53:1-12 1. ¿Kia pa güɨroviata romoërakuagüe re? ¿Jare kia re pa oyekuaa yandeYa imbaepuere? 2. Jokɨ pɨau vae ramita oë yandeYa jembiokuai, jare japo ɨvɨ otini vae re oï ramita; mbaetɨ oyekuaa kavi jare mbaetɨ ipöra; yaechata, ërei ipörambae reve, yaaɨu yaeta. 3. Oñereröɨro jare oyemombo kuimbae reta ipɨte güi, kuimbae oiporara vae, tembiporara oikuaa; jare yanderova ñañomi chugüi rami, ñaröɨro jare mbaetɨ yaaɨu. 4. Añetete jae güɨraja yandembaerasɨ reta, jare oiporara yandembaeporara reta; ërei yandeve reta Tumpa oinupa rami, ombopere jare oiporarauka chupe rami ñamae jese. 5. Ërei ngatu jae ipere ko, yandepɨapochɨ reta re, oiporara ko yandeyoa jeko pegua; jae oiporara mbɨakatu ñanoi vaerä, jare ipere rupi ko yakuera. 6. Opaete yande reta yanderopa vecha reta jopa rami, metei ñavo opia jape jape ae rupi; ërei ngatu yandeYa oñono jese opaete yandeyoa. 7. Oiporara jare ipɨatɨtɨ jae, mbaetɨ etei iñee omoë; vecha kuimbae oyereraja mbaeyukaa pe rami; jare vecha mbaetɨ jäse iñapía reta ipo pe rami, kïrii ngatu, mbaetɨ etei iñee omoë. 8. Oipɨɨ reta jare ojäa reta oyuka; jare mbaetɨ iñemuña jërakua vaerä. Echa oyeasɨa kuae ɨvɨ güi, oikove vae reta ipɨte güi, cherëta pegua reta ipɨapochɨ vae jeko pegua omano. 9. Jare oñotɨ reta iyoa vae reta ndive, ërei omano yave, oñotɨ reta oikokatu vae reta jɨvɨa pe; yepe tëi mbaetɨ oyapo ikavimbae, jare mbaetɨ oñeväe apu jese. 10. Ërei opaete kuae reve yandeYa oiporarauka chupe, omee oiporara yae vaerä. Omee jekove mano pe, mbaeyoa omboai vaerä yave, oechata iñemuña reta, oiko pukuta, jare ipo pe yandeYa jemimbota oë kavita. 11. Oechata oiporaragüe jekovia, jare ipɨakatuta opɨta; cherembiokuai jupi vae iyarakuaa katu rupi ombojupita jeta vae, güɨrajata jae reta iyoa. 12. Jáeramo, che ameeta chupe oï vaerä jëia yae vae reta ndive, jare imbaepuere vae reta ndive omboyaota ñeraroa pe mbae opɨ̈rogüe; echa omee ramo jekove omano regua, jare oyepapa iyoa vae reta ndive, güɨraja ramo jeta vae reta iyoa, jare oyerure iyoa vae reta re.
54:1-17 1. Imembɨmbae vae, eyerovia; nde mbaetɨi nemembɨ vae, etairari, reyerovia güi, echa yandeYa jei: “Kuña oyeeyagüe, jetata imembɨ, kuña ime ndive oï vae güi.” 2. Embopɨguasu ndero guakapi pegua, embopɨguasu ndero guakapi pegua oyemboyao yao vae; agüɨye toata, embopuku nerɨmasa ndero imoataa, ietaka reta eyatɨka kavi eñono, 3. echa ndeakatu kotɨ jare ndeasu kotɨ reñemoaita; neñemuña reta opɨ̈rota iyeupe tëtaguasu reta, oñemoëta retata tëta guasu reta ipombaea rupi. 4. Agüɨye ekɨɨye, ngaraa reñemomaraiuka; agüɨye nemara, ngaraa ndekura vae. Neakañɨta ndetaɨrusu yave nemara vae güi, jare nememano yave nemara vae güi. 5. Echa ndeApoa ko jae neme rami. Jae ko jee yandeYa Imbaepuere yae ete vae; ndeReepɨ vae, jae ko Iyoambae Israel pegua, jae ko jee Tumpa, opaete ɨvɨ pe. 6. Echa yandeYa nereenɨi kuña oyemombogüe jare mbɨatɨtɨ rupi oiko vae oñeenɨi rami; tembireko taɨrusu vae oyemombogüe rami, neTumpa nereenɨi jare jei ndeve: 7. “Romombo michi pegua, ërei mboroparareko tuichagüe rupi rogüeru yeta. 8. Chearasɨ rai jeko pegua, ayerovata ndegüi michi pegua, ërei mboroparareko jekuae avei vae rupi ropararekota.” Che ndeYa, ndeReepɨ vae, jae. 9. “Jáeramo, Noé oiko yave ramita, Noé pe añererökuavee cheree ae re, ngaraa ye ma ɨvɨ opa amboai vaerä ɨ pe, jökorai vi añave, añererökuavee cheree ae re, ngaraa ye ma chearasɨ ndekotɨ, ngaraa ye ma añeengata ndeve. 10. Yepe ɨvɨtɨ guasu reta osɨrɨta jenda güi, ɨvɨtɨ reta opata osururu, ërei cheporoaɨu ngaraa oyepoepɨ ndegüi, cheporogüɨrökuavee mbɨakatu pegua ave ngaraa opa oyemboai.” Jei yandeYa, iporoparareko ndekotɨ vae. 11. “¡Paravete, tëta guasu oiporara jeta mbaesusere vae, mbaetɨ reve kia ombopɨakatu vaerä! Ërei che añonota ita reta ndeguapɨka ita ipöra vae, carbunclo jee vae re, romboguapɨta ita ipöra vae, zafiro jee vae re; 12. neventana reta ayapota ita ipöra vae pegua katuai, neröke reta ita ipöra vae carbunclo jee vae pegua katuai, opaete nekësea ayapota ita ipöra vae pegua katuai. 13. Jare opaete nemembɨ reta che ndeYa etei amboeta; jare oyekou yaeta mbɨakatu re. 14. Mbaejupi vae nemopɨ̈ratata, mbaetɨta ma kia oiporarauka ndeve vae, ngaraa ma rekɨɨye; echa kɨɨye ngaraa ma oya nderé. 15. Kia nunga vae oporepeña nderé yave, cheporookuai rupiä ko outa; kia oñemopüa ndekotɨ vae, nde remoamɨrita. 16. Che ko ayapo jiero pegua mbaravɨkɨ pe oparavɨkɨ vae, jókuae oipeyu tata vae, jókuae oyapo oipotagüe tembiporu iyeupe vae. Che ko ayapo oporomboai vae, oporomboai vaerä. 17. Ngaraa ipuere ndemboai metei ave tembiporu ñeraro pegua oyeapogüe. Remoamɨrita oipotagüe oñemopüa tëi ñeapo rupi ndekotɨ vae. Jökoraita ko opaete cherembiokuai reta, köraita ko oporomoamɨri reta.” Jei yandeYa.
113:1-4 1. ¡YandeYa jembiokuai reta! ¡Pemboete yandeYa! ¡Pemboete jae jee! 2. ¡Toyemboete yandeYa jee, añave güive jekuae avei rupi! 3. ¡Toyemboete yandeYa jee, opaete kerupi! 4. YandeYa, tuichagüe yae ko opaete tëtaguasu reta re, ¡jaeramiño vi iyemboetea oasa yé ara!
26:17-19 17. Oguatagüe, iyarasɨ katu jeko pegua oyemoinge ñeapo ambuae pe yave, yaɨmba pochɨ vae oinambipɨɨ vae rami ko. 18. Kuimbae imbokere vae omondo tata, uvɨ mano pegua, 19. jökorai ko kuimbae ombotavɨ ivɨa-ïru vae, javoi jei: “Añetete, yuvanga katu rupiño ko ayapo.”
Efesios 3:1-21 1. Kuae jeko pegua che Pablo, Cristo Jesús jembipɨɨ, pe judiombae vae reta re; 2. peikuaa ma ko aipo kërai Tumpa ipɨakavi omee cheve aparavɨkɨ vae pe ndive. 3. Echa Tumpa oechauka cheve vae rupi oikuaauka yaikuaa rapembae vae, tenonde ma aikuatía peve rami. 4. Pemongeta yave, peikuaa kavita che aikuaa kavi ko jókuae Cristo regua yaikuaa rapembae vae, 5. jókuae tenonde yave rupi mbaetɨ kuimbae reta oikuaa vae, ërei añave Tumpa oikuaauka temimondo oñono tee iyeupeguarä vae reta pe jare iñeemombeúa reta pe Espíritu rupi. 6. Kërai judiombae reta güɨnoi vi judío reta ndive imbaerä vae, jare meteiño jete, jare mókoi reve güɨnoi retata Tumpa güɨrökuavee Cristo Jesús re, ñee ikavi vae rupi vae. 7. Jókuae re, Tumpa cheapo jókuae mbaravɨkɨ peguarä, jae ipɨakavi rupi jare imbaepuere rupi. 8. Yepe tëi che ko michi yae opaete oporogüɨrovia vae michi yae vae güi, ërei oñemee cheve Tumpa ipɨakavi, amoërakua vaerä judiombae reta pe ñee ikavi vae, Cristo imbaeyekou yaipapa rapembae vae re, 9. jare aikuaauka vaerä opaete pe oyekuaambae iyɨpɨ güive Tumpa re vae, jae ko opaete mbaembae iyapoa. 10. Tumpa iyarakuaa tuichagüe yae vae, oyekuaa vaerä oporogüɨrovia vae reta rupi, mburuvicha reta pe jare imbaepuere vae ara rupigua reta pe. 11. Echa jökorai Tumpa oyapo iyemongeta opambae vae yandeYa Jesucristo rupi, 12. jese yandepuere yaike Tumpa oïa pe yandeporogüɨrovia rupi. 13. Jáeramo agüɨye peyembopɨtu, aiporara peré vae re. Jaeño pemboete Tumpa kuae re. 14. Kuae jeko pegua, che ayetavatɨka yandeYa Jesucristo Tu jóvai. 15. Opaete tëtara ara pegua reta jare ɨvɨ pegua reta jese oikove, 16. omee vaerä peve iyemboetea tuicha yae rupi pepɨ̈rata peporogüɨrovia pe iEspíritu rupi, 17. Cristo toiko pepɨa pe peporogüɨrovia rupi, jökorai tätagüe jare pepɨ̈rata vaerä mboroaɨu pe, 18. peikuaa kavi yae vaerä opaete oporogüɨrovia reta ndive, tuichagüe yae ko Cristo iporoaɨu vae, 19. jökorai peikuaa Cristo iporoaɨu oyapɨraa ko opaete arakuaa, petɨnɨe vaerä Tumpa pe. 20. Jare añave toyemboete Tumpa, imbaepuere yae oyapo vaerä jeta yae opaete mbaembae yaiporu vae ani yaikuaa vae güi, imbaepuere yandeɨvɨte pe oparavɨkɨ vae rupi. 21. Toyemboete Tumpa opaete oporogüɨrovia vae reta rupi Cristo Jesús re, jekuaekuae avei rupi. ¡Amén!
Guarani Bible 2001
Biblia DC Guaraní Bolivia Bolivian Bible Society, 2001