Beblia

	Ziazia Kekeapai 1978 Asanza 17


Save Notes

1
Du na bete ugu riahe gbia kuti zereda si ngba ki susi ti kporo pumbo du na kina kpata rogo ho.

2
Gu kanga namanga pai ni tatamana azóga wiri bairani, nga gu ni namanga kina pa zee, ni ki du na bete aũkumbo dagba awiri bairani a.

3
Pere du tipa girisa feda, gbigiwi ki du tipa dahabu, ono Yekova nawisiga kpoto yo.

4
Bamangi gbegberẽpai nadega tuni sa fugo irairapai; irazire naye tuni sa fugo pa biriki.

5
Gu boro nawia rungorungo boro nafu zee fu kina Bamangini; gu ni du na ngbarago rago gberãngbi ni azanga nga mbusa te.

6
Atita gbinza aboro nga gayo kpakpari irisa, ga agude taarimo nga abayo.

7
Nonono betedi fugo angba nga ti gu boro zanga wene berã te; fugo irazire angba nga ti wiri bakindo a te.

8
Marã mabirimo wa kikii pa mbia bangiri gu boro nafu he; yo ni nasa tini ku ho ni, ni niu au.

9
Gu boro nadada tiandika nagbata nyemuse, ono gu ni nafuga kina gu pai kindi nakparaka wene badia.

10
Zapai narima gbe kina ku kpoto gu ni yo du na rugatinapai ki susi amandoro 100 ti kpoto mumungo boro.

11
Gbigbita boro nagbata kina pa samungu, si du i akéda kina kere bandusunge fuo ni.

12
Gbia boro gu nyarinde nga urisi rogo yo awiru be ru ngba ti gbia mumungo boro rogo gani mungo.

13
Ka boro karaga gbigbitapai ku ba wenepai, gbigbitapai aguari nga kpuni te.

14
Tonatona kpata wa ho boro nauka ime ni kpua; si du mo mbú pa ha mbata paa nikatona.

15
Gu boro nadia pai ri gbegberẽ boro, na gu ni nakita ngbanga ruru boro, wa du yo ue, i nga kina kere gbegberẽ aboro bangiri Yekova.

16
Tipagine ka marã du ti ni be mumungo boro ni ngbe tatamana na ni, wa adu nga ni na berã ti ni ya?

17
Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.

18
Boro zanga wene berã nafu ngbaanga gbua, ki ye ka du tipa ga kurani pai.

19
Gu boro nakpi nyemu pa samungu nakpi nyemu kpata a; gu ni nadua gani ngbadimo kporo ni gbanga ha nagbata gbarasapai.

20
Boro keretu berã au nga te, na gu ni du na gbegberẽ fugo ngbani yo ati ku rogo gberãngbi.

21
Mumungo wiri boro du ni pa rungo fu bani; ba gu gude zanga wene berã, ngbarago ti ni te.

22
Wasawasa kpoto boro yo du wa wene ngua kaza, ono rungorungo toro naugusa ameme augusa.

23
Gbegberẽ boro nadia marã mabirimo ngbaduni yo ka aria pa ruru sarangbanga.

24
Boro rugatinapai naaria kpakpuni sa tatamana, ono bangiri mumungo boro du kina kuti digida kpotosende.

25
Mumungo wiri boro nga pa rungo fu bani ki du wa nirãnirã pai fu nani.

26
Ngba nga geda mbusa fu ruru boro te; ka ta weneringi boro ru nga ha a te.

27
Gu boro naka na fugoni du na inahe, na gu ni du na bayee toro nga boro rugatinapai.

28
Zavura mumungo boro ho ni niongo ni, i ki ya ti ni iratatamana; ho ni nikisi ngbani ni, i naberã pa ni wa ngangarã boro.


Zande Bible 1978 La Sainte Bible en Zande © Alliance Biblique Universelle, 1978