ASSURENG 35:1-35 1. Napaddeppungenni Musa sininna bangsa Israélié nainappa makkeda lao ri mennang, “Iyanaé paréntana Puwangnge untu' iko: 2. Engka enneng esso untu' mappallaung, iyakiya esso iya mapitué iyanaritu esso untu' mappésau, esso maraja iya ripallaingngé untu' Puwangnge. Nigi-nigi mappallaung ri esso Saba'é harusu'i rihukkung maté. 3. Iyaro essoé dé' naweddikko palluwa' api ri bolamu.” 4. Makkedai Musa lao ri sininna bangsa Israélié, “Makkuwaniyé paréntana Puwangnge! 5. Tiwino pakkasuwiyang lao ri Puwangnge. Nigi-nigi ripakédo atinna, harusu'i makkasuwiyangeng ulaweng, péra' sibawa gessa; 6. kaing lénang alusu, kaing wol gawu, collipao sibawa cella; kaing polé ri bulu bémbé'é; 7. bingkulang bimbala lai iya ripecco cella'é; bingkulang alusu, aju akasia, 8. minnya untu' lampué; rampa-rampa untu' minnya upacaraé sibawa untu' dupa iya mabaué; 9. paramata dalima sibawa paramata laing untu' ripasang ri waju éfod-é sibawa pattongko arona Imang Lompoé.” 10. “Sininna panré iya maccaé ri yelle'mu harusu'i polé untu' mébbui sininna iya napparéntangngé Puwangnge, iyanaritu: 11. Kéma, pabbingenna sibawa pattongkona, pakkadak-kadanna sibawa rangkana, sining aju maloppona, tau-tau tange'na sibawa pallanggana. 12. Petti Assijancingngé sibawa aju pabbuléna, pattongkona sibawa kaing pattongkona; 13. méjang sibawa aju pabbuléna, sininna passakke'na enrengngé roti ripatalaé; 14. ajé lampué untu' pappakatajang sibawa passakke'na, lampu sibawa minnya'na, 15. mézba onrong mattunu dupa sibawa aju pabbuléna, minnya upacara, dupa iya mabaué, kaing pallawa untu' tange'na Kémaé, 16. mézba untu' akkarobangeng ritunu sibawa tarali-tarali polé ri gessaé, aju pabbulé sibawa sininna passakke'na; kullang onrong mabbissa sibawa pallanggana, 17. ténda-ténda untu' paturungenna, alliri-alliri sibawa pallanggana, kaing paddenring tange' paturungenna, 18. patto-patto sibawa tulu untu' Kémaé sibawa paturungenna; 19. pakéyang assompang untu' sining imangngé wettunna mennang majjama ri Bili' Mapaccingngé sibawa pakéyang ripallaingngé untu' Imang Harun, enrengngé ana'-ana'na.” 20. Nainappa sininna tau Israélié iya maddeppungengngéro tassiya-siyani, 21. nanigi-nigi iya ripakédoé atinna, tiwii pakkasuwiyang lao ri Puwangnge untu' passakke'i Kémana Puwangnge. Natiwi towi mennang sininna iya riyapparelluwangngé untu' assompangngé sibawa bahang untu' pakéyanna imangngé. 22. Nigi-nigi maélo, muwi worowané iyaré'ga makkunrai, polé tiwii pattoddo, anting-nganting, ciccing, ranté sibawa sininna rupanna paréwa ulawengngé untu' riyakkasuwiyangeng lao ri Puwangnge. 23. Tungke' tau iya mappunnaiyé kaing lénang alusu, kaing wol gawu, collipao iyaré'ga macella, kaing polé ri bulu bémbé'é, bingkulang bimbala lai iya ripecco cella'é, iyaré'ga bingkulang alusu, nakkasuwiyangenni barab-barangngéro. 24. Tungke' tau iya weddingngé massumbangeng péra' iyaré'ga gessa, natiwii untu' Puwangnge. Makkuwatoro napogau' sining tau iya mappunnaiyé aju akasia untu' jama-jamangngéro. 25. Sining makkunrai iya maccaé munu tiwii wennang lénang alusu enrengngé wennang wol gawu, collipao sibawa cella iya puraé mennang naébbu. 26. Munu towi mennang wennang polé ri bulu bémbé'é. 27. Sining pamimpingngé tiwii paramata dalima enrengngé paramata-paramata laingngé untu' ripasang ri éfod-é sibawa pattongko aroé. 28. Tiwi towi mennang rampa-rampa sibawa minnya untu' lampué, minnya upacaraé enrengngé dupa iya mabaué. 29. Sininna tau Israélié macenning atinna tiwii pakkasuwiyanna mennang ri Puwangnge untu' jama-jamang iya napparéntangngé Puwangnge naolai Musa. 30. Nainappa makkeda Musa lao ri tau Israélié, “ Puwangnge pura piléi Bézaleel ana' Uri, eppona Hur, polé ri suku Yéhuda 31. enrengngé mpéréngngi sibawa akuwasan-Na. Allataala mpéréngngi pappéjeppu, amaccang sibawa amampungeng ri laleng sininna rupanna ébbu-ébbu makessingngé, 32. untu' mébbu rancangang iya mapparelluwangngé apanréng, jamai polé ri ulawengngé, péra'é sibawa gessaé; 33. untu' masai batu paramata iya maéloé ripakkenna; untu' sobbi'i ajué enrengngé sininna rupanna ébbu-ébbu makessing laingngé. 34. Lao ri Bézaleel sibawa Aholiab, ana'na Ahisamakh polé ri suku Dan, Puwangnge mpéréngngi amaccang untu' mappagguruwangngi apanrénna mennang lao ri tau laingngé. 35. Riwéréngngi mennang amaccang ri laleng sininna rupanna jama-jamang iya napogau'é ahli mappaé, parrancangngé sibawa ahli pattennung lénang alusu'é, wol gawu'é, collipaoé sibawa cella'é, enrengngé kaing laingngé. Mennang iyanaritu parrancang iya maccaé sibawa naullé pogau'i sininna rupanna jama-jamangngé.
ASSURENG 36:1-38 1. Bézaleel, Aholiab enrengngé sininna panré iya lolongengngé amaccang sibawa apanréng polé ri Puwangnge, naisseng carana pogau'i sininna iya riyapparelluwangngé untu' mébbui Kémana Puwangnge. Harusu'i mennang mébbui sininnaro pada-pada iya puraé napparéntang Puwangnge.” 2. Naobbini Musa Bézaleel, Aholiab sibawa sininna tau iya lolongengngé apanréng polé ri Puwangnge sibawa iya macenningngé mabbantu, nainappa nasuro mennang pammulaiwi. 3. Riwérénni mennang ri Musa sininna iya nassumbangengngé tau Israélié untu' jama-jamang patettongngi Kémana Puwangnge. Iyakiya bangsa Israélié matteru mupi tiwii pakkasuwiyang lao ri Musa élé-élé. 4. Nainappa sining panré iya mattengngangngé jamai iyaro jamangngé 5. nalaporo'ni ri Musa, “Bahab-bahang iya nassumbangengngé sining tauwéro lebbini naiya riyapparellungngé untu' jama-jamang iya nassurowangngé Puwangnge.” 6. Nappallebbangenni Musa risininna akkémangngé makkedaé genne'ni sumbangengngé untu' patettongngi Kémana Puwangnge, jaji dé'na natiwina aga-aga sining tauwé. 7. Bahab-bahang iya puraénna nassumbangeng mennang lebbini untu' pattépui sininna jama-jamangngéro. 8. Nanainappa iya kaminang ahlié ri yelle'na sining panréro mébbui Kémana Puwangnge. Iyaro Kémaé naébbui mennang polé riseppulo lampana kaing lénang alusu iya ritennungngé sibawa wol gawu, collipao sibawa cella, nainappa risulangi sibawa gambara kérub. 9. Tungke' lampa pada ukkuranna; lampéna seppulo duwa météré, sibawa sakkana duwa météré. 10. Limallampa kaing risambung mancaji séddi ténda, sibawa limallampa iya laingngé riyébbu towi makkuwaro. 11. Ri wirinna iya duwa téndaéro riyébburengngi toling polé ri kaing gawu'é, 12. limappulo toling ri tungke' ténda, angkanna maddupa sipasang. 13. Nainappa riyébbureng limappulo pakkadak-kadang ulaweng untu' passéddiwi iya duwa téndaéro. 14. Puranana mennang naébbu pabbingenna iyaro Kémaé polé riseppulo séddi lampana kaing polé ri bulu bémbé'é. 15. Tungke' lampa pada ukkuranna, lampéna seppulo tellu météré sibawa sakkana duwa météré. 16. Limallampa risambung mancaji séddi ténda, sibawa enneng lampa laingngé riyébbu towi makkuwaro. 17. Limappulo toling ripasang ri wirinna ténda iya mammulangngé sibawa limappulo toling ri wirinna ténda maduwaé. 18. Nainappa riyébbureng limappulo pakkadak-kadang polé ri gessaé untu' passéddiwi iya duwa téndaéro untu' mancaji pabbingeng Kéma. 19. Purairo mébbuni duwa pattongko untu' bagiyang Kémaé, séddi polé ri bingkulang bimbala lai iya ripecco cella'é, na iya laingngé polé ri bingkulang alusu'é. 20. Nainappa naébbu mennang rangka-rangka Kéma iya tettongngé polé ri aju akasiaé. 21. Tungke' rangka tanréna eppa météré sibawa sakkana enneppulona enneng sénti. 22. Ri tungke' rangkaé riyébbui duwa patto iya sipasangngé, angkanna iyaro rangka-rangkaé weddingngi risambung iya séddié sibawa laingngé. 23. Untu' bagiyang yattanna Kémaé riyébbui duwappulo rangka, 24. sibawa patappulo pallanggana polé ri péra'é, duwa ri yawana tungke' rangka untu' iya duwa patto'na. 25. Untu' bagiyang manoranna Kémaé riyébbui duwappulo rangka, 26. sibawa patappulo pallanggana polé ri péra'é, duwa ri yawana tungke' rangka. 27. Untu' monrinna Kémaé ri bagiyang yajang, riyébbui enneng rangka 28. sibawa duwa rangka untu' sunna. 29. Rangka-rangkana iyaro sunna ripasilambungngi ri ajéna matteru lettu ri bagiyang yasé'na. Iya duwa rangka iya mébbuéngngi sunna riyébbui sibawa caraéro. 30. Jaji iya manenna engka aruwa rangka sibawa seppulo enneng pallangga péra', duwa ri yawana tungke' rangka. 31. Nainappa mennang mébbu seppulo aju mappolona polé ri aju akasiaé, lima untu' rangka-rangka riséddié benrénna Kémaé, 32. lima untu' benrénna iya laingngé, sibawa limasi untu' monrinna Kémaé seddé yajang. 33. Aju mappolona ri tengngaé, ripasangngi sittanré sitengnga rangkana, polé ri cappa'na iyaro Kémaé. 34. Rangka Kémaé sibawa aju-aju mappoloéro rilapiriwi sibawa ulaweng, nappa ripasangi gella-gellang ulaweng untu' tahangngi sining ajuéro. 35. Mébbu towi mennang kaing pallawa sumpang polé ri lénang alusu'é iya ritennungngé sibawa wol gawu, collipao sibawa cella, nainappa risulangi sibawa gambara kérub. 36. Untu' gattungngi iyaro kaingngé riyébburengngi eppa alliri polé ri aju akasiaé iya mallapi ulawengngé sibawa pakkadak-kadang ulaweng enrengngé ripasang ri yasé'na cappa pallangga péra'é. 37. Nainappa riyébbu kaing untu' pallawa sumpanna Kémaé polé ri lénang alusu iya ritennungngé sibawa wol gawu, collipao sibawa cella enrengngé ribélo-béloi sibawa sulangeng. 38. Untu' iyaro kaing pallawa sumpangngé riyébburengngi lima alliri iya ripasisumpungngé sibawa pakkadak-kadang. Cappa-cappa'na sibawa sining pallambunna iya lima alliriéro rilapiriwi sibawa ulaweng, na iya lima pallanggana riyébbui polé ri gessaé.
AMSAL 22:1-8 1. Untu' pamimping kor. Situru lagunna: Jonga ri éléé. Mazmurna Daud. 2. Allataalaku, oh Allataalaku, magi Musalaika? Mangobbika, iyakiya tette'-Ko mabéla sibawa dé' natulukka. 3. Oh Allataalaku, mangobbika ri lakessoé, iyakiya tette'-Ko mammekko. Massempajakka ri wennié, dé'to natennang atikku. 4. Iyakiya Iko Arung Iya Pommapaccingngé, iya napoji-pojiyé Israélié. 5. Mamménasai néné-nénéta ri Iko, mamménasai mennang, sibawa Mupassalama'i mennang. 6. Mangobbii mennang ri Iko sibawa ripaleppe; mamménasai mennang sibawa dé' naripakacélé. 7. Iyakiya iyya'é lati, tenniya tolino, ricella-cella sibawa ripakatuna ri tau maégaé. 8. Sininna iya mitaékka méllékéllé'ka, mabbuwé sibawa paccilic-cilingngi ulunna.
PAKKATOBBA 8:6-11 6. Puriyatiwi ada-adakku, nasaba coco'i sibawa mangke. 7. Iya upowadaé, tongeng maneng, saba' ucéccé bellé. 8. Ada-adakku malempu maneng, dé' muwi séddi malléko-léko iyaré'ga sala. 9. Untu' tau maccaé, tongengngi ada-adakku, untu' tau mapanré, coco'i ada-adakku. 10. Angke'i pangajaku pakacauriwi péra' tuléngngé, pentingkangngi pangissengengngé pakacauriwi ulaweng tuléngngé. 11. Iyya'na ritu pangissengengngé, lebbi mangke'i naiya intangngé; dé' nawedding ripasibanding sibawa muwi aga iya munawa-nawaiyé.
MATIUS 26:26-50 26. Wettunna mennang manré, malani Yésus roti, nainappa massempajang sukkuru'. Purairo napuwé-puwé'ni rotié sibawa liman-Na nainappa nawéréng ana'-ana' gurun-Na nanakkedato, “Alai, namuwanréi; iyanaé tubuk-Ku.” 27. Purairo malani séddi énungeng anggoro, nainappa mappale' sukkuru' ri Allataala. Nainappa nawéréng iyaro énungengngé ana'-ana' gurun-Na nanakkedato, “Enung manenno. 28. Saba' iyanaé dara-Ku iya paessaéngngi assijancingenna Allataala – dara ribollowangngé untu' tau maégaé nariyaddampengeng dosana mennang. 29. Ateppe'no: Dé'na Uwénungngi iyaé anggoro'é narapi wettunna ménuk-Ka anggoro baru sibawa iko ri laleng Lino Barunna Ambo'-Ku.” 30. Nainappa makkélong mennang séddi élong pappojiyang. Purairo laoni mennang ri Bulu-bulu Zaitun. 31. Nanakkeda Yésus lao ri ana'-ana' gurun-Na, “Iyato wenniéwé namulari maneng matu salai-Ka; saba' tarokii ri laleng Kitta'é: Makkedai Allataala, ‘Maélo-Ka mpunoi iyaro pakkampié, natassiya-siyana matu bimbala'na.’ 32. Iyakiya pura-Kuna ripaoto' paimeng, maélo-Ka lao ri Galiléa poddiyoloiko.” 33. Nakkeda Pétrus lao ri Yésus, “Namuni iya maneng laingngé nasalaiwi Bapa', dé' sises-siseng iyya!” 34. Nakkeda Yésus lao ri Pétrus, “Engngerangngi, iyato wenniéwé, riwettu dé'napa naoni manu'é, wékkatelluni muwassakkarek-Ka.” 35. Nappébali Pétrus, “Namuni harusu'ka maté silaong Bapa', dé'to umaélo makkeda makkedaé dé' uwissengngi Bapa'!” Nasininna ana'-ana' guru laingngé makkeda makkuwatoro. 36. Purairo laoni Yésus sibawa ana'-ana' gurun-Na riséuwaé onrong riyasengngé Gétsémani. Nakkuwanaro makkeda lao ri mennang, “Tudanno kuwaé, maélo-Ka lao massempajang.” 37. Nanaérani Pétrus sibawa iya duwa ana'na Zébédéus lao silaongengngi. Nappammulana messé babuwa sibawa mausé. 38. Nakkeda lao ri ana'-ana' gurun-Na, “Messé senna'i atik-Ku, samanna maélo-Ka maté. Onrono kuwaé, sibawa accowéno majjaga-jaga sibawak-Ka.” 39. Nainappa Yésus lao mabéla-béla céddé, nanakkaluttu ri tanaé massempajang. Adan-Na, “Ambo', rékko weddingngi, pabélaini polé ri Iyya anrasa-rasang iya harusu'é Upéneddingi. Iyakiya aja' nasituru' élo-Ku, sangadinna situru élona Ambo' bawang.” 40. Purairo lisuni Yésus ri iya tellu ana' gurun-Na nanapoléini mennang mattengngang matinro. Nakkeda lao ri Pétrus, “Dé'muna mulléi iko tellu jaga sibawak-Ka sijang bawang? 41. Jaga-jagako, sibawa assempajakko kuwammengngi aja' mupéneddingiwi paccobangngé. Mémeng rohmu maéloi pogau'i tongengngé iyakiya dé' mulléi, saba' sipa'na tolinoé malemmai!” 42. Laosi paimeng Yésus massempajang, adan-Na, “Ambo', rékko iyaé anrasa-rasangngé harusu'i Upéneddingi, sibawa dé' nawedding ripabélai, leppessanni élona Ambo' jaji.” 43. Purairo lisuni Yésus, nanalolongessi ana'-ana' gurun-Na matinro mupa, nasaba cakkaruddu senna'i. 44. Siseppi Yésus nasalai mennang, na untu' mabbékkatellunna massempajang sibawa powada ada-ada iya padaé. 45. Purairo lisuni ri ana'-ana' gurun-Na nakkeda, “Matinro mupoga sibawa passauwi tekkomu? Itai, narapini wettunna Ana'na Tolinoé riyabbéréyang lao ri akuwasanna sining tau madosaé. 46. Oto'no, talao. Itai! Engkani polé tau iya bali'bellariyék-Ka!” 47. Ri wettu mabbicarana mupa Yésus, Yudas, sala séddinna polé ri ana'-ana' gurunna Yésus poléni. Maéga tau naéwa silaong iya tiwié peddang sibawa tarasulu. Risuroi mennang ri kapala-kapala imangngé sibawa sining pamimpinna Yahudié. 48. Na iyaro tau bali'bellaé pura napaissengiwi mennang tanrangngéwé, “Tau iya ubauwé, iyanaritu taunna. Tikkengngi!” 49. Lettu'nana ri onrongngéro, matteruni Yudas lao ri Yésus nakkeda, “Salama', Pa' Guru!” Nanabauwi Yésus. 50. Nappébali Yésus, “Eh saudara, untu' aga nalao saudara kumaiyé?” Nainappa malluruni tau maégaéro nanatikkengngi Yésus.
Bugis Bible 1997
LAI 1997