Beblia

	FILEMONE 1


Save Notes

1
Ame ndi Paulu, haime nda lingila Yesu Kristu omandekua, kuenda manjetu Timoteo, Tu sonehela manjetu wa soliwa Filemone haeye o kasi pamosi letu vupange umosi,

2
la mukãi wetu Afia, kuenda ukuetu kusualali wa Kristu, Arkipo, lekongelo li ongolokaila vonjo yove.

3
Ocali ci kale lene kuenda ombembua yi tunda ku Suku Isietu lo ku Ñala Yesu Kristu.

4
Mandola Suku olonjanja viosi eci hu ivaluka loku ku tukula volohutililo viange.

5
Hu panduila omo njeva njeva ocisola cove, lekolelo o kuetele Ñala Yesu lolosandu viosi.

6
Ndi likutalaila okuti utima wove woku kuatisa vakuẽle letavo liove wamisako ocili ukũlĩhiso wetu wasumũlũho a sangiwa vu Kristu.

7
Momo a manjange, ocisola cove ci sanjuaisa ca lua, haico ci ndembalaeka omo ovitima violosandu vi tumbuluaiwa love.

8
Oco, ndaño vu Kristu ñuete utõi woku ku handeleka okuti o linga eci ca sesamela,

9
haimo, omo tua kolela ocisola, oco nda nolapo oku ku livondela. Ame ndi Paulu, haime ndikongo, haime nda linga omandekua ya Kristu Yesu,

10
ñasi loku ku livondelela omõlange Onesimo, onduko yaco ya lomboloka Silivila. Ndo citila vumandekua wange.

11
Ale, ka silivilile kokuove, cilo puãi o silivila kokuove kuenda kokuange.

12
Ñasi loku u tiula kokuove, kuenje ca soka ndoku ku tumisa utima wange muẽle.

13
Ame nda nda sanjukila oku kala laye okuti o mbumba nda Katumua kove osimbu ñasilili ondaka yiwa vokayike.

14
Puãi sia yonguile oku linga cimue te ove muẽle wa tava. Nda yongola okuti ohenda yosi o linga ka yi lingiwa ño ocikukui, puãi yi tunda kutima wove.

15
Mbi oco ca sokiyiwila okuti o litepa love otuneke tumue, okuti eci a tiuka vali kokuove ove o kala laye oloneke ka vi pui.

16
Haku kalako vali ndupika, puãi o velapo upika okuti o linga manjove wa soliwa. Kokuange muẽle wa linga manjange, puãi ca piãla kokuove, momo o linga manjove vetimba kuenda vu Ñala.

17
Oco, nda wa nenda ame ndukuẽle ketavo, u tambula ndomo nda wa nambula ame.

18
Nda wa ku linga cĩvi, pamue o kuete ofuka love, ci soneha okuti ame ndi ci feta.

19
Ame ndi Paulu, soneha leka liange muẽle siti, Ndi ci feta. Si ku ivaluisa okuti ove wa ndevala cosi ndaño omuenyo wove.

20
A manjange, mopia ocili siti, Ndi livela oku sanga okusilivila kumue kokuove vu Ñala. Tumbuluila utima wange vu Kristu.

21
Omo nda kolela epokolo liove oco nda ku sonehelela. Nda kũlĩha okuti o linga eci ca velapo vali, eci ñasi loku popia ci sule.

22
Kuenda vali, ngangiliyile ohondo, momo ñasi lelavoko okuti, mekonda liolohutililo viene, ngeciwa kokuene.

23
Manjange Epafra, haeye omandekua kumue lame vu Kristu, wa tuma oku ku lama.

24
Marko layevo kuenda Aristarko la Dema la Luka, haivo vakuetu vupange, va tumavo ovilamo.

25
Ocali ca Ñala yetu Yesu Kristu ci kale lovitima viene. Amene.


Umbundu Bíblia Sagrada Umbundu Bible © United Bible Societies, 1963