Beblia

	Umbundu Bíblia Sagrada TIAGO 1


Save Notes

1
Ame ndi Tiago, haime ndukuenje wa Suku kuenda wa Ñala Yesu Kristu, Ndi sonehela apata ekui la a vali a sandoka. Kalungi!

2
A vamanji, eci vu nyikiwa lolohali viñi viñi, ci sanjukili,

3
momo wa kũlĩhi okuti, nda ekolelo liene li nyikaiwa, cu kokeli epandi.

4
Oco epandi liaco liene li male upange walio, okuti vu kanguka, loku suapo, kuenje lacimue cu kambeli.

5
Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.

6
Puãi a pinge lekolelo, oku tatãla hakoko, momo u o tatãla wa soka ndapuku okalunga a pungua lofela, hao a pekuiwa.

7
Omunu waco ka ka kolele okuti,

8
omunu ukuavitima vivali, haeye ukuakutatayala volonjila viaye viosi, o tambula cimue ku Ñala.

9
Omunu o sule a lipande eci a kemalisua,

10
lohuasi yi lipande eci yi ketisua, momo uwuka ndoneleho yovusenge.

11
Momo ndeci ekumbi li tunda lowuya kuenje li kukutisa ovisenge, okuti oneleho yi loluka, leposo liayo li nyõleha, haico ohuasi yi sekala pokati kasakalalo aye.

12
Omunu o pandikisa lohali wa sumũlũha, momo, eci a yula, o tambula ekolowa liomuenyo lina Suku a likuminya oku eca kuava vo sole.

13
Umue, nda wa yonjiwa, ka ka popie hati, Nda yonjiwa la Suku, momo Suku ka yonjiwa leci cĩvi, kuenda vali, ka yonji umue.

14
Puãi omunu omunu o yonjaiwa eci a tambiwa loku kokiwa loloñeyi viaye muẽle.

15
Oloñeyi, eci vi mina, vi cita ekandu, lekandu, eci li kula, li cita okufa.

16
A vamanji va soliwa, ko ka kembiwi.

17
Ocali cosi ciwa longavelo yosi ya kanguka via tunda kilu, ku Isia yovinyi. Kokuaye ka kuli oku pongoloka ndaño okuñualapo ku nena undembo.

18
Ocipango caye muẽle a tu cita londaka yocili. Wa tu citila okuti tu linga apako atete ovilulikilo viaye.

19
Eci ci limbuki, a vamanji va soliwa. Omunu omunu a kale lutima woku yevelela, a livale oku popia, a livale konyeño,

20
momo onyeño yomunu ka yi koki esunga Suku a yongola.

21
Oco, imbipo evĩho liosi lahuku a kula lonjanga. Tambuli lumbombe ondaka ya kũliwa, haiyo yi tẽla oku popela ovimuenyo viene.

22
Lingi vakuakulinga ondaka, vakuakuyeva lika, haivo va likembisa ño, hacoko.

23
Momo u o yeva ño ondaka puãi ka yi lingainga, wa lisoka lomunu wa livanjela volumuilo ocipala a citiwa laco,

24
omo o livanjelamo, kuenje enda. Tuli a tunda, ndeci a kala co limba.

25
Puãi, u o vanja vanja sui vocihandeleko ca kanguka, haico ceca umãmãle, kuenje o pandikisa laco okuti ka lingi ukuakuyeva lika loku ivala, o linga puãi ukuakulinga, eye o sumũlũisua lokulingainga kuaye.

26
Nda umue wa soka hati, Ndukuetavo, puãi ka kapi olelia kelimi liaye, kuenje o kembisa utima waye, etavo liomunu waco liesanda.

27
Etavo liocili, hailio lia pua evĩho kovaso a Suku haeye Isia, lieli okuti, oku pasula ovimbumba lolosiwe kolohali viavo, loku lilava keliño lioluali.


Umbundu Bíblia Sagrada Umbundu Bible © United Bible Societies, 1963