Beblia

	Umbundu Bíblia Sagrada OLOSAPO 17


Save Notes

1
Okambu ka kola kumue lombembua ka sunguluka, onjo yeyuka lovilia kumue luyaki, ci sule.

2
Upika o kuete olondunge o tumila omõla a cime caye, nda omõlaco ocisandui, haeye o litepela la vamanjaco ocipiñalo.

3
Opalata oku yeveya, ulu oku totala, kuenje Yehova o pataisa itima.

4
Omunu ũvi o tava kolondaka viesanda; ohembi yi yevelela kelimi lĩvi.

5
U o fuanguila osuke o savula usovoli waye. U o sanjukila ohali yukuavo ka yovoka.

6
Ocifuto cakulu olonekulu viavo; eposo liomãla olosekulu viavo.

7
Olondaka viesunga ka vi lavokaiwa keveke, ca piãla, olondaka viuhembi ka vi sesamela ombuale.

8
Ovitukiko via linga ndosilo ku wa vi eca, kuosi a enda o sumũluha.

9
U ecela ongole o sanda ocisola, puãi ukualombonde o liamuha lekamba liaye.

10
Okulonga ku yevala ca velapo kukualondunge, ocita colombole keveke ci sule.

11
Ukuamanya o sanda lika uyaki, oco vo tumisa omunga ya tema.

12
Oku ñualehela longue ya nyehiwa omãla vayo, hise, oku ñualehela leveke luveke walio, ũvi waco wa kãla.

13
Nda umue o fetuluinya uwa lũvi, ũvi ka u tundi konjo yaye.

14
Okufetika uyaki kua soka loku papula ovava, oco liwekiko osimbu okuliyenja ka kua fetikile.

15
U o yovuisa ondingaĩvi lu o pisa ondingesunga, kavali kavo Yehova o va nyale.

16
Peka liaveke pa kalela nye olombongo vioku landa olondunge, lutima ka kuete pua?

17
Ekamba li sola olonjanja viosi, kuenje li linga manjove koloneke viohali.

18
U wa kamba olondunge o likuminya lonjanga, kuenje o likapa uvangi kovaso ukuavo.

19
U o sole uyaki o sole ovama, lu o lepisa ombundi yaye o sanda oku nyõlẽha.

20
Ukuotima welimbi ka sangi uwa; tikuelimi liuhembi o mõla ongongo.

21
Omõla eveke eye esumuo lia so yaco; so yocitumbefe ka kuete esanju.

22
Utima wa sanjuka ovihemba viwa; utima wa nyumãla u kukutisa akepa.

23
Ondingaĩvi yi tambula ocitukiko, ha pengisa olonjila viesunga.

24
Ukuoloño imba ovaso kocimaho colondunge, eveke puãi limba ovaso aye kuosi kasukiyo olofeka.

25
Omõla eveke eye esumuo lia so yaco, haeye ondulu ya inaye wo cita.

26
Oku fetisa ukuesunga ovimbu kaciwako; oku tipula olombuale via sunguluka hesungako.

27
Ukuakukandangiya olondaka viaye eye wa lunguka; u wa tula utima eye ukualondunge.

28
Ndaño eveke nda li uha li tendiwa ndukualondunge; eci a muniha komẽla, vati, Wa lunguka.


Umbundu Bíblia Sagrada Umbundu Bible © United Bible Societies, 1963