Beblia

	Zarma Bible Lukka 1


Save Notes

1
Ya nin ay jine bora Tiyafilos, boro boobo na anniya haw ka hayey din baarey hantum kaŋ yaŋ tabbat no, i n'i te iri game ra.

2
Za sintina moy seedey da Sanno saajawkoy mo n'i no iri se.

3
Woodin sabbay se no ay mo di a ga boori ay ma hantum ni se. Zama ay na hayey din kulu guna-guna soosay, za sanno fuuma d'a fonda boŋ mo.

4
Ay mo go ga hantum ni se hala ni ma sanno kaŋ i na ni dondonandi nd'a din tabbatandiyaŋo bay.

5
Waato kaŋ Hirodus* gonda Yahudiya koytaray, alfaga* fo go no kaŋ a maa ga ti Zakariya, Abiya kuray boro no. A wando maa Alizabata, Haruna* dumo gaa n'a fun.

6
I boro hinka mo adilanteyaŋ no Irikoy jine. I goono ga dira Rabbi lordey d'a farilley kulu ra, taali kulu si.

7
Amma i sinda ize, zama Alizabata wo waygunu no. I boro hinka mo jiirey baa.

8
A go no, Zakariya go nga alfagataray goyo gaa Irikoy jine, nga alwaato boŋ.

9
Alfagataray alaada boŋ kurne n'a daŋ a ma furo Irikoy* fuwo ra ka dugu ton.

10
Jama kulu mo go taray ga adduwa te dugu tonyaŋo alwaato ra.

11
Rabbi malayka* fo mo bangay Zakariya se. A goono ga kay dugu tonyaŋ feema jarga, kambe ŋwaaro gaa haray.

12
Zakariya laakalo tun waato kaŋ a di a, a humburu mo.

13
Amma malayka ne a se: «Ma si humburu Zakariya, zama Irikoy maa ni ŋwaara. Ni wando Alizabata mo ga ize alboro fo hay ni se. Ni g'a maa daŋ Yohanna.

14
Ni ga farhã ka te bine kaani, boro boobo mo ga farhã a hayyaŋo sabbay se.

15
Zama a ga te boro beeri no Rabbi jine. A si duvan* wala baji dumi kulu haŋ. A ga to mo nda Biya* Hanno za nyaŋo gunda ra.

16
A ga Israyla* ize boobo bare k'i ye Rabbi ngey Irikoyo do haray.

17
A ga koy Rabbi jine mo nda Iliya* biya, d'a dabaro mo, zama a ma baabey biney bare k'i ye izey do haray, a ma hanga sandey ye i ma dira adilantey laakalo ra, a ma jama soolante mo margu Rabbi se.»

18
Zakariya ne malayka se: «Ifo gaa no ay ga woodin bay? Zama ay ya dottijo no, ay wande mo jiirey baa.»

19
Malayka mo tu ka ne a se: «Ay no Jibraylu, kaŋ ga kay Irikoy jine. Irikoy n'ay donton no zama ay ma salaŋ ni se, ay ma kande ni se baaru hanno wo.

20
Guna, ni ga dangay, ni si du ka salaŋ mo koyne kala han kaŋ hane hayey din ga te, za kaŋ ni mana cimandi ay sanney se, kaŋ Irikoy ga toonandi ngey alwaato ra.»

21
Jama mo go taray ga Zakariya batu. Kal i dambara nda gayyaŋo kaŋ a te Irikoy fuwo ra.

22
Waato kaŋ a fatta, a si hin ka salaŋ i se. I bay mo kaŋ a di bangayyaŋ fo Irikoy fuwo ra. Nga mo, a soobay ka te i se dedandiyaŋ, ka goro beebe.

23
A go no mo, kaŋ a goyo jirbey ban, a koy nga kwaara.

24
Jirbey din banda Alizabata, Zakariya wando te gunde. A na nga boŋ tugu handu gu ka ne:

25
«Ya-cine no Rabbi te ay se, hano kaŋ hane a bakar ay se, zama a m'ay jance haro ganandi borey jine.»

26
A go no koyne, a handu iddanta ra, kala Irikoy na malayka Jibraylu donton a ma koy kwaara fo do Galili laabo ra, kaŋ maa Nazara.

27
A ma koy wandiyo fo do kaŋ i ga ba k'a hiijandi alboro fo se. Albora maa ga ti Yusufu, Dawda dumo boro no. Wandiya mo maa Maryama.

28
Malayka furo a do ka ne a se: «Fofo, nin kaŋ du gomni. Rabbi go ni banda.»

29
Amma Maryama laakalo tun gumo sanno sabbay se. A goono ga miila nga bina ra hala fooyaŋ woofo dumi no woone.

30
Kala malayka ne a se: «Ma si humburu, Maryama, zama ni du gaakuri Irikoy do.

31
Guna mo, ni ga te gunde, ni ga ize aru hay, ni g'a maa daŋ Yesu mo.

32
A ga ciya mo boro beeri, i ga ne a se Koy Beero kaŋ bisa ikulu Ize no. Rabbi Irikoy g'a no a kaayo Dawda koytara karga.

33
A ga koytaray ŋwa Yakuba dumey boŋ hal abada, a koytara mo sinda me.»

34
Maryama mo ne malayka se: «Mate no woodin ga te ka te d'a, za kaŋ ay mana alboro bay?»

35
Malayka tu ka ne a se: «Biya Hanno ga zumbu ni boŋ. Koy Beero kaŋ bisa ikulu dabaro no ga te ni se yuumay. Woodin sabbay se no, izo kaŋ ni ga hay din, i ga ne a se Ihanna, Irikoy Ize.

36
Guna mo, ni nya-ka-fo-sina Alizabata gonda ize nga gunda ra, nga nda nga zeena. Woone mo ga ti a handu iddanta, nga kaŋ waato i ga ne a se waygunu.

37
Zama sanni si Irikoy do kaŋ ga jaŋ dabari.»

38
Maryama ne: «Guna, ay ya Rabbi koŋŋa no. I ma te ay se mate kaŋ ni ci din.» Kala malayka n'a naŋ.

39
Maryama tun jirbey din ra ka koy da waasi tondey kuukey laabo ra, Yahudiya kwaara fo do.

40
A furo Zakariya fuwo ra ka Alizabata fo.

41
A go no mo, waato kaŋ Alizabata maa Maryama fooyaŋo, kala attaciriya sar Alizabata gunda ra. Nga mo to nda Biya Hanno.

42
A na nga jinda sambu nda gaabi ka ne: «Ni ya albarkante no wayborey game ra, albarkante mo no ni gundayzo.

43
Man ay to mo, hala ay Rabbo nya ma kaa ay do?

44
Zama guna, waato kaŋ ni fooyaŋo jinda furo ay hangey ra, kala attaciriya sar ay gunda ra, farhã sabbay se.

45
Albarkante no ni kaŋ cimandi kaŋ Irikoy ga haya kaŋ nga ci ni se toonandi.»

46
Maryama mo ne: «Ay bina ga Rabbi beerandi,

47
Ay biya mo ga farhã Irikoy ay Faabakwa se.

48
Zama a na nga koŋŋa kaynandiyaŋo guna, Hal a go, ne ka koy jine zamana kulu izey ga ne ay se albarkante.

49
Zama nga kaŋ ga ti Hinkoyo, A te ay se hari bambata yaŋ, A maa ya Ihanna mo no.

50
A suujo go baabey da ngey waddey gaa ka koy izey da ngey waddey gaa, Ngey kaŋ yaŋ ga humbur'a gaa no.

51
A na gaabi cabe nda nga kamba. A na borey kaŋ gonda boŋbeeray ngey biney saawarey ra din say-say.

52
A na gaabikooney zeeri ka kaa ngey koytaray kargey ra, Ka talkey beerandi.

53
A na harayzey kungandi nda hari hanno yaŋ, Amma arzakantey, a n'i sallama kambe koonu.

54
A na nga tamo Israyla gaa, Zama nga ma fongu nda suuji,

55
Mate kaŋ cine a ci iri kaayey, Ibrahim da nga banda mo se hal abada.»

56
Kala Maryama goro Alizabata do sanda handu hinza cine, waato din gaa no a ye fu.

57
A go no mo, Alizabata jirbey to kaŋ a ga hay, hala mo a na ize alboro hay.

58
A gorokasiney d'a nya-ka-fo-siney maa kaŋ Rabbi na nga suuji beero cabe a se. I farhã mo a banda.

59
Kala jirbi ahakkante hane i kaa zama ngey ma zanka dambangu*. I ho k'a maa ce Zakariya, a baabo maa.

60
Amma nyaŋo tu ka ne: «Manti yaadin no. I ga ne a se Yohanna.»

61
I tu ka ne a se: «Ni dumo ra boro kulu si no kaŋ i g'a ce nda maa woodin.»

62
Kal i te dedandiyaŋ baabo se, k'a hã maa kaŋ no a ga ba i m'a ce d'a.

63
Nga mo, a na walhã hã ka hantum: «A maa ga ti Yohanna.» Hala boro kulu dambara.

64
Sahãadin-sahãadin, Irikoy na baabo meyo fiti, a n'a deena taŋ mo, hal a salaŋ ka Irikoy sifa.

65
Humburkumay kaa gorokasiney kulu gaa. Yahudiya tondey laabo kulu ra mo borey na baarey din ciinay te.

66
Borey kulu kaŋ maa mo n'i jisi ngey biney ra ka ne: «Zanka wo binde, mate no a ga bara nd'a? Zama haciika Rabbi kambe go a banda.»

67
Kala baabo, Zakariya to nda Biya Hanno ka annabitaray te ka ne:

68
«I ma Rabbi Israyla Irikoyo sifa, Zama a kaa ka nga borey kunfa, ka fansa te i se.

69
A na faaba hilli fo tunandi iri se nga tamo Dawda dumo ra.

70
Mate kaŋ Irikoy ci din annabi* hanney meyey ra, Za doŋ zamaney waney.

71
Hal a m'iri faaba iri ibarey gaa, D'iri konnakoy kulu kambe ra mo.

72
A ma suuji te iri kaayey se, Ka fongu nda nga sappa hanna,

73
Zeyaŋo boŋ kaŋ Irikoy ze d'a iri kaayo Ibrahim se,

74
Hal a m'iri no iri ma faaba iri ibarey kambey ra, Iri ma may Irikoy se humburkumay si.

75
Iri ma Irikoy gana hananyaŋ da adilitaray ra, Hal iri aloomarey me.

76
Oho, nin mo zanka kayna, I ga ne ni se Koy Beero kaŋ bisa ikulu wane annabi, Zama ni ga furo Rabbi jine k'a fondey soola.

77
Ni ga faaba bayray no a borey se ngey zunubey yaafayaŋo do,

78
Irikoy bina suujo sabbay se, Kaŋ a do no a kande beene mo boyaŋo iri do.

79
Ngey kaŋ yaŋ go kubay ra da buuyaŋ biyo ra mo ga goro, Nga no ga kaari i gaa. A g'iri cey daŋ baani fonda ra mo.»

80
Zanka binde beeri ka te gaabi biya ra. A goro saajey ra hala jirbey kaŋ i n'a cabe Israyla se.


Zarma Bible Public Domain: No Info