Beblia

	Umbundu Bíblia Sagrada HEVERU 12


Save Notes

1
Oco letuvo, omo tua ñualiwa lelende linene ndeli liolombangi, tu liupi ovinjangatela viosi, lekandu li tu tanga tanga, kuenje tu lupuki lepandi okulitunda tu kasi lakuo.

2
Eci tu lupuka tu tulukili ku Yesu, u wa linga usovoli wekolelo lietu, haeye wa mala oku li suisapo. Eye, mekonda liesanju lio kapiwila kovaso, wa pandikisa oku tala ohali yekulusu, wa pembula osõi, kuenje cilo wa tumala kondio yocalo ca Suku.

3
Sokololi u wa likolisila oku tẽla esuvu vakuakandu vo suvuka lalio. U sokololi okuti, ka vu kuata ekavo ndaño oku leñela vovitima viene.

4
Vuyaki wene woku liyaka lakandu, ka wa yakeli handi toke osonde ya tunda.

5
Kuenda vali, wa ivaliko hẽ elungulo liu lunguli ndomãla, liti, Amõlange, ku ka lavise epokuiso lia Ñala, ndaño oku leñela eci o yambuiwa laye.

6
Momo Yehova o pokuisa u a sole, kuenje o tipula omõla wosi a tenda ndomõlaye.

7
Ohali yosi vu pandikisa layo yi tendiwe ndoku pindisua. Suku o kasi loku linga lene ndeci onjali yi linga lomãla. Momo omõla u pi isiaye ka pokuisa?

8
Nda ka vu pindisiwa ndeci vosi va pindisiwa, ca lomboloka okuti vumãla voku lumbula, havumãla vociliko.

9
Kuenda vali, tua kala la vaisietu va palo posi, va tu pokuisa kuenje tua va sumbila. Ka ca tu sesamelele hẽ ca piãla oku pokola ku Isia yaspiritu ha tu moli omuenyo?

10
Vaisietu va palo posi va tu pokuisa oloneke viñamiñami lika ndeci ca va sungulukila. Eye puãi, o tu pokuisila oku tu kuatisa okuti tu iñila vokukola kuaye.

11
Epokuiso liosi tete ka lia sokele ndesanju, te ndesumuo, noke li imila ava va pindisiwa lalio epako liombembua lesunga.

12
Oco, katuli ovoko a leñela, kolisi olongolo via yonga.

13
Angiliyili olomãi viene olonjila via miuha, okuti eci ca lemãla ka ci sokoluiwa puãi ci veluisua.

14
Kolisiko oku kala lombembua lomanu vosi. Sandiliyi okukola momo lomue o mola Ñala nda ka ku kuete.

15
Lavululi sanga umue o lipumbisa ohenda ya Suku. Kali lutate sanga olumbombo lumue lu koka oku lula lu yova, kuenje lu tatamisa, okuti va lua va vĩhisua laluo.

16
Lavululi sanga umue o linga ukuokahonga, pamue ukuetombo ndeci Esau, u wa landisila unuñulu waye oku lia onjanja yimuamue.

17
Momo vu ci cokuti noke, eci a yongola oku piñala esumũlũho liaco, wa pañuiwa, momo ka muile evelo lioku likekemba ndaño wa li sanda lasuelela.

18
Momo ene ka wa pitilili komunda yi tẽla oku lambiwa, pamue kondalu yi taima, pamue oku tekava, pamue owelema, pamue ehunguhungu,

19
pamue ondaka yenguena, pamue ondaka yoku popia ya lingisa usumba ava va yi yeva, toke va pinga okuti ka va yevi vali cimue.

20
Momo ka va tẽlele eci ca handelekiwa okuti, ndaño ocinyama, nda ci lamba komunda, ci sosuiwa lovawe.

21
Owima waco wa linga usumba okuti Mose wa popia hati, Ame ñasi lusumba wa lua, loku luluma.

22
Ene puãi wa pitili komunda Siono, kuenda kimbo lia Suku o kasi lomuenyo, okuti ko Yerusalãi yokilu. Wa pitili kovangelo ka va tendiwa vongolokela ofesta.

23
Wa pitili kohongele yolonuñulu via sonehiwa kilu, kuenda ku Suku onganji ya vosi. Wa pitili kovilelembia via vakuesunga va puisua eko,

24
kuenda ku Yesu, Kapitiya kocisila cokaliye, lo kosonde ya nyiliwa haiyo yi popia ca velapo, ya Abel ci sule.

25
Lunguki okuti ka vu pukula u o kasi loku popia. Momo ovo, nda ka va pulukile eci va pukula una wa va lungula kulo kilu lieve, etu ca piãla enene, ka tu puluka nda tu sia u o kasi kilu haeye o kasi loku tu lungula.

26
Koloneke viaco ondaka yaye ya lulumisile osi, cilo puãi wa likuminya hati, Ndi lulumisa vali onjanja yikuavo hasiko lika, puãi lilu le.

27
Kuenje ondaka yaco, onjanja yikuavo, ya lomboloka okuimuha kuovina vi tẽla oku lulumisua, ndokuti vievi via lulikiwa ño. Vimuha okuti ovina ka vi lulumisua vi kala hũ.

28
Oco, tu imbi olopandu omo tua tambula usoma ka u lulumisua. Tu fendeli Suku lefendelo lia sunguluka, kuenda lesumbilo loku liuvika,

29
momo Suku yetu ondalu yelisi.


Umbundu Bíblia Sagrada Umbundu Bible © United Bible Societies, 1963