Biblia en un año

1. YandeYa jei Amón iñemuña reta regua körai: “¿Mbaetɨ pa Israel iñemuña reta? ¿Mbaetɨ pa mbaembae iyarä vae reta? ¿Maera pa tumpa-raanga Milcom añave oyemombae Gad iɨvɨ re? ¿Maera pa Amón iñemuña reta yogüɨreko jëta guasu reta pe?”
2. YandeYa jei: “Oväeta ara Amón iñemuña reta jëta guasu Rabá pe oyeendu vaerä sapúkai ñeraro pegua; oyepoepɨta tëtagüerä, jare pɨpegua tëta guasu reta opata oyeapɨ. Jayave Israel opɨ̈ro yeta jëta guasu reta oñepɨ̈ro chugüigüe. Che ndeYa ko jae kuae.
3. ¡Hesbón, eäpiro Hai, echa opa oyemboai! ¡Kuña reta Rabá pegua, peyaeo jasɨ katu reve! ¡Peyemonde temimonde mbɨatɨtɨ pegua pe! ¡Peñeäpiro, pembopere perete! Echa tumpa-raanga Milcom oyererajauka tembipɨɨ, isacerdote reta jare juvicha reta ndive.
4. ¿Maera pa reyembotuicha ndeɨvɨpe kavi re? Ndeɨvɨpe kavi opa ma oyemboai, tëta iñeereendumbae, rerovia katu mbaembae remboatɨgüe re, rere: ‘¿Kia pa oporepeñata cheré?’
5. Mase, oipota rupi güi aruta nderé rekɨɨye yae vaerä. Che, Tumpa Imbaepuere yae ete vae jae. Metei ñavo pegüi reta oëta otekuarai jape jape ae rupi, jare mbaetɨta kia omboatɨ ye otekuaraigüe reta.
6. Ërei jaɨkue rupi aru yeta tembipɨɨ güi Amón iñemuña reta. Che ndeYa ko jae kuae.”
7. YandeYa Imbaepuere yae ete vae jei Edom iñemuña reta regua körai: “¿Mbaetɨ ma pa arakuaa katu Temán pe? ¿Opa pa arakuaa katu iyarakuaa katu yae vae reta güi? ¿Oikomegua pa chugüi reta iyarakuaa katu?
8. ¡Dedán pegua reta, petekuarai, pekua peñemi kavi! Echa amboaita Esaú iñemuña reta jëta; oväe ma ara aiporarauka vaerä chupe.
9. Ombaepoo vae reta yogüeru uva oipoo yave, oeyaño amogüe uva iagüe; pɨ̈tu yave imonda vae reta yogüeru omaeñomi yave, güɨraja jókuae oipota vaeño.
10. Ërei che opaeteita aitɨvɨro Esaú jëta, aväeta iñemía reta, jare mbaetɨta ipuere oñemi. Iñemuña reta, jëtara reta jare jëta iyɨpɨ pegua reta, opaeteita okañɨtei; mbaetɨ eteita kia opɨta jei vaerä:
11. ‘Peeya cheve tɨ̈reɨ reta, ayangareko jese vaerä. Imemano vae reta ipuere vi oyerovia chereño.’ ”
12. YandeYa jei körai: “Jókuae jupi vae oiporara yave, nde mbaetɨ ko jupi köraiño repɨta vaerä, reiporara tai ko.
13. Che peYa, cheyé aeño arökuavee. Tëta guasu Bosra opɨtata ipombae, ñeerä jare yepopeyurä; jare opaete ïru jëta guasu reta oyemboaita opɨta jekuae avei pegua.”
14. YandeYa omombeu cheve, metei ñee jerajaa ojo opaete tëtaguasu reta pe jei vaerä: “¡Peyomboatɨ jare peporepeña Edom re! ¡Peyeapo katu ñeraro peguarä!
15. Mase, che pomomichi yaeta ïru tëtaguasu reta güi, peñereröɨrouka yaeta opaete vae reta pe.
16. Ndepɨayemboete pe reyembotavɨuka, jare ndepɨapochɨ pe. Reiko ɨ̈vavira ipäu rupi, jare ɨvɨtɨ guasu re. Ërei yepe tëi reñemoëta ɨvate güɨraké rami, joko güi rombogüeyɨukata. Che ndeYa ko jae kuae.”
17. “Edom opaeteita oyemboai. Opaete oasa jokoropi vae ipɨakañɨta jare oyóyai yoyaita oecha yave kuae susere reta,
18. echa opɨtata Sodoma jare Gomorra rami jare tëta guasu reta iyɨvɨrigua, opa oyemboai yave rami. Mbaetɨ yeta kia ou oiko pɨpe ani oasa jokoropi vae ave. Che ndeYa ko jae kuae.
19. Mase, ayuta metei yaguapope Jordán pegua kaa tëɨ yae vae güi oë ojo kapii jokɨ katu vae pe rami, joko güi ambotekuaraita Edom pegua reta, jare ameeta oporookuai che aiparavo vae. Echa ¿kia pa chemboyovake? ¿Kia pa oyemboɨta cheve? ¿Kia nunga vecha iyangarekoa pa ipuereta cheré?
20. Peyeapɨsaka kërai che peYa ayemongeta Edom kotɨ vae re, jare kërai ko cheyemongeta Temán pegua reta kotɨ vae re: Vecha raɨ ave güɨraja retata jare kapiirupa opata oyemboai.
21. Edom jɨapu oa vae omokanata ɨvɨ; jɨapu ojota oyeendu Ɨguasu Pɨ̈ta vae pe.
22. Tovaicho reta oporepeñata Bosra re, güɨraké ipepo oipɨso kavi oporepeña rami, jókuae ara Edom pegua jëia vae reta orɨrɨita, kuña imembɨ oa oï vae rami.”
23. Damasco regua jei körai: “Tëta guasu Hamat jare Arfad pegua reta ipɨa jopa yae ñogüɨnoi, echa ñee ikavimbae ou oväe chupe reta. Ipɨakɨɨye yae ñogüɨnoi, mbaetɨ ipuere ñogüɨnoi pɨagüive.
24. Damasco, otekuaraita tëi, ërei jëogüe. Ou jese kɨɨye jare mbɨatɨtɨ, orɨrɨi metei kuña imembɨ oa oï vae rami.
25. Tëta guasu jërakua yae vae jare ovɨakatu vae, oyemombo opɨta.
26. Jókuae ara itaɨrusu reta oyoata tëta joka guasu rupi, jare opaeteita omano ñeraro regua reta. Che, peYa Imbaepuere yae ete vae jae.
27. Ayatapɨta Damasco ikësea re, jare jókuae tata oapɨta Ben-adad jo reta.”
28. YandeYa jei körai Cedar iñemuña reta regua jare Hazor pegua mburuvicha reta regua, jae ko Nabucodonosor mburuvicha guasu Babilonia pegua omoamɨri vae reta: “¡Pepüa, peporepeña Cedar re! ¡Opa pemokañɨtei jókuae ñemuña reta kuaraɨ oëa kotɨgua!
29. Pepɨ̈ro jo reta guakapi pegua jare jɨmba reta, iasoya jare opaete jembiporu reta. Pepɨ̈ro chugüi icamello reta jare pesapúkai, pere: ‘¡Opaetei okɨɨye ñogüɨnoi vae!’
30. ¡Hazor pegua reta, petekuarai! ¡Pekua peñemi kavi! Che, Tumpa ko jae. Echa Nabucodonosor, mburuvicha guasu Babilonia pegua, oyapo yemongeta ikavimbae pekotɨ.
31. Che, Tumpa ko ayókuai: ¡Pepüa, peporepeña jókuae tëtaguasu oiko pɨagüive jare oyerovia iyé vae re, jöke reta ave mbaetɨ jare imotätaa, jare jaeño etei oiko!
32. ¡Pepɨ̈ro chugüi icamello reta jare opaetei jɨmba reta! Opata amoai moai oipota rupi, jókuae kuimbae reta iñäka-ɨke oñapi vae; oipota rupi güi aruta chupe omokañɨtei vaerä. Che peYa ko jae kuae.
33. Hazor ipombae jekuae avei pegua aguarayaɨmba oñemoëtata pɨpe, Mbaetɨ yeta kia ou oiko pɨpe, ani oasa jokoropi vae ave.”
34. Sedequías omboɨpɨ oiko mburuvicha guasurä Judá pe yave, yandeYa jei Jeremías pe Elam regua körai:
35. “Che, ndeYa Imbaepuere yae ete vae jae: Elam igüɨrapa reta amopëta, jae ko jókuae jembiporu iyeroviaka ete.
36. Aruta ɨvɨtu kuae tëta Elam re, opaete ɨvɨ jembeɨ kotɨ güi, opa vaerä amoai moai oipota rupi, opaetei tëtaguasu reta rupi oimeta otekuaraigüe.
37. Elam amborɨrɨiukata okɨɨye güi jovaicho reta jóvai, aruta chupe susere reta, aitɨta chearasɨ jese reta, jare ambouta chupe ñeraro opaetei omokañɨtei regua. Che ndeYa ko jae kuae.
38. Cheporookuaía añonota Elam pe, amokañɨteita juvicha guasu reta jare mburuvicha reta. Che ndeYa ko jae kuae.
39. Ërei metei ara, Elam pegua reta aru yeta iɨvɨ pe tembipɨɨrä yogüɨrekoa güi. Che ndeYa ko jae kuae.”
1. YandeYa jei ñeemombeúa Jeremías rupi Babilonia regua, jae ko Caldeaɨgua reta iɨvɨ; jei körai:
2. “Emoërakua kuae, tëtaguasu reta rupi, eikuaauka chupe reta. Emopüa bandera remokañɨmaa vaerä ñemoñee, agüɨye nekïriiño epɨta. Ere: ‘¡Babilonia oñepɨ̈ro! ¡Tumpa-raanga Bel opɨta ñemomarai pe, tumpa-raanga Merodac opa oyemboai! ¡Itumpa-raanga añetembae, opa oyemboai!’
3. Echa ɨvɨtuguasu kotɨ güi metei tëtaguasu oporepeña jese, jae oeyata jëtaguasu ipombae. Mbaetɨ eteita, kuimbae ani mɨmba yepe oiko pɨpe, echa opaeteita otekuarai.”
4. YandeYa jei: “Jókuae ara Israel jare Judá pegua reta yogüeruta oyaeo reve chereeka, che iYa Tumpa.
5. Oparandu retata tape Sión kotɨ ojo vae re, jare jokotɨ yogüɨrajata jei reve: ‘Yaja yandeYa pɨri, jare ñañemoïru jae ndive metei morogüɨrökuavee päve opambae rupi, agüɨye ye vaerä ma ñaneakañɨ.’
6. Tëta chembae vae vecha okañɨgüe rami ko, mbaetɨ güɨroata kavi iyangarekoa reta, omaeño okañɨ reta ɨvɨtɨ rupi. Opa yogüɨraja ɨvɨtɨ reta rupi, iñakañɨ regua jókai güi.
7. Jovaicho reta oväe yave oyuka jou, jare jei reta: ‘Mbaetɨ ko teko ñanoi, echa jae reta ko iyoa iYa kotɨ, ikapiirupa ikavigüe kotɨ, iñemuñagüe reta iyeroviaka.’
8. ¡Petekuarai Babilonia güi, Caldeaɨgua reta iɨvɨ güi! ¡Peë tenonde, kavara kuimbae reta tenonde oguata japicha reta pe vae rami!
9. Echa ɨvɨtuguasu kotɨgua tëta reta jeta yae jare imbaepuere yae vae amopüa oporepeña vaerä Babilonia re. Oyeapo katu yae reta jëta peve jare opɨ̈ro retata. Isundaro reta ikuaakatu yae reta, ojäa uvɨ oyavɨmbae reve.
10. Omaepɨ̈ro retata Caldeaɨgua reta güi, omaepɨ̈ro retata yangapɨɨ regua. Che peYa ko jae kuae.
11. Pe Caldeaɨgua, pemaepɨ̈ro chembae vae reta güi vae, ¡peyerovia katu yae jare pevɨa katu yae! ¡Peporise guaka taɨrusu oporise kapii rupi rami! ¡Peñee, kavayu oñee rami!
12. Ërei peɨvɨ jare perëta guasu opɨtata ñemomarai pe. Jae ko tëtaguasu reta güi ɨ́vɨkotɨ yaeta opɨta; ipombae, otini jare oasavi etei vae.
13. Echa chearasɨta jare aeyata ipombae, opaeteita oyemboai opɨta. Opaete oasa jokoropi vae ipɨakañɨta jare oyóyai yoyaita oecha yave kuae susere reta.
14. ¡Uvɨ regua reta, peñeñono kavi, peimama Babilonia! ¡Opaetei peruvɨ reta pemondo ikotɨ, echa iyoa reta chekotɨ!
15. ¡Pesapúkai sapúkai ñeraro pegua oipota rupi! ¡Babilonia jaema jëgua! ¡Iguapɨka reta oa ma, ikësea opa osururu! ¡Kuae ko jae che aiporarauka vae: Peyepɨ jese! ¡Peyapo chupe reta, jae reta oporoapo rami!
16. Opaetei peyuka Babilonia pegua omaetɨ ani ombaepoo vae. Oecha yave ñeraro oporomokañɨtei vae, ketɨgua reta oyerova yeta iɨvɨ kotɨ, metei ñavo otekuaraita iɨvɨ ae kotɨ.
17. Israel ko metei vecha okañɨgüe rami, yaguapope reta opa omoai moai rami. Tenonde ete mburuvicha guasu Asiria pegua opa jou; jaɨkue rupi, Nabucodonosor mburuvicha guasu Babilonia pegua, opa oikäo.
18. Jáeramo, che peYa Imbaepuere yae ete vae Israel iTumpa jae: Aiporaraukata mburuvicha guasu Babilonia pegua pe jare jëtaguasu pe, mburuvicha guasu Asiria pegua ayapo rami.
19. Israel aru yeta iɨvɨ pe, jare vecha jeta güɨnoi kapii Carmelo pe jare Basán pe vae ramita; ɨvɨtɨ guasu reta Efraín jare Galaad pe yangapɨɨta.
20. Che, peYa jae: ‘Jókuae ara Israel jare Judá oyeyorata teko jare mbaeyoa güi, echa che cheɨ̈rota, aeya tekove ndive vae reta pe.’
21. ¡Peporepeña ɨvɨ Merataim re, jare Pecod pegua reta re! ¡Pemoña jare opaetei peyuka! ¡Peyapo opaete che poyókuai vae! Che peYa ko jae kuae.
22. Kuae ɨvɨ pe oyeendu ñeraro yavaetegüe, kañɨtei tuichagüe.
23. ¡Babilonia, martillo rami opaete ɨvɨ pegua reta re vae, oyeakɨo opɨta, opa oyembojaɨ jaɨ! ¡Okɨɨye rai yae tëtaguasu reta, oecha yave kërai Babilonia oasa vae!
24. Babilonia, añono ñuai ndeveguarä, jare reikuaambae reve rea pɨpe. Reyepɨɨuka ñuai pe, echa chemboarasɨuka.
25. YandeYa oipea jembiporu ñeraro pegua jɨru, jare güɨnoe jembiporu iyarasɨ pegua, echa yandeYa Imbaepuere yae ete vae oimeta maratu oyapo Caldeaɨgua reta jëtaguasu.
26. Babilonia jovaicho reta, ¡peporepeña jese oipota rupi güi! ¡Peipea iyavatío reta! ¡Peyomboatɨ jese jeta vae jare opa pemboai! ¡Agüɨye etei mbae ave topɨta!
27. ¡Opaetei peyuka isundaro reta, peraja mbaeyukaa pe rami! ¡Paravete! ¡Oväe ma iara, oiporara yae reta vaerä!
28. Babilonia güi otekuaraigüe reta yogüeru oväe Sión pe vae imiari, kërai yandeYa Tumpa oiporarauka Babilonia pe, itupao pe oyapogüe re.
29. ¡Pemboatɨ opaete uvɨ oikatu ojäa vae reta, oporepeña reta vaerä Babilonia re! ¡Peyembojeyupa opaetei tëta guasu ikupe rupi, agüɨye etei vaerä metei ave oasayepe! ¡Peiporarauka chupe reta, jeko reta oï rupi! ¡Peyapo chupe reta, jae reta oporoapo rami! Echa jae reta ipɨapochɨ chekotɨ, che Tumpa, iYoambae Israel pegua kotɨ.
30. Jáeramo, itaɨrusu reta opata omano joka guasu rupi, jare opaete isundaro reta omanota jókuae ara. Che peYa ko jae kuae.”
31. YandeYa Imbaepuere yae ete vae jei: “Tëta guasu ipɨayemboete vae, che ayemboyovaicho ndekotɨ; oväe ara, reiporara yae vaerä.
32. Tëtaguasu ipɨayemboete vae, nepɨ̈sa-yeyukata jare regüɨapita, jare mbaetɨta kia nemopüa vaerä. Ayatapɨta opaete nerëta guasu reta re, jare jókuae tata omboaita opaete ndeɨvɨrigua.”
33. YandeYa Imbaepuere yae ete vae jei: “Israel pegua reta jare Judá pegua reta pe oiporarauka yae ñogüɨnoi. Jovaicho reta güɨnoi tembipɨɨrä, mbaetɨ oipota oyora reta.
34. Ërei iyoraarä vae jae ko Imbaepuere yae vae; jae ko jee yandeYa Imbaepuere yae ete vae. Jae oyapota opaete mbae jupi vae chupe reta; güeruta mbɨakatu kuae tëtaguasu pe, ërei Babilonia pegua reta pe güeruta kɨɨye rai.”
35. YandeYa jei: “¡Che ambou ñeraro Babilonia pe jare pɨpegua reta pe! ¡Juvicha reta pe jare yarakuaa vae reta pe!
36. ¡Ou ñeraro maratuta vae imombeúa reta pe; timbokere topɨta! ¡Ou ñeraro isundaro reta pe; tiñamɨri reta!
37. ¡Ou ñeraro ikavayu regua reta pe jare ikäretou pegua reta pe! ¡Ou ñeraro opaete sundaro reta omboepɨ imborɨarä vae reta pe, ërei kuñaecha opɨta retata! ¡Ou ñeraro imbaembae reta jepɨ vae pe, topɨ̈ro chugüi reta!
38. ¡Titɨpa iɨ̈aka reta; opa totini chugüi reta! Echa Babilonia jae ko tëtaguasu itumpa-raanga pota yae vae, jókuae rupi oyembopɨajopa reta.
39. Jáeramo, Babilonia pe oyemboaitɨta mɨmba pochɨ vae reta jare aguarayaɨmba reta, jare joko pe yogüɨrekota yandu reta. Ngaraa ye ma ipo, jekuae avei pegua.
40. Opɨtata Sodoma, Gomorra jare tëta iyɨvɨrigua reta, Tumpa opa omboai vae rami. Ngaraa ye kia ou oiko pɨpe, ani oasa jokoropi vae ave. Jei yandeYa.
41. Matɨ ɨvɨtuguasu kotɨ güi, tëtaguasu imbaepuere yae vae, jeta vae mburuvicha guasu reta oyeapo katu reta yogüeru vaerä.
42. Jembiporu reta ñeraro pegua uvɨ jare mii; ipɨa-pïrimbae reta ko jare mbaetɨ etei oporoparareko reta; isapúkai reta ɨguasu jɨapu rami, opo reta yogüeru kavayu re; oïndaivi oñoraro reta vaerä Babilonia pegua reta ndive.
43. Mburuvicha guasu Babilonia pegua oikuaa yave kuae re, mbaetɨ oikuaa mbae oyapo vaerä okɨɨye güi, ipɨatɨtɨ yae jare jasɨ chupe, kuña imembɨ oa oï yave vae rami.
44. Mase, ayuta metei yaguapope Jordán pegua kaa tëɨ yae vae güi oë ojo kapii jokɨ katu vae pe rami, joko güi ambotekuaraita Babilonia pegua reta, jare ameeta oporookuai che aiparavo vae. Echa ¿kia pa chemboyovake? ¿Kia pa oyemboɨta cheve? ¿Kia nunga vecha iyangarekoa pa ipuereta cheré?
45. Peyeapɨsaka kërai che peYa ayemongeta Babilonia kotɨ vae re; Caldeaɨgua reta iɨvɨ regua yemongeta ayapo vae: Vecha raɨ ave güɨraja retata, jare kapiirupa opata oyemboai.
46. Babilonia jɨapu oa vae omokanata ɨvɨ; jɨapu ojo oyeendu ïru tëtaguasu reta rupi.”
121. Ayapo avei jupi vae, agüɨye chereeya oyuvanga cheré vae reta ipo pe.
122. Chemomɨ̈rata, ikavi vae peguarä; agüɨye emaeño ipɨapochɨ vae reta toyuvanga cheré.
123. Cheresa ikangɨ ma aäro ndeporogüɨroasayepe, nde rerökuavee rami.
124. Eyapo, che nderembiokuai pe, ndeporoparareko rupi, ¡chemboe ndeporookuai reta re!
125. Nderembiokuai ko che, emee cheve arakuaa katu, aikuaa vaerä ndeporookuai reta.
126. CheYa Tumpa, eñemopüa mo, echa mbaetɨ oyapo reta ndeporookuai reta.
127. Jáeramo ko, che aaɨu ndeporookuai reta oro güi, oro ikavi yae vae güi oasa yé aaɨu.
128. Jáeramo ko, amae jese jupi ko opaete ndeporookuai reta, opaete mbaembae reta güi, jare amotareɨ opaete apu reta.
6. Ikaviño ko paravete reve jupi rupi oiko vae, ipɨapochɨ vae jare oikokatu yae vae güi.
1. Che Pablo, Tumpa jembiokuai jare Jesucristo jemimondo. Jae chemondo Tumpa oiparavo vae reta pe güɨrovia vaerä jese, jare oikuaa vaerä añete vae, omboete vaerä Tumpa,
2. jare oäro vaerä oyerovia reve tekove opambae vae. Echa Tumpa iyapumbae vae jókuae güɨrökuavee yandeve ndei ɨvɨ oyeapo mbove.
3. Jare ara oväe yave oikuaauka iñee che amoërakua vae rupi. Tumpa Yandemboasa vae cheokuai vae rupi.
4. Aikuatía kuae tupapire ndeve Tito, cheraɨ añetete vae mborogüɨrovia rupi: YandeRu Tumpa jare yandeYa Jesucristo ipɨakavi jare iporoparareko jare ipɨakatu toï nde ndive.
5. Che roeya Creta pe reyapokatu vaerä opaete oata oyeapokatu vaerä vae, jare reñono vaerä oporogüɨrovia vae reta itenondegua retarä tëta guasu ñavo rupi che royókuai rami.
6. Oporogüɨrovia vae reta itenondegua toiko kavi, agüɨye vaerä kia teko oväe jese, meteiño tijembireko, imichia reta toporogüɨrovia, jare agüɨye toyapo ikavimbae vae, ani tipɨapochɨ tu reta kotɨ.
7. Oporogüɨrovia vae reta itenondegua ikavi ko mbaetɨ oñeväe teko jese, Tumpa iparavɨkɨ oyapo vae; agüɨye tipɨapochɨ, agüɨye tiyarasɨ katu, agüɨye tikause, agüɨye tiñerarose, agüɨye tomonganaiño jupimbae reve,
8. tomboresive katu mboupa, ikavi vaeño toaɨu, agüɨyeta jei jeiiño, tijupi, toñeñono tee, jete jemimbota toyopia vae,
9. ipɨ̈rata ñee añetegüe re oyemboegüe vae, ipuere vaerä oporomboarakuaa añete vae rupi, jare oikuaauka kavi vaerä oyovaicho jae ndive vae reta pe.
10. Echa oimeño jeta iñeereendumbae reta, osirivembae re imiari jare oporombotavɨ vae reta; kuae ko jae judío reta.
11. Ikavi ko jókuae reta ñamokïrii vaerä. Echa jae reta oporomboe omonganaiño jupimbae reve jese vae re; jókuae iporomboe rupi ombojopa opaetei o pegua reta.
12. Metei chugüi reta, jae reta iñeemombeúa, jei körai: “Cretaɨgua reta iyapu avei, yavaete jeko, ikaru yae jare iyakɨ yae reta.”
13. Kuae imiari jese reta vae añete ko. Jáeramo tätagüe emboeta chupe reta, oñemomɨ̈rata reta vaerä iporogüɨrovia pe,
14. agüɨye toyeapɨsaka reta judío reta iarakae ndaye reta re jare oyerova ma añete vae güi vae reta iporookuai reta re.
15. Iyemongeta ikɨambae vae reta pe opaete mbaembae ikɨambae ko. Ërei oporogüɨroviambae vae iyemongeta ikɨa vae pe opaete mbaembae ikɨa ko. Echa ipɨa jare iyemongeta opaetei oikomegua.
16. Jae reta jei tëi oikuaa Tumpa, ërei jembiapo reta rupi mbaetɨ etei omboyekuaa oikuaa ko Tumpa vae, jae reta ko jeko pɨ̈chɨi yae, ipɨapochɨ, oyapo rapeä etei mbae ikavi vae.
Guarani Bible 2001
Biblia DC Guaraní Bolivia Bolivian Bible Society, 2001