Beblia

	Umbundu Bíblia Sagrada HOSEA 2


Save Notes

1
Tukula manjove ulume huti, Omanuvange, kuenda manjove ukãi huti, Wasangohenda.

2
Livondeli la nyõho,— momo eye hokãi wangeko, ndaño ame, si veyayeko—livondeli muẽle, okuti eye upa upuepue kocipala caye, kuenda onambo yuvaisi kavele aye,

3
sanga ndu sũlũla, ha kala ndeci a kaile eteke a citiwa, sanga ndu lingisa ekalasoko loku u sokisa lekango okuti o fa lenyona.

4
Ndaño omãla vaye si va kuatela ohenda momo omãla vupuepue.

5
Momo inaco wa limba kupuepue. U wa va cita ka kuete osõi. Momo hati, Ngenda ku vambaisi yange, vana va nyihãiha ombolo lovava, luwalo wange wovonya olomeme, lowu welinyu, lulela, levi viange vioku nyua.

6
Oco sitika onjila yaye lolosongo, loku umbako ongumbo, okuti ka sangi vali olonjila viaye.

7
O landula vambaisi yaye puãi ka va sangi. O va sanda puai ka va mõli. Oco o popia, hati, Ngenda niukila ku veyange watete, momo nda kaile ciwa, ndeci ñasi ci sule.

8
Puãi eye ka ci kũlĩhĩle okuti ame, ame ndo muĩsa muĩsa olomema lovinyu lulela, haime ndo luisila opalata lulu, vina va lumbaile ku Baale.

9
Oco si eci vali olomema viange lovinyu viange kuvo wavio. Kuenda ovonya olomema lelinyu liange, vina a si oku liwalisa lavio, ndu vi upa.

10
Oco situluila evĩho liaye kovaso a vambaisi yaye, kuenje lomue u popela peka liange.

11
Nyimũla esanju liaye liosi, lolofesta viaye viefendelo, levi violosãi, lasambata aye, kuenda olofesta viaye vina via kũlĩhĩwa.

12
Ñundula uyuva waye lukuyu waye, vina a tukula, hati, Evi olombanjaile viange vambaisi yange va nyĩhãiha. Ndi vi lingisa usitu, kuenje ovinyama viovusenge vi vi lia.

13
Ndu fetuluinyila oloneke violofesta vioku timãhãila Baale insensu, cina a liposuisa lovimbilingu lolomota viaye kuenje wa landula vambaisi yaye, ame puãi wa njivala. Oco ca popia Yehova.

14
Oco ndu tamba. Ndu tuala kekalasoko. Mbangula laye loku omboka.

15
Ndu wĩha vali oviumbo viaye viayuva, locimbota ca Akore ndi ci pongolola uvelo welavoko. Oko eye a nambuluila ndeci a nambuluile eci a kaile umãlẽhe, leci a kaile kotembo yoku tunda ke Egito.

16
Yehova hati, Eteke liaco o nukula huti, Veyange. Ku nukula vali huti, Baale yange.

17
Momo njupa vomela waye olonduko via va Baale okuti ka vi tukuiwa vali londuko.

18
Eteke liaco hu inãlĩsa lovinyama viovusenge lolonjila viovilu kuenda evi vi yaila posi. Vofeka nyimũlamo ohonji losipata lovita. Hu tumãlĩsa ciwa oko kua koka.

19
Kuenje hu kuela. O kala lame otembo yosi. Hu kuela lesunga locili locisola kuenda ohenda.

20
Hu kuela muẽle locili, kuenje ove o kũlĩha Yehova.

21
Kuenje Yehova hati, Eteke liaco ame nambulula ciwa ovailu; lovailu a tambulula ciwa ongongo;

22
longongo yi tambulula ciwa otiliku lovinyu lulela; kuenje ovio vi tambulula ciwa Yesirele.

23
Eye ndu likũlĩsila ame muẽle vofeka. Ndingila ohenda Kasangiohenda, Mopia la Hamanuvangeko, siti, Vumanu vange. Leye o nukula hati, Ove vu Suku yange.


Umbundu Bíblia Sagrada Umbundu Bible © United Bible Societies, 1963