11:1-11 1. Tëta Israel michi vɨteri yave, che aɨu; jare Egipto güi aru ye cheraɨ. 2. Ërei jeiete aenɨi yave, jeiete osɨrɨ reta chegüi. Baal reta pe omee mɨmba oyeyukagüe, tumpa-raanga reta pe oapɨ reta ikäti kavi incienso. 3. Jeseve che aipoko amboe oguata Efraín; ërei mbaetɨ oikuaa che ko ayangareko jese vae. 4. Kuimbae reta jɨmasa pe rami aroya cheyé, mboroaɨu rupi; kia nunga vae oekɨ güeye reta iyatua güi yuvo rami ko che, jare añono chupe reta tembíu. 5. Ngaraa ma yogüɨraja ye ɨvɨ Egipto kotɨ. Asiria pegua etei ko oikota juvicha guasurä, echa mbaetɨ oyerova ye chekotɨ. 6. Outa ñeraro jëta guasu reta re, opata omboai tëta raɨ reta, oyemongeta reta ikavimbae oyapo vaerä jeko pegua. 7. Chembae vae reta jekuaeño oyembopɨapochɨ chekotɨ. Yepe tëi chereenɨi reta Tuichagüe yae ete vae pe; ërei mbaetɨ etei metei ave chembotuicha. 8. ¿Maera pa roeyata, Efraín? ¿Maera pa romeeta tovaicho pe, Israel? ¿Maera pa ayapota ndeve tëta Adma rami, ani ramo Zeboim rami? ¡Chepɨatɨtɨ ko nderé, roaɨu yae ko! 9. Ngaraa ayapo chearasɨ jeia rupi: Ngaraa ave amboai Efraín, echa Tumpa ko che, kuimbaeä ko che. Pepɨte pe Ikɨambae ko che, ngaraa aike amboai tëta guasu.” 10. Jae reta oguatata yandeYa jaɨkue, jare jae oñeeta yaguapope rami. Oñeeta, jare imbae vae reta yogüeruta orɨrɨi reve kuaraɨ oikea kotɨ güi. 11. “Güɨra reta iñäkua oveve rami yogüeruta Egipto kotɨ güi; yogüeruta Asiria güi, pɨkasu rami; jare ameeta yogüɨreko pɨau ye jo ae rupi. Che ndeYa ko jae kuae.
12:1-14 1. Efraín iñemuña reta oyemongaru ɨvɨtu pe rami; ara ñavo yogüɨraja ɨvɨtuakuvo jaɨkue rami. Omoïru iyapu reta jare jekorai oyapo reta morogüɨrökuavee päve Asiria pegua reta ndive, jare güɨraja reta olivo iasaite pe ombopota Egipto.” 2. YandeYa ojäata Judá pegua reta. Oiporaraukata Jacob iñemuña reta pe jeko oï reta rupi; oiporaraukata chupe reta teko oyapogüe re. 3. Jacob, ichɨ jɨe peve oipɨtapɨɨ tɨkeɨ, okuakuaa ma yave oñoïraro araɨgua ndive. 4. Oñoïraro araɨgua ndive jare omoamɨri; oyaeo jare omoñera oiparareko vaerä. Tumpa oväe chupe Bet-el pe, jare imiari jae ndive joko pe. 5. Ërei yandeYa jae ko Tumpa Imbaepuere yae ete vae: ¡Jae ko jee YandeYa! 6. Israel pegua reta, peyerova ye peTumpa kotɨ; peyapo peporoaɨu avei reve jare jupi rupi, jare peyeko avei Tumpa reño. 7. YandeYa jei: “Omaemee vae güɨnoi ipo pe mbaejäaka oyemboyoavɨgüe, echa ipöra chupe oporombotavɨ vaerä. 8. Efraín jei: ‘¡Añete, ayemboikokatu yae, aväe mbaeyekou cheyeupeguarä; ngaraa kia ipuere chemboeko jupimbae rupi kuae mbaravɨkɨ ayapo vae re!’ 9. Ërei che ko jae peYa Tumpa, Egipto pe peiko yave güive, amee peiko vaerä o guakapi pegua rupi, ñuu rupi peikose yave rami, ara reta arete pegua pe. 10. Che amomiari ñeemombeúa reta, jeta aechauka chupe reta, jupi reta chemiari ambojaanga reve. 11. Galaad pe oime tumpa reta, ërei tumpa-raanga retaño ko. Gilgal pe oyuka reta toro; mɨmba oyeyuka oyeapɨ jese vae jae reta imbae, kó rupi jeta ita yatɨ yatɨ temitɨ pɨte rupi rami ko.” 12. Ërei Jacob otekuarai ojo ɨvɨ Aram kotɨ, joko pe oyeokuai güɨnoi vaerä jembirekorä, oparavɨkɨ oyangareko mɨmba reta re. 13. Metei ñeemombeúa rupi, yandeYa güɨnoe Israel iñemuña reta Egipto güi; ¡metei ñeemombeúa rupi oyangareko jese reta! 14. Efraín pegua reta oyapogüe mbaetɨ etei ipöra Tumpa pe. Jáeramo yandeYa oiporaraukata chupe oporoyuka vae re, yandeYa omboekoviata chupe oporomboetembae re.
139:17-24 17. ¡CheRu Tumpa! Ndeyemongeta reta tuicha yae ko cheve, ¡opa rapeä ko aikuaa! 18. Aipapa yave, jeta yae ɨvɨkuitï ɨguasu jembeɨ rupigua güi; jare apa yave, jekuaeño aï nde ndive. 19. CheRu Tumpa, eyuka iyoa vae reta, embosɨrɨ chegüi oporoyuka vae reta, 20. echa jei reta mbae ikavimbae ndekotɨ; nderovaicho reta oenɨi raangaiño nderee. 21. CheYa Tumpa, ¿amotareɨä pa nemotareɨ vae reta? ¿Jare aröɨroä pa opüa nderé vae reta? 22. ¡Amotareɨ ko opaete chepɨa ndive! ¡Añono reta ko cherovaichorä! 23. CheRu Tumpa, emae kavi cheré, eikuaa chepɨa; chejäa, jare eikuaa cheyemongeta reta, 24. emae, ¿oime ra ikavimbae cheré? Chereroata tape opambae vae rupi.
29:22-22 22. Iyarasɨ rai vae, oporomoñerarouka katu ko, iyarasɨ katu vae, oa katu mbaeyoa pe.
Judas 1:1-25 1. Che Judas, Jacobo tɨvɨ, Jesucristo jembiokuai, aikuatía yandeRu Tumpa oiparavo jare oñeñono tee vae reta pe. Jesucristo re oñeñovatu vae reta pe. 2. Tumpa iporoparareko jare ipɨakatu jare iporoaɨu toï jeta pe reta ndive. 3. Cherɨvɨ aaɨu vae reta, chekɨ̈reɨ yae aikuatía peve yandeyemboasa regua. Ërei ikavi cheve aikuatía vaerä peve pomboarakuaa vaerä peñemoäta ngatu mborogüɨrovia oñemee oñeñono tee vae reta pe vae re. 4. Echa amogüe kuimbae reta oike vɨari pepɨte pe, ɨma ma Tumpa oikuaauka voi jae reta oiporarata vae, ikavimbae vae reta ko, Tumpa ipɨakavi oipoepɨ reta jae reta jei vaeño oyapo vaerä. Oikuaku reta Tumpa Imbaepuere yae vae jare yandeYa Jesucristo. 5. Jáeramo yepe tëi peikuaa ma, ërei aipota pomomaendúa ye kuae re: YandeYa güɨnoe Israel pegua reta Egipto güi. Ërei taɨkue rupi opa omokañɨtei jese güɨroviambae vae reta. 6. Jare araɨgua reta mbaetɨ opɨta Tumpa oñonoa pe vae, jaeño oeya reta oikoa, jáeramo Tumpa oyokenda oñono reta pɨtumimbi pe, tembipɨɨrɨru opambae pe, Tumpa iporojäa iara peguarä. 7. Jaeramiño vi Tumpa oiporarauka Sodoma jare Gomorra jare iyɨvɨrigua tëta guasu reta pe. Echa joko pegua reta oyapo aguasa jare kuimbae reta oyogüɨreko oyoupii. Jáeramo oiporara reta tata opambae oikuaauka vaerä ïru vae reta pe agüɨye vaerä oyapo jae reta oyapo rami. 8. Jaeramiño vi mboromboe añetembae re oporomboe vae reta oñemona etei ma ko jókuae nunga pe, güɨröɨro reta yandeYa imbaepuere, mbaetɨ oipoɨu reta jei vaerä ikavimbae vae Tumpa iaraɨgua reta kotɨ. 9. Ërei araɨgua tenondegua Miguel etei oñoraro yave aña guasu ndive oyoaka reve Moisés jetegüe re, oipoɨu omboeko vaerä aña guasu. Jaeño jei chupe: “YandeYa toñeengata ndeve.” 10. Ërei mboromboe añetembae re oporomboe vae reta jei ñee ikavimbae vae oikuaambae vae kotɨ. Jae reta mɨmba reta oikuaa ramiño ko oikuaa. Echa yogüɨreko jei vae reño. 11. ¡Paravete jae reta! Echa omomoe reta Caín jeko. Jaeramiño vi ikorepoti pota güi opa opia reta Balaam rami; jaeramiño vi opa omano reta ipɨa pochɨ jeko pegua Coré rami. 12. Kuae reta ko pemomarai peyemboatɨ pekaru peyoaɨu revea pe, echa jae reta okaru pe reta ndive imarambae reve, iyé aeño oyangareko reta; jae reta ko amapɨtu iamambae vae rami, jókuae ɨvɨtu täta güɨroveve rami; temitɨ iambae iara pe vae rami, mókoi ye omano, jare oyeapomondoro. 13. Jae reta ko ɨguasu iɨaparúa tuicha vae oñaro vae rami, jókuae ɨ tɨrɨyɨi rami ko jembiapo ikavimbae, yasɨtata jopa vae rami ko. Pɨtumimbi opambae vae oñeñovatu oï chupegua retarä. 14. Enoc jae ko chiu ñemuña pegua Adán güi vae, jae kuae reta re vi omoërakua, jei reve: “Mase, ko ou yandeYa jeta yae vae iaraɨgua reta ndive 15. ojäata vaerä opaete vae, oiporarauka vaerä opaete iyoa vae jupimbae oyapo vae reta pe, jare opaete ñee ikavimbae vae iyoa vae reta jei ikotɨ vae pe.” 16. Jae reta ko iñeenguru vae reta, oporoangao vae reta, yogüɨreko ipɨa jemimbota reño vae reta. Jae reta imiari oyemboete reve, iñee kavi jaanga reta oipota ïru vae reta omee mbae chupe ramo. 17. Ërei pe cherɨvɨ aaɨu vae reta, pemaendúa yandeYa Jesucristo jemimondo reta omombeu peve vae re, 18. echa jae reta jei yepi peve: “Ara taɨkuegua reta pe oimeta oporoyóyai yóyai vae reta, isoo jemimbota ikavimbae reño vae yogüɨreko vae reta.” 19. Kuae reta ko oporomboyaouka, echa jókuae reta ko jemimbota reño yogüɨreko vae jare mbaetɨ güɨnoi Espíritu Santo. 20. Ërei pe cherɨvɨ aaɨu vae reta, peñemomɨ̈rata peporogüɨrovia ikɨambae pe, peyerure reve Espíritu Santo rupi. 21. Peiko avei Tumpa iporoaɨu pe. Peäro reve yandeYa Jesucristo iporoparareko rupi omee vaerä peve tekove opambae vae. 22. Peiparareko amogüe iporogüɨrovia pe mbaetɨ ipɨ̈rata vae. 23. Amogüe pemborɨ, penoe tata güi. Jare ïru vae peiparareko, ërei peyeandu reve iyoa reta güi. Echa ikavi ko peröɨro vaerä chugüi jemimonde ave omongɨa iyoa pe vae. 24. Jókuae imbaepuere yae ñaneovatu vaerä yagüɨapimbae reve vae, jare ñaneñono vaerä ikɨambae jare yayerovia yae reve jae jóvai iyemboetea pe, 25. Tumpa jaeño vae jare yarakuaa vae, Yandemboasa vae pe toñemee mbaemboete, yembotuicha jare mbaepuere, añave jare jekuaekuae avei rupi. ¡Amén!
Guarani Bible 2001
Biblia DC Guaraní Bolivia Bolivian Bible Society, 2001