Beblia

	Xitsonga (Bibele) 2012 VAEFESA 1


Save Notes

1
Pawulo, muapostola wa Yesu Kriste hi ku rhandza ka Xikwembu; Eka vakwetsimi va le Efesa lava tiyiseleke eka Yesu Kriste;

2
Tintswalo ni ku rhula a swi ve na n'wina, swi huma eka Xikwembu, Tata wa hina, ni ka Hosi ya hina, Yesu Kriste!

3
A ku khensiwe Xikwembu, Tata wa Hosi ya hina, Yesu Kriste, lexi nga hi katekisa hi ku kateka hinkwako ka Moya eka Kriste, ematilweni ya le henhla,

4
hilaha xi hi hlawuleke eka yena, loko misava yi nga si tumbuluka, leswaku hi kwetsima, kutani hi pfumala xisandzu emahlweni ka xona,

5
hikuva hi rirhandzu ra xona xi hi hlawurile khale ku hi endla vana va xona ha Yesu Kriste hi ku tirhandzela ka vunene bya xona,

6
eku dzunisiweni ka tintswalo to kwetsima ta xona, leti xi hi endleke ha tona lava tsakisaka eka Murhandziwa wa xona,

7
ha yena hi ni ku kutsuriwa hi ngati ya yena, ku nga ku rivaleriwa ka ku dyoha ka hina hi rifuwo ra tintswalo ta xona,

8
leti Xikwembu xi hi tateleke tona hi vutlhari hinkwabyo, ni ku ehleketa hinkwako;

9
xi hi tivisile xihundla xa ku rhandza ka xona, hi ku tirhandzela ka xona, hilaha xi nga tikanelela hakona,

10
leswaku mikarhi leyi vekiweke hi xona, loko yi herile, xi ta hlengeleta hinkwaswo eka Kriste, hambi swi ri swa le matilweni, hambi swi ri swa laha emisaveni.

11
Kambe eka Kriste hi nyikiwile ndzhaka, hilaha hi nga hlawuriwa hakona khale hi makungu ya loyi a tirhaka swilo hinkwaswo hi ku hisekela ka rirhandzu ra yena,

12
leswaku hi ta hanya eku dzuniseni ka ku kwetsima ka yena hina lava tshembeke Kriste eku sunguleni;

13
yeloyi, na n'wina mi nga ka yena, n'wina lava yingiseke rito leri tiyeke, yi nga Evhangeli ya ku hlayiseka ka n'wina, yeloyi kambe, siku mi pfumeleke ka yena, mi funghiweke hi Moya lowo Kwetsima lowu tshembisiweke vanhu;

14
moya lowu, i xirhangana xa ndzhaka ya hina, hi kondza hi kuma ku kutsuriwa ka lava Xikwembu xi tifuweleke vona, ku va eku dzuniseni ka ku kwetsima ka xona.

15
Hikwalaho, na mina, mpfhuka ndzi tweke mhaka ya ku pfumela ka n'wina eka Yesu Kriste, ni rirhandzu ra n'wina eka vakwetsimi hinkwavo,

16
a ndzi tshiki ku khensa hikwalaho ka n'wina; ndzi ri karhi ndzi mi anakanya emikhongelweni ya mina,

17
leswaku Xikwembu xa Hosi ya hina, Yesu Kriste, Tata wa ku vonakala, xi mi nyika Moya wa vutlhari ni wa ku hlavutela, eku tiviweni ka xona;

18
a xi voninge mahlo ya timbilu ta n'wina, mi ta tiva ku tshemba loku nga kona eku vitaniweni ka n'wina ha xona, ni rifuwo ra ku kwetsima ka ndzhaka ya xona, leri nga lunghiseriwa vakwetsimi,

19
mi ta tiva ni vukulukumba lebyi nga hlambanyisiwiki bya matimba ya xona, eka hina vapfumeri, hi mitirho ya matimba ya xona, lama nga tsandziwiki ha nchumu,

20
lawa xi tirheke ha wona eka Kriste, loko xi n'wi pfuxa eku feni, xi vuya xi n'wi tshamisisa evokweni ra xinene ra xona ematilweni,

21
ehenhla ka vukulukumba hinkwabyo, ni ku fuma hinkwako, ni matimba hinkwawo, ni vuhosi hinkwabyo, ni le henhla ka mavito hinkwawo lama nga vuriwaka, ku nga ri emikarhini leyi ntsena, kambe ku ri ka leyi nga ta ta;

22
kutani u vekile hinkwaswo ehansi ka milenge ya yena, a tlhela a n'wi veka ehenhla ka hinkwaswo, ku va nhloko ya Kereke,

23
wu nga miri wa yena, ni ku hetiseka ka loyi a hetisisaka hinkwaswo eka hinkwavo.


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.