Beblia

	BAEBELE e e Boitshepo DIANE 17


Save Notes

1
Go molemo thathana e e omeletseng fa e na le boiketlo, bogolo go ntlo e go jelwang dijo tse di tletsetletseng mo go yone, fa go na le komano.

2
Motlhanka yo o dirang ka botlhale o tlaa busa yo e leng ngwana wa kgotla yo o tlhabisang ditlhong, mme o tlaa arogana boswa le bomorwa motho.

3
Pitsa e e tlhaolosang e diretswe selefera, le boubelo bo diretswe gouta, mme Jehofa o leka dipelo.

4
Modirabosula o ela dipounama tsa boikepo tlhoko, le moaki o sekegela loleme lwa basenyi tsebe.

5
Le fa e le mang yo o sotlang mohumanegi o kgoba Mmopi wa gagwe, mme yo o itumelelang tshenyegelo ga a ketla a tlhoka petso.

6
Bana ba bana ke serwalo sa tlhogo sa bagolo, mme kgalalelo ya bana ke borraabo.

7
Puo e e maatlametlo ga e a tshwanela lesilo, bogolo jang dipounama tse di akang ga di a tshwanela kgosana.

8
Neo e ntse jaaka lentswana le le tlhokegang mo matlhong a gagwe yo o nang nayo, le fa e leba kae le kae e ntse e kokotlegela fela.

9
Yo o bipang tlolo o batla lorato, mme yo o toutang sengwe o kgaoganya ditsala tse dikgolo.

10
Kgalemelo e tsena kwa teng ga motho yo o nang le tlhaloganyo, go feta dithupa di le lekgolo mo seeleeleng.

11
Motho yo o bosula o batla tsuololo fela; ke gone ka moo morongwa yo o bolalome o tlaa rongwang kwa go ene.

12
A bera e e gapetsweng bana e kopane le monna, bogolo go seeleele mo boeleeleng jwa sone.

13
Le fa e le mang yo o duelang molemo ka bosula, bosula ga bo ketla bo tloga mo ntlong ya gagwe.

14
Tshimologo ya komano e tshwana jaaka fa motho a kabolola metsi; mme ke gone lesang go tatalalana lo ise lo ye go lwa.

15
Yo o siamisetsang moikepi, le yo o sekisang mosiami, boo babedi ke sefedisapelo mo go Jehofa, ba tshwana fela.

16
Ke ka ntlha yang fa mo seatleng sa seeleele go na le tlhwatlhwa ya go reka botlhale, le mororo se se na tlhaloganyo epe?

17
Tsala e rata motho ka metlha yotlhe, le morwa rra motho o tsaletswe motlha wa pitlagano.

18
Motho yo o se nang tlhaloganyo o opa legofi a ba a nna moemedi wa motho mo ponong ya wa ga gabo.

19
Yo o ratang komano o rata tlolo, yo o godisetsang setswalo sa gagwe kwa godimo o senka tshenyego.

20
Yo o nang le pelo e e lesoko ga a bone molemo ope, le yo o nang le loleme lo lobe, o wela mo bosenying.

21
Yo o tsalang seeleele o go direla go tla a bona bohutsana, le rraaso seeleele ga a na boitumelo bope.

22
Pelo e e ntseng mokete ke kalafo e e molemo, mme mowa o o phatlogileng o omeletsa marapo.

23
Moikepi o ntsha neo mo sehubeng gore a fapose ditsela tsa katlholo.

24
Botlhale bo fa pele ga sefatlhogo sa yo o nang le tlhaloganyo, mme matlho a seeleele a kwa dikhutlong tsa lefatshe.

25
Mosimane yo o seeleele o ledisa rraagwe, o bile o tsosa pelo e e galakang mo go ene yo o mmelegeng.

26
Le gone ga go molemo go betsa mosiami, le fa e le go itaya ba ba tlotlegang ka ntlha ya thokgamo ya bone.

27
Yo o rekegelang mafoko a gagwe o na le kitso, le yo o mowa o o tsididi ke motho wa tlhaloganyo.

28
Le e leng lesilo, motlhang le didimetseng, le kaiwe botlhale, motlhang le momang molomo le kaiwe go re le bonokopela.


Tswana Bible 1992 © Bible Society of South Africa 1992