Beblia

	Wolaytta Bible 2004 Leemiso 106


Save Notes

1
GODAA galatite! I keha gidiyo gishshaunne aggenna a siiqoi merinaagaa gidiyo gishshau, GODAA galatite.

2
GODAI oottido wolqqaama oosuwaa yootanau, woikko a galataa ubbaa qonccissanau danddayiyai oonee?

3
Pirddaa naagiyaageetinne ubbaton xillobaa oottiyaageeti anjjettidaageeta.

4
Abeet GODAU, neeni ne asaassi kehiyo wode, tanakka qoppa; eta neeni ashshiyo wode, taayyookka alla.

5
Hegeenne, ne doorido asaayyo sa7ai kehin, taani be7anaadaana, ne asaa ufaissaa taanikka ufaittanaadaananne neegeetuura issippe taanikka galatanaadaana.

6
Nuuni nu aawatudan nagaraa oottida; moorobaanne iitabaa oottida.

7
Nu aawati Gibxxen de7iyo wode, ne maalaalissiya oosuwaa qoppibookkona. Aggenna ne siiquwaa darotettaa eti hassayibookkona; Zo7o Abbaa lanqqiyan Ubbaappe Xoqqiya Xoossaa bolli makkalidosona.

8
Gidikkokka i ba sunttaa gishshau, ba gita wolqqaa erissanau eta ashshiis.

9
I Zo7o Abbaa azazin, abbai meliis; bazzuwan kaalettiyoogaadan, ciimmaa giddoora eta kaalettidi pinttiis.

10
Pinttidi i eta ixxiyaageetu kushiyaappe ashshiis; morkketu kushiyaappe eta woziis.

11
Eta morkketa haattai mittiis; etappe issoinne attibeenna.

12
He wode Israa7eelati a qaalaa ammanidosona; a sabbidosona.

13
Gidikkonne, eti i oottidoogaa sohuwaarakka dogidosona. A zoretaa naagennan bantta koyidoogaa oottidosona.

14
Bazzon de7iiddi, eti qumaa daroppe amottidosona; qassi Xoossaa paaccidosona.

15
Hegaadan i eti woossidoogaa immiis; shin iita harggiyaa eta giddo kiittiis.

16
Asati bazzon bantta dunkkaaniyan de7iiddi, Muusanne GODAASSI dummatida ashkkaraa Aaroona qanaatido wode,

17
biittai dooyettidi Daataana mittiis; Abiiraama a keetta asatuura moogiis.

18
Qassi eta maabaraa giddon tamai eexxin, lacoi he iita asata xuuggiis.

19
Koreba Deriyan de7iiddi, worqqaa seerissidi maraa misiliyaa medhdhidosona; medhdhidi he misiliyaayyo goinnidosona.

20
Eti Xoossaa bonchchuwaa maataa miya miizzaa misiliyan laammidosona.

21
Eti banttana ashshida Xoossaa dogidosona; i Gibxxen gita oosuwaa,

22
Kaama biittan maalaalissiyaabaanne, Zo7o Abban, “Hoola!” giissiyaabaa oottidaagaa.

23
Hegaa gishshau, Xoossai eta xaissana giis; shin xaissenna mala, a hanqquwaa zaaranau, Xoossai doorido Muusee gidduwan eqqiis.

24
Hegaappe guyyiyan, eti a qaalaa ammanenna gishshau, he lo77o biittaa karidosona.

25
Eti bantta dunkkaaniyaa giddon zuuzummidosonanne GODAA qaalaayyo azazettibookkona.

26
Hegaa gishshau, i eta bazzon xaissanaagaa, eta zerettaa kawotettatu giddon laalanaagaanne biittan sa7an eta bete kessanaagaa ba kushiyaa denttidi caaqqiis.

27
Hegaappe guyyiyan, eti Pa7ooran de7iya Ba7aala eeqaayyo goinniyaageetuura issippe gaittidosona; shemppoi bainna eeqatuyyo yarshshettida yarshshuwaa miidosona.

28
Eti bantta oosuwan GODAA hanqqetissidosona; hanqqetissin eta giddon iita harggee wodhdhiis.

29
SHin Piinihaasi denddidi, eta mooruwaa pirddin, iita harggee eta bollaappe kichchiis.

30
Hegeenne, yeletaappe yeletaa gakkanaassi merinau ayyo xillotetta gididi qoodettiis.

31
Mariiba pulttuwaa matan GODAA hanqqetissidosona; eta gaasuwan Muuse bolli metoi gakkiis.

32
Aissi giikko, eti a yiilloyidosona; yiillotin Muuse doonaappe bessenna qaalai kiyiis.

33
GODAI xaissite gin, eti Kanaane asata xaissibookkona.

34
He palaappe, eti he asatuura geletti ehettidi, walahettidosonanne; eta de7uwaa wogaa kaallidosona.

35
Xoossaa asati eta eeqaassi goinnidosona; hegeenne, etau pire gidiis.

36
Eti bantta attumanne macca naata xalahetayyo yarshshidosona.

37
Eti xillo suuttaa, Kanaane eeqatuyyo yarshshido bantta attumanne macca naatu suuttaa gussidosona; he suuttan biittai tuniis.

38
Hegaadan eti bantta oosuwan tunidosonanne shaaramuxadan eti bantta Xoossaassi ammanettennan ixxidosona.

39
Hegaa gishshau, GODAA hanqqoi a asaa bolli eexxi kiyiis; i baageeta shenetiis.

40
I eta hara dere asatu kushiyan aattidi immiis; eta ixxidaageeti eta haaridosona.

41
Eta morkketi eta naaqqidosonanne bantta sheniyan aissidosona.

42
I eta daroto ashshiis; shin eti makkalaayyo gixxidi kiyidosona; bantta nagaraa gaasuwan xayidosona.

43
Gidikkonne, i eti waassido waasuwaa siyidi, eta waayiyaa qoppiis.

44
I eta gishshau, ba maachchaa hassayiis; aggenna ba siiquwaa daruwaadan eta maariis.

45
Eta omooddida ubbai etau qarettanaadan oottiis.

46
Abeet GODAU, nu Xoossau, nuna ashsha. Nuuni ne geeshsha sunttaa galatanaadaaninne ne bonchchuwan ceeqettanaadan, kawotettatu giddoppe nuna shiishsha.

47
GODAI, Israa7eela Xoossai merinaappe merinaa gakkanaayyo galatetto! Asai ubbai, “Amin77i!” go. GODAA galatite!


Wolaytta Bible 2004 Copyright (SIM) 2004