Beblia

	Xitsonga (Bibele) 2012 2 PETRO 1


Save Notes

1
Simoni Petro, nandza ni muapostola wa Yesu Kriste; Eka lava averiweke ku pfumela loku ringanaka ni ka hina hi ku saseka, eku lulameni ka Xikwembu xa hina, ni le ka Yesu Kriste, Muhlayisi wa hina:

2
Tintswalo ni ku rhula a swi mi talele eku tiveni ka Xikwembu, ni ka Yesu, Hosi ya hina!

3
Hi matimba ya vukwembu bya yena u hi nyikile swilo hinkwaswo, leswi nga swa vutomi ni swa vukhongeri hi ku tiva la hi vitaneke hi ku kwetsima ni matimba ya yena;

4
ha swona hi nyikiwile ku tshembisa lokukulukumba, loko saseka, leswaku hakona mi va ni ku averiwa ka vukwembu, hi ku sukela ku bola loku nga emisaveni hi ku navela.

5
Hikwalaho, na n'wina, mi va ni ku chivirika hinkwako, mi engetela eku pfumeleni ka n'wina, vunene; ni le vuneneni, ku tiva;

6
ni le ku tiveni, ku tikhoma; ni le ku tikhomeni, ku yingisela; ni le ku yingiseleni, vukhongeri;

7
ni le vukhongerini, ku rhandza vamakwenu; ni le ku rhandzeni ka vamakwenu, ku rhandza hinkwavo.

8
Hikuva swoleswi, loko swi ri eka n'wina, swi tele, swi nga ka swi nga mi tshiki mi ri lava lolohaka, ni lava nga vekiki mihandzu eku tiveni ka Yesu Kriste, Hosi ya hina.

9
Hikuva loyi swoleswi swi nga riki eka yena, u file mahlo, a nga voni kule, a va u rivele ku hlantswiwa ka swidyoho swa yena swa khale.

10
Hikwalaho, vamakwerhu, chivirikani ngopfungopfu ku tiyisa ku vitiwa ni ku hlawuriwa ka n'wina; hikuva loko mi endlisa sweswo, mi nga ka mi nga khunguvanyeki ni siku ni rin'we.

11
Hikuva hi mukhuva wolowo, mi ta hiwa ku nghena eku fumeni loku nga heriki ka Yesu Kriste, Hosi ni Mulondzovoti wa hina.

12
Hikwalaho ndzi nga ka ndzi nga tshiki ku mi tsundzuxa hi masiku timhaka leti, hambi mi ti tiva, hambi, na swona, mi tiyile entiyisweni lowu nga kona.

13
Kutani ndzi ringanisa leswaku swa ndzi lulamela loko ndza ha ri entsongeni lowo, ku mi pfuxa hi ku mi tsundzuxa.

14
Hikuva ndza swi tiva leswaku ku rhurha ka mina entsongeni lowo, ku kusuhi, tanihi leswi Hosi ya hina, Yesu Kriste, a nga ndzi kombisa, na yena.

15
Kambe ndzi ta lunghisa leswaku, hambiloko ndzi sukile, mi ta tiva ku anakanya timhaka leti hi mikarhi hinkwayo.

16
Hikuva hi mi tivisile matimba ya Hosi ya hina Yesu Kriste, ni ku vuya ka yena, ku nga ri hi ku landza mitsheketo ya mafenya, kambe swi ri leswaku hi langutile vukulukumba bya yena hi mahlo ya hina.

17
Hikuva u nyikiwile hi Xikwembu Tatana, ku dzunisiwa ni ku kwetsima, siku rito leri ri teke eka yena, ri huma eku kwetsimeni loku tlurisaka, ri ku: “Loyi i n'wananga la rhandziwaka, yeloyi ndzi n'wi tsakelaka!”

18
Na hina, hi ri twile rito lero loko ri hume etilweni, hi ri na yena entshaveni leyo kwetsima.

19
Kambe, na swona, hi ni timhaka ta vaprofeta leti tiyeke hi ku tlurisa, leti mi endlaka swona loko mi ti namarhela, kukotisa rivoni leri voningaka laha ku nga ni munyama, vurhonga byi kondza byi huma, kutani nyeleti ya mixo yi tsuvukela timbilu ta n'wina.

20
Mi ri karhi mi rhanga hi ku tiva leswaku a ku na vuprofeta eMatsalweni, lebyi nga ni ku hlamuseriwa kun'we.

21
Hikuva vuprofeta a byi tisiwanga hi ku rhandza ka munhu ni siku ni rin'we, kambe vanhu va Xikwembu lava hlawuriweke va vurile va ri karhi va susumetiwa hi Moya lowo Kwetsima.


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.