Beblia

	FILEMONE 1


Save Notes

1
Ke nna Paulo, mogolegwi wa ga Keresete Jesu, ke na le Timotheo mokaulengwe. Ke kwalela Filemone moratwa wa rona, le modiri ka rona.

2
O na le Apefia kgaitsadia rona, le Arekipo motlhabani ka rona, le phuthego e e mo ntlong ya gago.

3
Ka re: Tshegofatso e nne le lona le kagiso, e e tswang Modimong Rraetsho le Morena Jesu Keresete.

4
Ke leboga Modimo wa me ka metlha yotlhe, ke ntse ke go umaka mo merapelong ya me,

5
ka ke utlwela lorato lwa gago, le tumelo e o e supang ka ga Morena Jesu, le ka ga baitshepi botlhe.

6
Ke rapela gore bolekane jwa tumelo ya gago nabo bo tle bo nne le tiro, gore ba itse sengwe le sengwe se se molemo, se se mo go rona ntlheng ya ga Keresete;

7
gonne ke bonye boitumelo jo bogolo le kgomotso mo loratong lwa gago, ka dipelo tsa baitshepi di rudisitswe ke wena, ngwana a rra.

8
Ke gone, le fa ke ne ke ka nna le tshosologo mo go Keresete go go laolela se se tshwanetseng,

9
le fa go ntse jalo, ka ntlha ya lorato bogolo ke go rapela fela, ke le yo o tshwanang le Paulo wa monnamogolo, jaanong ke bile ke le mogolegwi wa ga Keresete Jesu.

10
Ke go rapelela ngwanake, yo ke mo tsaletseng mo dikgolegong tsa me;

11
ke raya Onesimo, yo e rileng gale a bo a se na thuso mo go wena, jaanong o na le thuso mo go wena le mo go nna;

12
yo ke mmuseditseng koo go wena ka sebele sa gagwe, ke go re ke busa pelo ya me tota;

13
yo ke ne ke rata e ka bo ne ne fano ke sa ntse ke na nae, gore a ntirele mo boemong jwa gago, ke le mo dikgoleng tsa Mafoko a a Molemo.

14
Mme ga ke na go dira sepe kwa ntle ga mogopolo wa gago; gore molemo wa gago o se ka wa nna jaaka e kete o a o patelediwa, mme gore o nne wa go itatola ga pelo ya gago fela.

15
Gonne motlha mongwe o ne a kgaogantswe nao ka lobaka, ka ntlha ya gone moo, gore o tle o nne nae ka bosakhutleng;

16
e sa tlhole e le motlhanka, mme go gaisa motlhanka; e le mokaulengwe yo o rategang thata mo go nna, bogolo jang mo go wena, mo nameng le mo Moreneng.

17
Foo, fa o nkaya gore ke monkana wa gago, mo amogele fela jaaka e ka bo e le nna.

18
Mme fa a go senyeditse ka gongwe, kgotsa fa a le molato nao, o tle o se beye kwa go nna.

19
Ke nna Paulo ke kwalang ka seatla sa me, ka re, ke tlaa se lefa, ke sa go reye jaaka le wena ka wesi o le molato sebele sa gago mo go nna.

20
Ee, ngwana a rra, a nke ke bone boitumelo ka ga gago mo Moreneng; rudisa pelo ya me mo go Keresete.

21
E re ka ke ikantse kutlo ya gago, ke a go kwalela, ke ntse ke itse fa o tlaa dira fela o ba o fetisa mo ke go buang.

22
O tle o mpaakanyetse bonno; gonne ke solofetse gore ke tlaa lo neelwa ka merapelo ya lona.

23
Epaferase, mogolegwi ka nna mo go Keresete Jesu, o a go dumedisa.

24
Le Mareko le Arisetareko, le Demase, le Luke, badiri ka nna ba bua jalo.

25
A tshegofatso ya Morena wa rona Jesu Keresete e nne le mewa ya lona. Amen.


Tswana Bible 1992 © Bible Society of South Africa 1992. Used with permission. All rights reserved