Beblia

	Ziazia Kekeapai 1978 1 Petero 5


Save Notes

1
Mi nazungadi agu yo dagba roni nga abaakumba, wa du mi ni bakumba a, nga dezire ga Kristo hiapai, nga dikumbo gu taarimo nikadu ni kusikusi he, na oni.

2
Oni mbú ti ga Mbori rimbasa akandoro du dagba roni, nimangi sunge barumbatayo, mbiko du oni ni zizi roni kuti ni te, ono ni nyemuhe fu Mbori; tipa gbegberẽ ũkumuko a te, ono ni idapaha kpotoroni yo.

3
Ka oni dú nga ni abazogo agu yo i aasia payo fu roni ya, ono oni dú ni kpiahe fu rimbasa akandoro.

4
Were, ho baira ababanda akandoro ka du ni ni kusikusi ko oni adia kpakpari taarimo, nga gu apaya nga ya.

5
Kina a wo agu roni nga atame, oni rá fu agu yo garãyo nasusi gaoni. Ii, oni úkadi tironi dunduko na umbasiti, ki ra fu akuaroni; mbiko “Mbori naka fu aboro rekangose, ono ko nafu undahe fu agu yo naumbasi tiyo.”

6
Oni úmbasi tironi tie tii gu nyanyaki be yo nga ga Mbori ya ko tumba roni ho ragoho ka rengba ni ni.

7
Oni bá agu apai nafuda roni ku auru ko yo; mbiko ko naberã pa roni.

8
Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.

9
Oni ká fu ko ki ru nyanyaki rogo idapase yo, niini he ya ngbatunga agi ahipai re namanga awirinaroni du rogo zegino.

10
Were, gu Mbori nga Iraundahe dunduko, nga gu ko nayambu roni sa gako nyenye taarimo rogo Kristo yo, fuo hi oni apai ngbutuko, ko asá roni tigako oni du teketeke, ki nyakasi roni, ki ngarasi roni.

11
Taarimo dú fu ko na zoga arago, nye anye kindi. Amina.

12
Mi ke pai fu roni ni guruguru he be Siruano, du bangire ni wene ruru wirina, ki nirugu roni, ki ya ni dezire ya ndikidi ga Mbori undahe nga gere, oni rú rogo ho nyanyaki.

13
Gu kanisa du Babera yo du ni siasia yo na oni, i nasanango roni, na wire nga Marako a.

14
Oni sánango tironi ni dungoti nyemuse. Zereda dú fu agu roni dunduko du rogo Kristo yo.


Zande Bible 1978 La Sainte Bible en Zande © Alliance Biblique Universelle, 1978