11:1-23 1. YandeYa jei che Jeremías pe, körai: 2. “Israel iñemuña reta toyeapɨsaka kuae morogüɨrökuavee päve pegua ñee reta jei vae re. Nemiari ɨvɨ Judá pegua reta pe jare Jerusalén pe yogüɨreko vae reta pe, 3. ere chupe reta: YandeYa, Israel iTumpa jei: ‘Tijeko topɨta jókuae morogüɨrökuavee päve pegua ñee reta mbaetɨ omboete vae. 4. Jae ko jókuae morogüɨrökuavee päve ayapo peñemuñagüe reta ndive vae, anoe reta yave Egipto güi, jókuae horno jiero oyemondɨkui pɨpe rami chupe reta vae güi. Jae chupe reta: Peendu cheñee reta, jare peyapo cheporookuai. Jayave peikota chembaerä jare che aikota peTumparä. 5. Jökorai, che ambopota morogüɨrökuavee päve ayapo peñemuñagüe reta ndive vae, amee vaerä peve ɨvɨ kavi yae añave penoi vae.’ ” Jare che jae: “Añete ko cheYa.” 6. Jayave yandeYa jei cheve: “Emoërakua opaete kuae ñee tëta guasu reta Judá pegua pe jare kaye Jerusalén pegua rupi, körai: ‘Peyeapɨsaka morogüɨrökuavee päve pegua ñee reta jei vae re jare peyapo. 7. Peñemuñagüe reta anoe Egipto güi rupive, amombeu kavi voi chupe reta oendu katu vaerä che jae vae; jayave güive añave regua, jekuae avei amombeu chupe reta oendu vaerä che jae vae. 8. Ërei mbaetɨ oyeapɨsaka ani oyapo reta che jaegüe, oyapo reta ipɨa jemimbotaño. Mbaetɨ oipota oyapo reta che jae vae ramo, ambou chupe reta tembiporara reta kuae morogüɨrökuavee päve pe oyekuatía oï vae.’ ” 9. YandeYa jei ye cheve: “Judá pegua reta jare Jerusalén pe yogüɨreko vae oyembopɨa pochɨ reta chekotɨ. 10. Iyoa reta iñemuñagüe reta iyoa rami, echa jae reta mbaetɨ oipota oyeapɨsaka cheñee reta re, omboete reta tumpa-raanga reta. Judá jare Israel mbaetɨ omboete morogüɨrökuavee päve ayapo iñemuñagüe reta ndive vae. 11. Jáeramo aruta chupe reta susere mbaetɨta ipuere otekuarai chugüi vae. Yepe tëi täta jäse reve oeka cheve yemborɨ, ngaraa aendu chupe reta. Che ndeYa jae kuae. 12. Jayave Judá pegua jare Jerusalén pe yogüɨreko vae yogüɨrajata oiporu yemborɨ tumpa-raanga reta pe, jókuae oapɨ ikäti kavi vae incienso chupe reta vae pe. Ërei jae reta ngaraa ipuere oepɨ reta susere iara pe. 13. Echa nde Judá, jeta yae tumpa-raanga renoi, tëta guasu reta jeta yae renoi rami; jare Jerusalén ikaye jeta yae rami, pemopüa jeta mbota renda Baal peguarä, peapɨ vaerä chupe ikäti kavi vae incienso. 14. Nde, Jeremías, agüɨye eyerure kuae tëta re, agüɨye eyerure chemoñera reve ikotɨ reta; echa ngaraa aendu chupe reta jäse reve oeka cheve yemborɨ isusere iara pe yave. 15. Nde Israel che roaɨu vae, ¿mbae pa reeka chero pe, ikavimbae yae vae jeta ma reyapo güire? ¿Reyemongeta pa, remee cheve mbaekɨra jare soo oyeapɨ vaerä vae rupi reasayepeta susere güi? ¿Jókuae re pa reyemboete? 16. Ïrugüe ara rupi che peYa, poenɨise olivo jokɨ katu, jare ipöra ia pe oyekuaa vae; ërei añave jɨapu yae reve opata aapɨ nderoo reta jare neräka reta aakɨota. 17. Echa che, peYa Imbaepuere yae ete vae, poñotɨ temitɨ rami vae ko amombeu kuae susere Judá jare Jerusalén kotɨ, ikavimbae yae vae peyapo jeko pegua chemboarasɨuka, echa peapɨ ikäti kavi vae incienso Baal pe.” 18. YandeYa oikuaauka cheve tovaicho reta oyemongeta chekotɨ vae. Jae chemomae aikuaa vaerä. 19. Che aiko, metei vecha kuimbae taɨrusu vae oyereraja mbaeyukaa pe rami, aikuaambae reve oime ko oyemongeta pɨ̈chɨi reta chekotɨ vae. Jei reta chekotɨ: “Yayasɨa ɨvɨra ia kavi oï añave vae, yayasɨa kuae ɨvɨ güi, oikove vae reta ipɨte güi, agüɨye vaerä mo kia imaendúa jese.” 20. Ërei nde, cheYa Imbaepuere yae ete vae, jupi rupi oporojäa vae; nde reikuaa opaete kuimbae reta iyemongeta vae. Emaeño taecha, kërai reiporarauka chupe reta vae, echa ndepo pe che añeñono. 21. Jare Anatot pegua kuimbae reta oeka kërai cheyuka vaerä, cheokuai reta agüɨye mo vaerä chemiari Tumpa jee re, echa mbaetɨ yave cheyuka retata, 22. yandeYa Imbaepuere yae ete vae jei ikotɨ reta: “Aiporaraukata chupe reta: Taɨrusu vae reta omanota ñeraroa pe, imichia reta opata jovaruru. 23. Mbaetɨ eteita opɨta chugüi reta metei ave, echa oväe ara aru vaerä Anatot pegua reta re mbaesusere, oiporara yae reta vaerä.”
12:1-17 1. CheYa, jupi vae ko nde ayoaka vaerä nde ndive; ërei aipota aparandu ndeve: ¿Maera pa iyoa vae reta yogüɨreko kavi? ¿Maera pa ipɨapochɨ vae reta yogüɨreko kavi? 2. Reñotɨ reta temitɨ rami ɨvɨ pe, japo reta oyepota, okuakuaa reta jare ia reta. Iyuru peño ndemboete yae reta, ërei ipɨa pe mombɨrɨ ñogüɨnoi ndegüi. 3. Ërei nde cheYa Tumpa, chereecha jare chekuaa kavi ko; reikuaa kërai cheyemongeta ndekotɨ vae. ¡Eraja jókuae kuimbae reta, mbaeyukaa pe vecha oyereraja rami; emokañɨmaa parapiti iara peguarä! 4. ¿Kërai yave regua pa ɨvɨ otinita oiko jare ñana kaa rupigua ipiruta oiko? Pɨpegua reta jeko kavimbae jeko pegua, mɨmba reta jare güɨra reta opa omano; echa jei reta: “Tumpa mbaetɨ ko oecha yayapogüe.” 5. “Reñoñókuai ɨvɨ rupigua reta ndive vae viña pa ndembokangɨ, ¿këraita pa ndepuere reñoñókuai ikavayu re ñogüɨnoi vae reta ndive? Ɨvɨ kavi pe reiko pɨagüiveä yave, ¿këraita pa ndeve, Jordán pe kaa tëɨ yae vae pe? 6. Echa nderɨkeɨ ani nderɨvɨ jare nerëtara reta ave oñemopüa ndekotɨ, osapúkai púkai ndekotɨ reta. Agüɨye erovia katu, yepe tëi nemomiari kavi reta. 7. Aeya chembae vae reta, aröɨro chembae vae reta. Amee jovaicho reta ipo pe, tëta chembae aaɨu yae yepi vae. 8. Kuae tëta chembae vae, añave yaguapope kaa rupigua rami oyeapo cheve; jäse jäse oporepeña cheré, jáeramo aröɨro. 9. Chembae vae reta ko güɨraképara rami. Japicha reta oporepeña jese oipota rupi güi. ¡Peyu, opaete mbaeporou kaa rupigua reta; peyemboatɨ pekaru! 10. Jeta tovaicho mburuvicha reta opa omboai cheuvarupa, opɨ̈ro reta ɨvɨ chembae re, opa omboai reta oeya, jókuae ɨvɨ aaɨu yae vae. 11. Oeya reta ipombae, opa omboai reta, jare che aecha ɨvɨ ipɨatɨtɨ yae. Opaete ɨvɨ ipombae oï, jare mbaetɨ etei kia oyemoambeko jese. 12. Opaete ñuu ɨvate vatea rupi yogüeru oporomboai vae reta, echa che peYa, kɨsepuku anoi omboai vaerä kuae ɨvɨ jembeɨ güive ïru jembeɨ pe, ngaraa oime mbɨakatu metei vae pe ave. 13. Oñotɨ reta tëi trigo, ërei oipoo reta käpeati; oparavɨkɨ mbateeiño reta. Mbaetɨ mbaagüɨye chupe reta, che peYa, chearasɨ ikotɨ reta jeko pegua.” 14. YandeYa jei körai Israel iyɨvɨrigua tëta reta jeko kavimbae reta kotɨ, jókuae omboai reta ɨvɨ jae omee imbae vae reta Israel pe vae kotɨ körai: “Che anoe retata iɨvɨ güi jare ipɨte reta güi anoeta Judá. 15. Ërei anoe güire cheporoparareko yeta jese reta, aroyerova reta yeta iɨvɨ ae ae pe jare jëta jëta ae pe. 16. Jae reta omboe chembae vae reta jei vaerä mbae Baal jee re, ërei oyapo reta yave añetete rupi chembae vae reta oyapo rami, jare jei reta mbae che cheree re yave, ipuere yogüɨreko chembae vae reta ipɨte pe. 17. Ërei jókuae tëtaguasu mbaetɨ oyapo che jaegüe vae, opaeteita amboai, aapo mondorota opa amboai. Che ndeYa jae kuae.”
118:10-14 10. Opaete tëtaguasu reta cheöva, ërei yandeYa jee re opata amoamɨri reta. 11. Cheöva reta jare opa cheokenda reta, ërei yandeYa jee re opata amoamɨri reta. 12. Cheöva reta kävee rami, tata jendɨ ñurati re rami iyarasɨ reta chekotɨ, ¡ërei yandeYa jee re opata amoamɨri reta! 13. Täta chemoaña reta tëi chepɨaka vaerä, ërei yandeYa chemborɨ. 14. Cheñepɨ̈roa jare chetairari ko yandeYa. ¡Jae ko chereroasayepe vae!
27:8-8 8. Güɨra ojo mombɨrɨ jaitɨ güi rami, jökorai ko mombɨrɨ ojo jëta güi vae.
Colosenses 4:1-18 1. Mbaravɨkɨ iya reta, peyapo jupi vae jare isɨmbi vae perembiokuai reta pe, echa peikuaa ko oime vi penoi peYa ara pe. 2. Jekuaeño peyerure avei. Peyerure avei pemee reve yasoropai Tumpa pe. 3. Jare peyerure vi oreré, yandeYa oipea vaerä oreve öke romoërakua vaerä Cristo regua yaikuaambae vae, echa jókuae re ko che aï kuae tembipɨɨrɨru pe. 4. Peyerure cheré, chepuere vaerä aikuaauka kavi. 5. Peiko pearakuaa katu reve oporogüɨroviambae vae reta ndive. Peiporu kavi ara reta. 6. Pemiari kavi ñee oporomboyerovia vae. Peikuaa kavi mbae pere vaerä oparandu vae pe. 7. Opaete cheregua, Tíquico omombeuta peve. Jae ko cherɨvɨ aaɨu vae, yandeYa jembiokuai jupi vae, chemborɨ vae. 8. Echa kuaerä amondo pépɨri, oikuaa vaerä peregua, jare jae pembopɨakatu vaerä. 9. Amondo vi jae ndive Onésimo. Jae vi ko cherɨvɨ aaɨu vae jupi vae, jae ko perëtaɨgua. Jae reta oikuaaukata peve opaete mbae kuae pe oyeapo vae. 10. Aristarco, cheïru tembipɨɨrɨru pe vae, omondo tamaraeme peve, jare Marcos, Bernabé jiɨ. Jókuae che poyókuai ma pemboresive kavi vaerä, ojo pépɨri yave vae. 11. Jare Jesús, Justo pe oero reta vae omondo vi peve tamaraeme, jaeño ete kuae judío reta chemborɨ amoërakua vaerä Tumpa iporookuaía regua. Jae reta chembopɨakatu yae. 12. Epafras vi omondo tamaraeme peve, jae ko perëtaɨgua, Cristo jembiokuai. Jae jekuaeño oyerure avei peré, peñemomɨ̈rata vaerä, jare peikuaa kavi vaerä opaete Tumpa jemimbota re. 13. Echa che etei chepuere amombeu peve kërai Epafras oyemoambeko täta peré, jare Laodicea jare Hierápolis pegua reta re. 14. Lucas jare Demas vi omondo tamaraeme peve. Lucas jae ko oporopoano vae aaɨu vae. 15. Tamaraeme toñogüɨnoi oporogüɨrovia vae reta Laodicea pegua. Ninfas jare opaete oporogüɨrovia vae reta jae jo pe oyemboatɨ vae. 16. Pe reta pemongeta ma yave kuae tupapire, pemondo Laodiceaɨgua oporogüɨrovia vae reta omongeta vaerä vi. Jare jókuae tupapire Laodicea pe amondo vae pe reta pemongeta vi. 17. Pere Arquipo pe toñemoäta ngatu, oyapo vaerä mbaravɨkɨ yandeYa omee chupe vae. 18. Che etei amondo peve tamaraeme, aikuatía chepo pe etei. Pemaendúa tembipɨɨrɨru pe aï vae re. Tumpa ipɨakavi toï pe ndive. ¡Amén!
Guarani Bible 2001
Biblia DC Guaraní Bolivia Bolivian Bible Society, 2001