Beblia

	Wolaytta Bible 2004 Proverbs 17


Save Notes

1
Ooshshai de7iyoosan de7iya gita gibiraappe saroinne woppai de7iyoosan mela oittaa poquwaa miyoogee keha.

2
Cincca ashkkarai ba godaa na7aa pattenna laafaa haarees; yaatidi ishanttuura issippe laattees.

3
Worqqainne birai taman paacettiyoogaadan, GODAI asaa wozanaa paaccees.

4
Iita asi iita uraa haasayaa siyees; worddanchchaikka genanchchaa oduwaa ezggees.

5
Hiyyeesatu bolli qilliicciya asi eta medhdhida Xoossaa cayees; hara asa gakkiya metuwan ufaittiya asi qaxxayettennan attenna.

6
Naatu naati cimida asatuyyo kallachcha; aawati bantta naatuyyo bonchcho.

7
Daro lo77o haasayai eeyya uraassi giigenna; hegaappekka aaruwaa worddo haasayai deriyaa haariyaagaassi giigenna.

8
Mattaayee bana immiyaagau dumma wolqqa mala; i simmido soho ubbai ayyo injjetees.

9
Naaqettidi ba naaquwaa genttiya urai siiquwaa koyees; shin yoho zaari zaaridi woociya urai, ammanettiya laggeta shaakkees.

10
Eeyyai xeetuton lissuwan shocin eriyoogaappe akeeki de7iyo asi coo seerin eriyoogee aadhdhees.

11
Iita asi makkalabaa xalaalaa koyees; hegaa gishshau, meqetti bainna daanni a bolli kiitettana.

12
Eeyyatetti oiqqido uraara gaittiyoogaappe marata bonqqi ekkirggido maaheera gaittiyoogee keha.

13
Lo77o oottidoogaa kushiyaa iitaa zaariya uraayyo iitai a sooppe mulekka kichchenna.

14
Ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga.

15
Nagaranchchaa xillissiyoogeenne xilluwaa bolli pirddiyoogee eti naa77aikka GODAA sheneyiya ooso.

16
Akeekiya wozani au bainnaashin, eeyyaa kushiyan aadhdhida eratettaa shammiyo miishshai aibissi de7ii?

17
Laggee mule wodekka siiqees; ishaikka metuwaa wode maaddanaassi yelettees.

18
Akeekai paccido asi erenna uraa acuwaa qanxxanau waase gelees.

19
Ooshshaa dosiya asi nagaraa dosees; ubbatoo ceeqettiya asi bashshaa ba bolli xeesees.

20
Geella qofai de7iyo asi lo77obaa demmenna; shikkaalobaa haasayiya asikka metuwan gelees.

21
Azalla na7aa yelida aawi azzanees; eeyya na7aa aawau ufaissi baawa.

22
Wozani ufaittiyoogee asassi lo77o xale; shin kayyottiyoogee asau wolqqaa xaissees.

23
Iita daannai pirddaa geellayanau geeman mattaayiyaa ekkees.

24
Akeekai de7iyo uri aadhdhida eratettaa sinttan wottidi bees; shin eeyyaa aifee biittaa sa7aa xanxxaa yuuyidi xeellees.

25
Azalla na7ai ba aawaa azzanissees; bana yelida aayyiyookka zil77issees.

26
Xillo asa qaxxayiyoogee, suure asakka a suuretettaa gishshau dechchiyoogee lo77o gidenna.

27
Amarida qaala haasayiya asi eranchcha; woppa ayyaani de7iyo asikka akeekanchcha.

28
Eeyya uri co77u giikkonne ba doonaa barikko, eranchcha milatees.


Wolaytta Bible 2004 Copyright (SIM) 2004