Beblia

	FILEMONI 1


Save Notes

1
Pawulo, mubohiwa wa Yesu Kriste, na Timotiya makwerhu; Eka Filemoni, murhandziwa ni mutirhi-kulorhi,

2
na Afiya la rhandziwaka, na Arkipo, nakulorhi eku lweni, ni kereke leyi nga endlwini ya wena;

3
Tintswalo ni ku rhula a swi ve na n'wina, leswi pfaka eka Xikwembu Tata wa hina, ni le ka Hosi Yesu Kriste.

4
Ndzi tlangela Xikwembu xa mina hi masiku loko ndzi ri karhi ndzi ku anakanya emikhongelweni ya mina,

5
hilaha ndzi yingisaka ku pfumela ka wena eka Hosi Yesu, ni rirhandzu ra wena eka vakwetsimi hinkwavo,

6
ndzi kombela leswaku ku hlangana ka ku pfumela ka wena ku tirha hi matimba, hi ku vonisisa leswo saseka hinkwaswo leswi endleriwaka Yesu Kriste eka rikwenu.

7
Ntsena makwerhu, hi ni ku khensa ni ku chaveleriwa lokukulu erirhandzwini ra wena, hikuva timbilu ta vakwetsimi ti rhurhise hi wena.

8
Hikwalaho, hambi ndzi nga pfumeleriwa ngopfu hi Kriste ku ku lerisa leswi fanelaka,

9
hikwalaho ka rirhandzu, ndzi tihlawulele ku ku khongotela, mina ndzi nga Pawulo, mina la dyuhaleke, kambe sweswi ndzi nga mubohiwa hikwalaho ka Yesu Kriste,

10
ndzi khongelela eka wena Onesima, n'wananga, yeloyi ndzi n'wi velekeke ndzi ri ekhotsweni,

11
loyi a nga ku pfunangiki khale, kambe sweswi, u ta ku pfuna ngopfu, kukota leswi a ndzi pfunaka, ndzi n'wi tlherisele eka wena.

12
N'wi amukele, hikuva i ngati ya mina.

13
A ndzi ehleketile ku n'wi sivela, a ta tshama na mina, a ta ndzi tirhela ematshan'weni ya wena eku bohiweni ka mina hikwalaho ka Evhangeli,

14
kambe a ndzi rhandzanga ku endla nchumu, ndzi nga si tiva ku rhandza ka wena, leswaku vunene byolebyo byi nga endliwa hi wena u nga byisiwi, kambe ku va hi ku tirhandzela ka wena.

15
Hikuva kuteloko a avene na wena hi nkarhinyana, a swi ri leswaku kumbe a tlhela a va na wena hi masiku,

16
ku nga ri kukotisa khumbi, kambe a va la tlurisaka khumbi, a va ndzisana leyi rhandziwaka ngopfu hi mina, na wena u nga n'wi rhandza ku tlurisa, hambi enyameni, hambi eHosini.

17
Kutani sweswi, loko u ringanisa leswaku ndzi xaka ra wena, n'wi rhurhele kukota loko ndzi ri mina.

18
Hambi swi ri leswaku u tshama a ku onhela hi nchumu, kumbe u ni nandzu eka wena, swi lave eka mina.

19
Mina Pawulo, ndzi ku tsalela mhaka leyi, hi voko ra mina, ndzi ta ku tlherisela; hambi ndzi nga vuri leswaku u ni nandzu eka mina, wena, hi nhloko ya wena.

20
Ina, makwerhu, a ndzi tsakisiwe sweswo hi wena eHosini.

21
Ndzi ku tsalele sweswo ndzi ri karhi ndzi tivisisa ku yingisa ka wena, kutani ndza swi tiva leswaku u ta endla ni ku tlurisa leswi ndzi swi vulaka.

22
Kambe, na swona, ndzi lunghisele yindlu; hikuva ndza tshemba leswaku ndzi ta tlheriseriwa eka n'wina hi mikhongelo va n'wina.

23
Epafra, la bohiweke na mina hikwalaho ka Yesu Kriste, wa ku rungula,

24
na Marka, na Aristarko, na Demasi, na Luka, vatirhikulorhi.

25
Tintswalo ta Hosi ya hina Yesu Kriste a ti ve ni mimoya ya n'wina!


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.