Biblia en un año

1. Peendu kuae ñee, guaka reta Basán pegua, Samaria iɨvɨtɨ re peiko vae, peyuvanga paravete vae reta re vae; peme reta pe pere: “Peru vino rou vaerä.”
2. YandeYa Tumpa jei jee ikɨambae re, körai: “Mase, outa oväe ara reta, pereraja reta vaerä tɨ̈ai pe, jare peñemuña reta oipɨɨ retata pinda pe.
3. Peyoaɨkue yoaɨkueta peë ovapetea oyekagüe rupi, jare opata perenoe pemombo mburuvicha guasu jo kavi güi ɨvɨtɨ Hermón kotɨ.” Jei yandeYa.
4. “Pekua Bet-el pe peyoa peikuaa reve, pemoïru pepɨapochɨ Gilgal pe, peru ndeimbove yave mɨmba oyeyukata vae, jare pediezmo mboapɨ ara ñavo.
5. Jare pemee mɨmba oyeyukagüe mbaemboete pegua, mbɨyape oyembovugüe ndive, jare pemoërakua oipota rupi mbota pepɨa-kɨ̈reɨ ngatu reve pemee vae, echa jókuae ko pemomora pe Israel iñemuña reta.” Jei yandeYa Tumpa.
6. “Che ko mbaetɨ amee peve tembíu opaete perëta guasu ñavo, jare mbaetɨ tembíu opaete perëta ñavo rupi; ¡ërei mbaetɨ peyerova chekotɨ!” Jei yandeYa.
7. “Jare amombɨta vi ama pegüi mboapɨ yasɨ ndei mbaarɨvo mbove; amongɨ metei tëta guasu reño, ïru tëta guasu re mbaetɨ amongɨ; amogüe kó re okɨ, ïru kó re mbaetɨ okɨ vae opa ipiru;
8. jare mókoi ani mboapɨ tëta ipo reta yogüɨraja tëi oeka ɨ ïru tëta pe, ërei mbaetɨ jeta oväe reta chupe omboasa vaerä iɨuve, ¡jeseve mbaetɨ peyerova ye chekotɨ!” Jei yandeYa.
9. “Ambou peve ɨvɨtuakuvo jare taso, tuku opa jou pegüi peko raɨ reta ipo, jare peuva reta, ɨva reta jare olivo reta, ¡ërei mbaetɨi peyerova ye chekotɨ!” Jei yandeYa.
10. “Ambou peve mbaesusere reta yavaetegüe Egipto pe rami; ayukauka petaɨrusu reta kɨsepuku pe, jare perovaicho opa opɨ̈ro pekavayu reta pegüi; peïru reta ñeraro pe omanogüe iine aëtuuka tëi peve, ¡ërei mbaetɨ peyerova ye chekotɨ!” Jei yandeYa.
11. “Pomokañɨtei, Sodoma jare Gomorra opa amboai rami; tatasɨgüe tata güi oñerenoegüe rami peasayepe, ¡ërei mbaetɨ peyerova ye chekotɨ!” Jei yandeYa.
12. “Jáeramo, jökorai ñotai ko poapo, pe Israel iñemuña reta; ¡jayave, peyupavo peñoövaiti vaerä peTumpa ndive!”
13. Echa, ko oï ɨvɨtɨ reta iyapoa, kuimbae reta pe omombeu iyemongeta vae, pɨtumimbi oyapo tembiperä vae, ɨvɨtɨ guasu rupi oguata vae, jae ko jee yandeYa Tumpa Imbaepuere yae ete vae.
1. Israel iñemuña reta; peendu kuae ñee mbɨatɨtɨ pegua amondo pekotɨ vae.
2. Israel tëta ikavigüe oa, ngaraa ye ma opüa; ogüɨapi jare mbaetɨ kia omopüa vaerä.
3. Echa körai jei yandeYa Tumpa Israel iñemuña reta pe: “Metei tëta guasu güi ojo yave mil sundaro ñeraroa pe, cienño oyerova yeta; ojo yave cien, payandepoño oyerova yeta.”
4. YandeYa jei Israel iñemuña reta pe: “Peyu chekotɨ jare peikoveta.
5. Agüɨye pekua Bet-el kotɨ ani Gilgal kotɨ, agüɨye pekua Beerseba kotɨ, echa Gilgal oyererajaukata ɨvɨ ambuae pe tembipɨɨrä jare Bet-el opata oyemboai.”
6. Peyu yandeYa kotɨ jare peikoveta; agüɨye vaerä ou tata rami José iñemuña reta kotɨ, jare opa pemboai, jare mbaetɨta Bet-el pe kia ipuere ombogüe.
7. ¡Pe reta perokomegua jupi vae, jare jupi vae pemombo ko ɨvɨ re!
8. Peeka yasɨtata yatɨ yatɨ Pléyades jare Orión jee vae iyapoa, jae ko oyapo ara jare pɨ̈tu; jae ko oenɨi ɨ ɨguasu güi, jare opɨyere ɨvɨ iárambo; jae omee mɨ̈rata ipɨ̈rata vae güi omaepɨ̈ro vae pe, jare ombou omaepɨ̈ro vae tëta ipɨ̈rata yae vae re. Jae ko jee yandeYa.
9.
10. ¡Pe reta pemotareɨ öke pe oepɨ teko jupi vae, jare peröɨro sɨmbi rupi imiari vae!
11. Peyuvanga paravete vae re jare pekovara chupe trigo güɨnoi vae re, peyapo perorä ita oñeopagüe katuai vae jeko pegua, mbaetɨta peiko pɨpe; peuvarupa kavi peñotɨ vae güi mbaetɨta peu vino.
12. Echa che aikuaa ko pepɨapochɨ yae vae, jare jeta peyoa reta vae; aikuaa ko peiporarauka jupi vae pe vae, jare peipɨɨ mbae oyemboepɨ vɨari vae, jare ñejäa renda pe paravete vae reta pemoamɨriuka.
13. Jáeramo, yarakuaa katu vae, jökorai yave kïriiño, echa ara mbaetɨ ikavi.
14. Peeka ikavi vae peikove vaerä, agüɨye peeka ikavimbae, echa jayave yandeYa Tumpa Imbaepuere yae ete vae oïta pe ndive, pe pere rami.
15. ¡Pemotareɨ ikavimbae! ¡Jare peaɨu ikavi vae! Ñejäa pe toime jupi vae; güɨramoi jayave yandeYa Tumpa Imbaepuere yae ete vae iñɨ̈rota José iñemuñagüe reta pe.
16. Jáeramo, körai jei yandeYa Tumpa Imbaepuere yae ete vae: “Tëta ñavo oka guasu pe oimeta yaeo, jare oka ñavo rupi jäseta mbae jasɨ güi. Jare ko pe oparavɨkɨ vae reta peenɨita oyaeo, jare yaeo regua reta peenɨita oyaeo vaerä.
17. Jare opaete uvarupa rupi oimeta yaeo, ayu ponupa yave.” Jei yandeYa.
18. ¡Paravete, jókuae yandeYa iporojäa iara oäro vae reta! ¿Maera pa peipota jókuae ara? Yavaete yaeta ko, mbaetɨta ko ikavi.
19. Yaguapope güi otekuarai vae ojo oñoövaiti oso ndive ramita ko; ani o pe oike vae opoko ovapetea re yave mboi oichuu vae ramita ko.
20. YandeYa iporojäa iara outa vae ikavimbae yae ko; yavaete yae ko, ngaraa ko ikavi.
21. Amotareɨ jare chemboyuguaru ko opaete peporomboete pemopöra yae peyapo vae; jare mbaetɨ chepɨakatu peyemboatɨ guasu reta re.
22. Mbaetɨ aipota mɨmba oyeyukagüe opaetei oyeapɨ vae pemee tëi cheve vae, jare mbota reta temitɨ jäɨgüe; ngaraa aipɨɨ pegüi perɨmba pemongɨragüe ave mbota yembopɨakatu peguarä pemee tëi yave.
23. ¡Pembosɨrɨ chegüi petairari reta! ¡Ngaraa etei aendu peve peremimbɨ reta iñee!
24. Ërei mbaejupi tosɨrɨ ɨ rami, jare mboromboete ɨ tɨpambae rami.
25. “Pe Israel iñemuña reta, ¿perökuavee pa cheve ñuu pe mɨmba oyeyukagüe reta jare mbota reta jókuae cuarenta año rupi?
26. Jaeño perajase petumpa-raanga reta Moloc jare Quiún jo, jókuae petumpa-raanga reta iä peyapo peyeupe vae.
27. Jáeramo, mombɨrɨ pogüɨrajaukata, Damasco güi kutɨ ye.” Jei yandeYa, jae ko jee Tumpa Imbaepuere yae ete vae.
5. Jaekavi ko, jupi vae oiporarauka cheve yave, omboeta cheve vae, asaite oñemokäti kavi vae ramita ko cheve, jókuae ngaraa aröɨro, ërei jókuae ikavimbae oyapo vae reta kotɨ tayerure maratu vaerä.
6. Juvicha reta oyeitɨukata ɨ̈vavira pe, jare oikuaa retata cheñee añetete ko vae.
7. Ombaeara vae ɨvɨ oara rami, ikägüe reta toñemoai tɨvɨa jöke rupi.
8. Jáeramo cheYa Tumpa, ndereño amae, ndereño ayeko, agüɨye chereeya.
9. Cheövatu ñuai oñono reta cheregua vae güi, chereepɨ iyoa vae reta iñuai güi.
10. Jupimbae reta toa iñuai pe aeño, che aja ramboeve tenonde.
26. Jeta vae oeka mburuvicha iporomborɨ, ërei yandeYa güi ko ou morojäa metei ñavo pe.
1. Kuae jaɨkue rupi amae jare aecha metei öke oyepea oï ara pe. Jare ñee tenonde yave aendu mimbɨguasu iñee rami vae imiari cheve vae jei cheve: “Eyeupi kuae pe jare aechaukata ndeve mbaembae oasata kuae jaɨkue rupi vae.”
2. Jare jupiveiño Espíritu Santo güɨnoi mbaepuere cheré; jare aecha metei tenda mborookuaía pegua oï ara pe, jare kia oguapɨ oï pɨpe.
3. Joko pe oguapɨ oï vae ita ipöra yae vae reta jaspe jare cornalina jee vae rami oyekuaa. Jare jókuae tenda iyɨ́vɨri rupi oï yɨɨ ita ipöra yae vae esmeralda rami vae.
4. Jare jókuae tenda iyɨ́vɨri rupi oï ïru veinticuatro tenda reta. Jare jókuae tenda reta pe oguapɨ ñogüɨnoi veinticuatro tenondegua okuakuaa vae reta, jemimonde tïi vae jare iñäka re äka-regua oro pegua ndive.
5. Jare jókuae tenda güi oë ama-vera, ararɨapu jare ñee reta. Jare jókuae tenda jóvai chiu mechero jendɨ ñogüɨnoi, jae ko Espíritu Santo chiu jembiapo güɨnoi vae.
6. Jare jókuae tenda jóvai oï ɨguasu vidrio rami vae. Jókuae tenda iyɨ́vɨri rupi oï irundɨ oikove vae reta, jeta jesa vae, jenonde jare jaɨkue kotɨ.
7. Jare jókuae oikove vae tenondegua yaguapope rami. Jare mokoía toro taɨrusu vae rami. Jare mboapɨa kuimbae jova rami. Jare irundɨa güɨraké tuicha vae oveve vae rami.
8. Jare metei ñavo jókuae irundɨ oikove vae reta, güɨnoi ova ipepo, jare ipepo iárambo jare igüɨ rupi güɨnoi jeta jesa. Jare ikueraiä jei reta ara rupi jare pɨ̈tu rupi: “¡Iyoambae, iyoambae, iyoambae ko yandeYa Tumpa Imbaepuere yae ete vae, jae ko iyɨpɨ güive, añave jare outa vae!”
9. Jare jókuae oikove vae reta omboete, omee yasoropai jókuae tenda pe oguapɨ vae oiko jekuaekuae avei rupi vae pe yave,
10. veinticuatro tenondegua okuakuaa vae reta oyetavatɨka omboete jókuae tenda pe oguapɨ vae jekuaekuae avei rupi oiko vae, jare oñono reta iñäka-regua jókuae tenda jóvai, jei reve:
11. “OreYa, jupi ko oñemee vaerä ndeve yemboetea, mbaemboete jare mbaepuere, echa nde reyapo opaete mbaembae, jare nderemimbota rupi opaete mbaembae oiko jare oyeapo.”
Guarani Bible 2001
Biblia DC Guaraní Bolivia Bolivian Bible Society, 2001