2 SAMUERE 18 - Holy Bible [Ziazia Kekeapai 1978]

	Ziazia Kekeapai 1978 2 SAMUERE 18


Save Notes

1
Dawidi ki gedi agu aboro naadu na ko, ki moi agu abarutirivura naadu ri arika akutu na agu abarutirivura naadu ku ri akama.

2
Dawidi ki kparaka yo ni arika biata ki kedi gu rika aboro sa ku be Yoaba, gu kura rika sa ku be Abisai, unvurua Yoaba, nangia wiri Seruya, na gu biata rika ku be Itai nangia boro Gata. Bakindo ki ya fu aboro, “Ni rengo mi ni tire andú na oni a.”

3
Ono aboro ki karaga ha ki ya, “Mo andú nga te. Bambiko ka ani oro, i abérã nga pa rani te; ka ani vura kpi ki nye zogoro, i abérã nga pa rani a te. Ono mo kii paro dagba rani ki susi aboro 10,000. Si du awere gu ngba nga mo mbakadi pai ka unda rani bakporo no.”

4
Bakindo ki ya fu yo, “Gu pai ka ngba bangironi mi amánga kina ha.” Si du bakindo ki ru pati ngbadimo bakporo, aboro ki kuru ku zegi yo dunduko ni ba akama na ni ba akutu a.

5
Bakindo ki ta ruga aYoaba na Abisai na Itai, niya, “Oni mángi pai yee fu gu paranga nga Abisaroma, mbiko re.” Aboro ki gi he dunduko wa bakindo arugu pai fu abarutirivura tipa Abisaroma.

6
Si du aborovura akuru ti ni ku ringara yo sa aYisaraere. Vura ki du rogo gu birengua nga Efuraima.

7
Aboro aYisaraere ki kpiki be avuru Dawidi, bakere imo aboro ki du ni gu rago re wa 20,000.

8
Vura ki gbataka agbataka yasika rogo gu ringara re; birengua ki imi aboro ni gu uru re ki susi agu yo basape aimi yo.

9
Mamu ki mangi. Abisaroma ki gbia avuru Dawidi. Abisaroma ki nioro ri gako dongi, dongi ki kuru tii kikindigi abe gu bakere ngua du wa gero, ngua ki ngorã riko, ko ki asi kina ho dagba sende na ngbangbaturũ. Gu dongi ko adu auru ru, u ki susi ku mbata yo.

10
Kumba ki bi he sa, ki gumba ha fu Yoaba, ki ya, “Mo ngére, mi nibi Abisaroma ni asiasi ko ti gu ngua du wa gero.”

11
Yoaba ki ya fu gu kumba nagumba ha fu ko, “Mo nibi ko rengo! Tipagine mo naba nga ko ti ni ku sande ya? ka mi fu feda bawe foro, na giri dimose a.”

12
Ono gu kumba re ki ya fu Yoaba, “Ka i vura fu afeda 1,000 kina ku bere, mi taĩ nga bere kuti wiri bakindo te; wa ani agi he bakindo nirugu roni na Abisai na Itai, ki ya, ‘Oni bánda tironi ka boro zádi nga gu paranga nga Abisaroma ya.’

13
Ono ka mi nidi ungako ni biriki, kina ro ka sa pai ku ri re, a nga he ho du ni okooko ho ti bakindo te.”

14
Yoaba ki ya, “Ka mi ima nga na mo wo te.” Ko ki rogo asiida biata ku be ko, ki nofo Abisaroma ti bagundako na ni, wa ko adu ni ungako kindi ti gu ngua du wa gero.

15
Agu aparanga bawe natindi ga Yoaba aũvura i ki ke rago kirikiri pati he ki naki Abisaroma, ki imi ko.

16
Yoaba ki vu nambongo, aboro ki karaga tiyo ngba fuo do aYisaraere yo; bambiko Yoaba adingisa aboro.

17
I ki di Abisaroma, ki ba kangbako ku rogo bakere due birengua yo, ki ba bakere guguda ambia ku auru ko. AYisaraere ki oro dunduko gu ni ku rogo gani bamburoko.

18
Were ti gu rago Abisaroma adu ni ungako ko adua mbia tipa ko, nga gu naadu rogo ga Bakindo Ngboongboorago yo, bambiko ko aya, “Gude be re i ka tingida pa rimore ti ni te.” Ko ki yambu rimo gu duadua mbia re ti kina rimoko, i niya ti ni ba Abisaroma daku areme.

19
Aimasa nangia wiri Sadoka ki ya, “Oni ídi he fere mi oro, ka gumba agu apai re fu bakindo, wa iri Yekova bape ko ti avurako.”

20
Yoaba ki ya fu ko, “Mo adú nga ni bakusipai areme te; ono mo akúsa pai ti kura uru, ono mo akúsa nga pai areme te, bambiko wiri bakindo kpi.”

21
Yoaba ki ya fu gu boro Kusa, “Mo ndú ka gumba gu pai fu bakindo bi mo.” Boro Kusa ki tumusa barangba Yoaba, ki oro.

22
Aimasa nangia wiri Sadoka ki ya fu Yoaba berewe, “Mi nazungadi ro, ka pai vura ye fuo ho, mo ídi he mi oro fuo boro Kusa.” Yoaba ki ya, “Tipagine mo ka ora ti ni, wire, wa mo ka bi nga mosoro tipa taka pande he ya?”

23
Ko ki ya, “Ka pai vura ye fuo ho mi aóra aora.” Ko ki ya fu ko, “Mo óro.” Aimasa ki oro ngba gene kpasakpasa rago yo, ki susi boro Kusa.

24
Dawidi ki sungu dagba angbadimo bakporo ue; babandarago ki ndu ki ru auru ngapa ri ngbadimo, ki tuka bangiriko, ki ngere, ki bi kumba nayara ni sa ko.

25
Babandarago ki ta paa ku ari, ki gumba ha fu bakindo. Bakindo ki ya, “Ka ko du ni sa ko, si ngia pangbanga ngbako.” Ko ki ye ni ipo, ki mbedi.

26
Babandarago ki bi kura kumba ko niyara; babandarago ki yambu baru pangbadimo, ki ya, “Mo ngére, kura kumba nayara ni sa ko berewe!” Bakindo ki ya, “Ko naye na pangbanga ngbako a.”

27
Babandarago ki ya, “Ya mi tigimi gu oto nga ga bambata ko si wa ga Aimasa wiri Sadoka.” Bakindo ki ya, “Ko nga wene kumba, ko naye na wene pangbanga.”

28
Aimasa ki ta paa ku ari, niya fu bakindo, “Gbegberẽpai ho te.” Ko ki tumusa ku bara bangiri bakindo ki vagadi ni kpakpuko, ki ya, “Sambuahe fú Yekova nga ga Mbori, nga gu ko fu agu akumba ku be ro naatumba beyo kuti gi gbia nga bakindo.”

29
Bakindo ki ya, “Gu paranga nga Abisaroma ko zezeredi?” Aimasa ki karaga ha ki ya, “Ho Yoaba nikedi re ni nga ga bakindo moyambu, mi nibi bakere gbarakagbaraka, ono mi naruga nga tire na pa ha te.”

30
Bakindo ki ya, “Mo né ku bani, ki ru kono re.” Ko ki ne ku bani, ki ru zaa.

31
Oni ngére, boro Kusa ki da; boro Kusa ki ya, “Wenepai du ho tipa gi gbia nga bakinao! Bambiko Yekova iri bape ro areme ni gi uru re fu agu yo dunduko naazingi kuti ro.”

32
Bakindo ki ya fu boro Kusa, “Gu paranga nga Abisaroma ko zezeredi?” Boro Kusa ki karaga ha ki ya, “Avura bakindo gi gbia, nga agu yo dunduko naazingi kuti ro ka imisa ro, i dú adu wa kina gu paranga re.”

33
Bakere rungo ki zi bakindo gbe, ko ki ndu ku rogo gu bambu naadu ri ngbadimo bakporo, ki nikpari ni aume. Ko ki ta ndu niya, “Ako Abisaroma wire, ako Abisaroma wire, wire! Ka Mbori aidi he mi kpi ku ba ro, Ako Abisaroma wire, wire!”


Zande Bible 1978 La Sainte Bible en Zande © Alliance Biblique Universelle, 1978