Beblia

	Ziazia Kekeapai 1978 Asanza 25


Save Notes

1
Agi asanza re, ga Soromo du, nga gu avuru Izikiya ake he berewe nangia bakindo aYudo.

2
Si nga ga Mbori taarimo ka oka pai, ono gu taarimo nga ga abakindo nga ka gbata ndu apai.

3
Wa du angbangbaturũ ni tuturu he, na kpotosende ni badudungura ha, wo ka i awisiga nga kpoto bakindo yo a ya.

4
Ka i rogo gai feda ku sa yo, wene he nye anye be pangu tipa úsunge;

5
ka i di gbegberẽ boro ku sa yo bara bangiri bakindo, gako mbatabakindo adú ni nyakasinyakasi he be rurupai.

6
Ka mo nimói nga tiro ku mbata yo bara bangiri bakindo ya, ka mo nirú nga rogo ba bakindigi aboro a ya;

7
bambiko si ngba i ya foro, “Mo yé ku mbata no,” ti maa yo ro ku sa yo ku bangiri bazogo. Gu pai mo nibi ni bangiro

8
ka mo ndú nga na ni ku bangbanga yo ni ipo ya; bambiko mo amánga waĩ ti digida ha, ho kuaro ka fu pa zee ni foro?

9
Mo sáki ga ngbanga dagba ro na kuaro, ka mo kúsi nga okooko pai nga ga kura boro ya;

10
gu boro ka gia ha ki ye na pa zee ku ri ro, ka ga wasiro adiga nga ya.

11
Gu pai rengbe gumba yo ho ni karagapai si du wa kina zuzu ngua wa dahabu rogo baga feda yo.

12
Wa tongo dahabu, na wene fongo nga ga kikiipa dahabu, wo du tatamana barugupai fu agu yo nadega tuyo sa ni.

13
Wa gu zere morogumba nidu ti regbo ke ahe, wo du irarengo mokedi fu gu ni nakedi ni, bambiko ni nafu wasa fu toro bairani.

14
Wa dubo na yuge zanga mai wo du gu ni naabia tini na zire tipa agu ahe ni agama nga ha ya.

15
I nazungadi bazogo na hipai ni idi pai, gu mirãse nagumba zezeredi pai nakua meme.

16
Ka mo bi nzeme anyege, mo ri he rengbe arengba, mo ka mbi be he ki suku he asuka du.

17
Ka mo nindú nga dedede ku kuaro yo ya, ni ka mbu be ro, ki tona soga ro.

18
Gu boro du ni dezire ni zire kuti kurani ni wa ngbondo vura, watadu basape, watadu tĩtĩ guanza.

19
Kida kuti irazanga pa rengo ti rago fudifudipai du wa kina gbegberẽ rinde, watadu wa gu ndue zutuka ti ngba zunga ha.

20
Gu boro nabi bia fu gu ni du na rungo kpotoni yo, du wa gu boro naura roko ti kpotoni ti rago zere, wa kakaĩ imekakue ti bangiri oro.

21
Ka vuraro du na gomoro, mo fú riahe afu fu ni ni ri he; ka ni du na gomoro ime, mo ki fu ime fu ni ni mbiri he;

22
si mo ka ba guta mbusa ti ni ku ri ni, Yekova nikafu mosoro foro.

23
Wa yuge nodi naye na mai; wo du gu mirãse naso kpekpe, naye na ndukuda kpakpuse.

24
Sunga ti durugaduruga ri bambu yo ngba ki susi ti sunga na de sakapai rogo vuru bambu sa.

25
Wa dododo ime fu gu boro du na gomoro ime, wo du gu wene pangbanga naye gii ngbi yo.

26
Wa rufuduru ime, watadu gbegberẽ gugaabi, wo du gu ruru boro nambu gene gu gbegberẽ boro.

27
Ngba nga ha ka ri nzeme anyege ni bakere he te, si du gbata boro kina pa gani taarimo angba nga te.

28
Gu boro aruga nga tini ya, du wa kina gu bakporo kuadi yo ngapa ha, zanga ndugu.


Zande Bible 1978 La Sainte Bible en Zande © Alliance Biblique Universelle, 1978