Beblia

	Umbundu Bíblia Sagrada OLOSAPO 23


Save Notes

1
Eci o tumãla poku lia lombiali, limbuka lolondunge eci ci kasi kovaso ove.

2
Likalula anguli nda wa sapa.

3
Ku ka livele ovilia viaye vi sõsa, momo vielimbi.

4
Ku ka likavise no oku mõla ukuasi. Liwekako. Kuata olondunge.

5
Tuli ovaso ove a u mõla, wa tila, ocipikipiki wa lilulikila avava, wa palalela kilu ndongonga.

6
Ku ka lie kombolo yofufi; ku ka livele ovilia viaye vi sõsa.

7
Momo wa soka ndumue o sokolola vutima, haeye o ku pañinya hati, Lia, nyua,— haimo utima waye ka u kasi love.

8
Okambu wa lile o ka sanja, kuenje o pesela olondaka viove vi sõsa.

9
Ku ka vanguile kovaso eveke, momo o tomba olondunge violondaka viove.

10
Ku ka sondolole ulilo wonahũlũlua, pamue oku tepulula kovapia olosiwe.

11
Momo pakisi yavo wa kola, eye o funda love ondaka yavo.

12
Kapa utima wove kalungulo, lovatui ove kolondaka violondunge.

13
Ku ka liweke oku pindisa omõla, ndaño u veta lombueti ka fi.

14
Nda u veta lombueti, o popela omuenyo waye konjembo.

15
Amõlange, nda utima wove wa lunguka, lamevo utima wange u sanjuka.

16
Ocili, utima wange u yolela, eci omẽla wove u vangola evi via sunguluka.

17
Utima wove ka u ka livele olonjila violondingakandu. Kuamelela vusumba wa Yehova otembo yosi.

18
Momo nda oco, ku kala onima, lelavoko liove ka li nyõlẽha.

19
Yevelela amõlange, kuata olondunge; suñamisa utima wove vonjila yesunga.

20
Ku ka kale pokati kolohõlua, ndaño pokati kovisapanu violositu,

21
oholua locilianu vi mõla uputu. Ayele a walisa omunu ovindambu.

22
Pokola ku so wa ku cita; ku ka lavise nyoho eci a kuka.

23
Landa esunga, ku ka li landise vali; landa olondunge lalungulo luloño.

24
So yondingesunga o yolela muẽle; u wa cita ukualondunge u sanjukila.

25
Sanjuisa so la nyoho; u wa ku cita a yolele.

26
Amõlange, nyihe utima wove; ovaso ove a lavulule olonjila viange.

27
Momo elãsãla okueve kua longa, ukuovaisi ocisimo ca sukatela,

28
o lavakaila ndocimunu, o luisa vakuevĩho pokati komanu.

29
Elie o litetela? Elie o lisiõsiõla? Ukuavama helie? Elie o likekemba? Elie wa asiwa olongase olivova? Elie ukuavaso a kusuka?

30
Ovo vana va tumãla osimbu lovinyu, vana va nyuanyua ovinyu via tengiwa.

31
Ku ka vanje ovinyu eci vi kusuka, eci vi tutuma vokopo, leci vi feloka ocili.

32
Kefulilo vi lumana ndonyoha, vi lumana muẽle ndenyenya.

33
Vovaso muiya ovingoingoi; utima wove u tana tana evi viesanda.

34
O linga ndomunu wa pekela pokati kokalunga, pamue ndu wa tumãla kongunji yonaviyu

35
O popia huti, Va mbeta puãi ka ca mbalele; va nota olombole puãi sia ci yevele.

36
Otembo yipi masuka si vi sandi vali?


Umbundu Bíblia Sagrada Umbundu Bible © United Bible Societies, 1963