pfindlusiweke ni lexi onhakeke, Xi fana ni munhu wo lulama la tsekatsekaka emahlweni ka mudyohi.

27
Ku xurha vulombe byo tala a hi swinene, Kutani ku tilavela ku twala a hi ku twala.

28
Munhu la hlulekaka ku fuma mbilu ya yena, I muti lowu ngheniweke hi valala, wu nga ri na rirhangu.


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.