Beblia

	Xitsonga (Bibele) 2012 NHLAVUTELO 1


Save Notes

1
Ku hlavutela ka Yesu Kriste loku a ku nyikiweke hi Xikwembu, a ta tivisa malandza ya yena timhaka leti fanelaka ku humelela sweswi, leti a ti rhumeke hi ntsumi ya yena, a va a ti kombisa Yohane, nandza wa yena,

2
la nga tiyisa Rito ra Xikwembu ni vumbhoni bya Yesu Kriste, swi nga hinkwaswo leswi a swi voneke.

3
Ku katekile la hlayaka ni lava yingisaka timhaka ta vuprofeta lebyi, lava hlayisaka leswi tsariweke kona, hikuva nkarhi wu kusuhi.

4
Yohane eka tikereke ta ntlhanu na timbirhi leti nga eAsiya: Tintswalo ni ku rhula a swi ve na n'wina, swi huma eka Loyi a nga kona, Loyi a a ri kona, Loyi a taka, ni ka mimoya ya ntlhanu na mimbirhi leyi nga emahlweni ka xiluvelo xa yena,

5
ni ka Yesu Kriste, mbhoni leyi tshembekaka, ni mativula exikarhi ka vafi, ni Hosi ya tihosi ta misava!

6
Eka loyi a hi rhandzeke, la nga hlantswa swidyoho swa hina hi ngati ya yena a va a endla tiko ha hina ni vaprista va Xikwembu, Tata wa yena eka yena a ku ve ku kwetsima ni matimba, hi masiku ni masiku Amen!

7
Vonani, wa ta hi mapapa; mahlo hinkwawo ma ta n'wi vona, na vona lava n'wi tlhaveke, kutani tinxaka hinkwato ta misava ti ta tiba swifuva hikwalaho ka yena. Ina, Amen!

8
“Hi mina Alfa na Omega” (ku sungula ni ku hela), ku vula Hosi Xikwembu, Loyi a nga kona, Loyi a a ri kona, Loyi a taka, La nga ni matimba hinkwawo.

9
Mina Yohane, makwenu, ni la averiweke swin'we na n'wina maxangu, ni ku fuma, ni ku tiyisela loku nga eka Yesu, a ndzi ri exihlaleni lexi vuriwaka Patmosi, hikwalaho ka Rito ra Xikwembu, ni hikwalaho ka vumbhoni bya Yesu.

10
A ndzi tekiwile emoyeni hi siku ra Hosi, kutani ndzi twa endzhaku ka mina rito lerikulu kukotisa ra nanga,

11
ri ku: “Leswi u swi vonaka, swi tsale ebukwini, u swi rhumela tikereke ta ntlhanu na timbirhi leti nga eAsiya, le Efesa, ni le Smirna, ni le Pergamo, ni le Tiyatira, ni le Sarda, ni le Filadelfiya, ni le Lawodikiya.”

12
Kutani ndzi rhendzeleka ku vona loyi rito ra yena ri vulavulaka na mina; kuteloko ndzi rhendzelekile, ndzi vona tikandelari ta ntlhanu na timbirhi ta nsuku;

13
kutani exikarhi ka tikandelari, ndzi vona un'wana la fanaka ni N'wana wa Munhu, a ambele nguvu leyo leha, a tibohile xifuva hi vamba ra nsuku.

14
Nhloko ya yena ni misisi ya yena a yi basile kukota voya bya nyimpfu leyo basa, ni kukota gamboko; mahlo ya yena a ma fana ni malangavi ya ndzilo;

15
milenge ya yena a yi fana ni koporo leyi vangamaka, kukotisa loko yi hisiwile ehondweni; rito ra yena a ri fana ni mpfumawulo wa mati layo tala.

16
A a khomile tinyeleti ta ntlhanu na timbirhi evokweni ra yena ra xinene; enon'wini wa yena a ku huma tlhari leri karihaka hi matlhelo mambirhi, mombo wa yena a wu fana ni dyambu loko ri kwetsima hi matimba ya rona.

17
Kuteloko ndzi n'wi vonile, ndzi wela emilengeni ya yena wongi hi loko ndzi file, kutani a veka voko ra yena ra xinene ehenhla ka mina, a ku: “U nga chavi, ndzi Lowo rhanga ni Lowa makumu,

18
ni Loyi a hanyaka; a ndzi file, kutani sweswi, ndza hanya hi masiku ni masiku; ndzi ni mimpfungura ya xivandla xa vafi ni ya rifu.

19
Sweswi tsala timhaka leti u ti voneke ni leti nga kona sweswi, ni leti fanelaka ku ta endzhaku ka leti;

20
xihundla xa tinyeleti ta ntlhanu na timbirhi leti u ti voneke evokweni ra mina ra xinene, ni xa tikandelari ta nsuku, hi xo lexi: Tinyeleti ta ntlhanu na timbirhi, i tintsumi ta tikereke ta ntlhanu na timbirhi; kutani tikandelari ta ntlhanu na timbirhi, i tikereke ta ntlhanu na timbirhi.


Tsonga Bible 2012 Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved.