Beblia

	Umbundu Bíblia Sagrada ESITULUILO 1


Save Notes

1
Elivulu eli esituluilo lia eciwa la Suku ku Yesu Kristu. Wa li eca oku lekisa kakuenje vaye ovina vi laika oku iya ndopo. Wa tuma ungelo waye oku vi situluila kukuenje waye Yoano.

2
Evi Yoano a vi imbila uvangi, vievi: Ondaka ya Suku, luvangi wa Yesu Kristu, kuenda cosi a mola.

3
U o tanga olondaka viowanji ulo, lava vi lomboloka kuenje va pokola kuevi via sonehiwamo, vosi yavo va sumũlũha. Momo otembo yaco yi kasi ocipepi.

4
Ame ndi Yoano ndi sonehela akongelo epanduvali a kasi ka Asia. Kokuene ku kale ocali lombembua yi tunda kundeti o kasi, haeye wa kala ale, kuenda iya, haiyo yi tunda kaspiritu epanduvali a kasi kovaso yocalo caye,

5
kuenda ku Yesu Kristu, eye ombangi yocili, haeye nuñulu yava va fa, kuenda eye ombiali yolosoma viokilu lieve. Ku-u o tu sole kuenje wa tu pandulula kakandu etu losonde yaye,

6
haeye wa tu muisa usoma okuti tua linga ovitunda via Suku Isiaye, kokuaye ku kale ulamba luviali oloneke vi enda ño-o hũ. Amene.

7
Ota, iya. Endela valende, kuenje ovaso osi o mola, ndaño ava vo toma, lapata osi o kilu lieve o litetelela. Omo muẽle. Amene.

8
Ame Tete haime Kuasula. Oco ca popia Ñala Suku, u o kasi haeye wa kala ale, kuenda iya, eye Tõlo.

9
Ame ndi Yoano, haime manjene, haime ndi linala lene kohali lo kuviali lo kepandi lia Yesu, ame nda kala omandekua kocifuka ca Patmo mekonda liondaka ya Suku, lomo nda imbila Yesu uvangi.

10
Nda kala ve Espiritu eteke lia Ñala. Nda yeva konyima yange ondaka yinene, huti ño yolumbeta, ya linga yiti,

11
Eci o mola ci soneha velivulu. Ci tuma kakongelo epanduvali, ke Efeso, lo ko Smurna, lo ko Pergamo, lo ko Tuatera, lo ko Sardesi, lo ko Filadélfia, lo ko Laodikea.

12
Oco nda pukuka oku vanja kondaka ya popia lame. Eci nda pongoloka nda mola epanduvali liolovela viulu.

13
Pokati kolovela pa kala umue wa setahala omõla omunu, wa wala okapote ka sovi toke kolomãi, wa litika vonulo luvia wulu.

14
Utue waye u yela ndovonya omeme a yela ndocikokoto, haico ocifuko caye. Ovaso aye a moleha ndulienge wondalu.

15
Olomãi viaye via setahala osipi yi nina, huti ño va yi yeveya. Ondaka yaye ya soka ndocileñi covava a lua.

16
Peka liaye liondio pa kala olombungululu epanduvali. Komẽla yaye kua tunda osipata ya tua nelembali. Ocipala caye ca moleha ndokutua kuekumbi pongunji.

17
Eci ndo mola nda kupukila posi kolomãi viaye ndu wa fa. Eye puãi wa ndamba londio yaye, hati, Ku ka yokoke ño. Ame Tete, haime Kuasula,

18
haime ñasi lomuenyo. Nda file kuenje cilo ñasi lomuenyo woloneke ka vi pui, haime ñuete olosapi viokufa levi vionjembo.

19
Oco, soneha eci o mola, leci ci kasi, leci ci laika oku iya noke.

20
Elomboluilo lielumbu liolombungululu epanduvali, evi wa muila kondio yange, lolovela epanduvali viulu, lieli, Olombungululu epanduvali ovio ovangelo vakongelo epanduvali, olovela epanduvali ovio akongelo aco epanduvali.


Umbundu Bíblia Sagrada Umbundu Bible © United Bible Societies, 1963