Bible in one year

1. Nabo rî, nî batumîre nguû inthongi cia gûtumîrwa antû arîa atheru cia rangi ya wiirû bwa îgûrû, na mûkû na intuune. Nî baathithîrie Aaroni nguû iu ntheru o ta ûrîa MWATHANI eerîte Musa.
2. Ningî barathithia nguû ya efodi ya rangi îkari ta thaabu, na ya wiirû bwa îgûrû, na ya mûkû na întuune, îtumi na mîrigi îmîega buru.
3. Nabo baraûûra thaabu îraa tûbaati tûtûceke baracoka baramîatûranga nthîrî inceke ta mîrigi baraitumîîra nguûne îîu yatumi na mîrigi îmîega ya rangi ya wiirû bwa îgûrû, na ya mûkû, na întuune.
4. Nî baathithîrie tûtambaa twa ituro twa efodi, tûragwatithanîrua na yo mîthieene ya nteere cio-ijîîrî.
5. Naju mûcibi jwaayo jwathithîtue na into o ta biu na ûtea o bûmwe na nguû îîu. Mûcibi jwaarî jwa rangi îkari ta thaabu, na ya wiirû bwa îgûrû, na ya mûkû, na întuune. Naju nî jwaatumi na mîrigi îmîega bwega o ta ûrîa MWATHANI eerîte Musa.
6. Natu twiga twa goro tûrîa twîtagwa onikisi nî twathuranîîrwe bwega baratwîkîira tûmîbukoone twa thaabu. Natu twiga tûu nî twaandîki mariîtwa ja ataana ba Jakubu bwega ja ûrîa mûûri jwaandîkagwa.
7. Natu twiga tûu aratwîkîra tûguûne tûrîa twarî ituroone bia efodi, nîkenda twaa twiga twa kûririkanangia Mûrungu antû ba Israeli o ta ûrîa MWATHANI eerîte Musa.
8. Barathithia nguû ya kîbara bwega o ta ûrîa efodi yaathithîtue bwega na rangi îkari ta thaabu, na ya wiirû bwa îgûrû, na ya mûkû na întuune, itûmi na mîrigi îmîega buru.
9. Nabu ûraaja na wariî bwa nguû îîu ya kîbara nîka bwang'aneene, nayo nî yaunanîrî jaîrî; ûraaja na wariî bwaayo bwaarî centimita mîrongo îîrî na ithaano (25cm).
10. Nguûne îîu bareekîra mpari inya cia twiga twa goro: Rwari rwa mbere kaiga gagatune, karîa geetagwa akiki, na ka mûkûnyûni geetagwa yakuti na gagatune geetagwa emeradi.
11. Naru rwari rwa ijîîrî rwaarî na twiga tûtû: kaiga gagûkengakenga ka rangi ya matî, na kaiga ka goro ka rangi ya wiirû bwa îgûrû, na kaiga ka alimasi.
12. Rwari rwa ithatû rwaarî na twiga tûtû: kaiga ka jasinto gagatuune ja macunkwa jamaguundu, na kaiga ka goro gagatune karîa getagwa agate, na kaiga ka rangi ya mûkû ka goro mono karîa getagwa amethisto.
13. Naru rwari rwa îna rwaarî na twiga tûtû: kaiga ka rangi ya matî ka goro, na kaiga ka rangi inyiingî ka onikisi, na kaiga ka jasipa ka rangi ya mûkûnyûni îkwenda gûtunea. Natu twiga tûu twatumîîri tûmîbukoone twa thaabu.
14. Natu twiga tûu twaarî îkûmi na twîîrî na twaandîki bwega mariîtwa ja ataana ba Jakubu, ja ûrîa mûûri jwaandîkagwa. O kaiga kaandîki riîtwa, natu twaandîki mariîtwa ja mîîrîga îrîa îkûmi na îîrî ya Israeli.
15. Nî aathithîrie tûmîkathî twîîrî twa thaabu întheru nîûntû bwa nguû ya kîbara.
16. Nabo barathithia tûmîbuko twîîrî twa thaabu na mbete ijîîrî cia thaabu nacio mbete iu ireekîrwa mîthia yo-îîrî ya nguû ya kîbara bwa îgûrû.
17. Nayo mîrigi îrîa ya thaabu îîrî baramîtonyithia mbeteene mîthieene ya nguû ya kîbara bwa mbere.
18. Mîthia îngî ya mîrigi îîu îragwatithanua na tûmîbuko tûrîa twa thaabu na tûguû twa ituro twa efodi bwa mbere.
19. Ningî rî, nî baathithîrie mbete ijîîrî cia thaabu baraciîkîra nguûne îîu ya kîbara bwa ndeene mîthieene yo-îîrî, rûteere rwa ndeene rwa efodi.
20. Barathithia mbete ingî ijîîrî cia thaabu baraigwatithania na tûguû tûrîa twîîrî twa ituro twa efodi bwa nthî rûteere rwa mbere. Baigwatithanîîrie akuî na ruuno rwa efodi îgûrû rîa mûcibi jwaayo, jûrîa jwaatumi bwega.
21. Nabo baroogania mbete cia nguû ya kîbara amwe na mbete cia efodi na kamûrigi ka rangi ya wiirû bwa îgûrû. Tontû bûû, nguû ya kîbara îreethîrwa îmamîrîte mûcibi jwa efodi jûrîa jwaatumi bwega nîkenda nguû îîu ya kîbara îtîkaathûkane na efodi o ta ûrîa MWATHANI eerîte Musa.
22. Naru rwaambambio rûrîa rwekagîrwa rungu rwa efodi nî baarûtumîîrwe na gîtambaa kîa rangi ya wiirû bwe îgûrû runthe.
23. O antû arîa mûtwe juumagîîra baragûtiriaa na ndigi bwega kûthiûrûkîra, ta ûrîa nguû ya ndwaa ya chuuma îîthagîrwa îtumi îtîkeeje gûtambûka.
24. Rwambambioone rûu ruunoone rwa nthîgûrû bararûgemia na maûa jakari ja mîtî ya mîkukumanga ya rangi ya wiirû bwa îgûrû, na ya mûkû na întuune, yatumi na mîrigi îrîa mîega buru.
25. Barathithia maûa jakari ta ntuara ya thaabu barajeekîra gatîgatî ka jau jangî ja mîkukumanga kunthe kûthiûrûkîra rwambambio rûu bwa nthî.
26. Maûa jau jaathingateene, o îûa rîa ntuara na rîa mûkukumanga, kunthe kûthiûrûkîra rwambambio rûu bwa nthî. Rwambambio rwaarî rwa gûtumagîrwa nî athînjîri-Mûrungu. Naru rwathithîrue o ta ûrîa MWATHANI eerîte Musa.
27. Nî baatumîîre Aaroni na ataana baawe kanjû cia itambaa bia mîrigi îrîa mîega buru.
28. Baratumîrwa iremba bia kîongo bia nguû îrîa njega buru, na nkobia cia nguû o ta îîu, na churubaarî cia gîtambaa kîu kîega mono.
29. Barabathithîria mîcibi ya gîtambaa kîu kîega mono gîatumi na mîtumi kîa rangi ya wiirû bwa îgûrû, na ya mûkû na întuune, o ta ûrîa MWATHANI eerîte Musa.
30. Nabo nî baathithîrie kabaû gakari ja thirû întheru ya thaabu akî, na barakaandîka nteto iji ta ûrîa mûûri jwandîkagwa, ÛJÛ NÎWE MÛTHERU WA MWATHANI ÛRÎA WATHÛRÎRI MWATHANI.
31. Baroogera mûrigi jwa rangi ya wiirû bwa îgûrû kabaûûne kau jwa gûkoogera kîrembeene îgûrû o ta ûrîa MWATHANI eerîte Musa.
32. Tontû bûû, ngûgî yonthe ya gwaka îema rîa gûtirimanîra îrarîîkua kûthirua. Antû ba Israeli nabo bamîthithîrie kûringana na ûrîa ungwa MWATHANI eerîte Musa.
33. Nî bareteere Musa îema rîa gûtirimanîra na into biaarîo bionthe; biango, na mîînjîro, na mîgaamba, na itugî na ikinyithio biaarîo.
34. Ningî nî bareetere mîgûûta ya ntûrûme na ya mbûri îrîa yaaki rangi întuune ya gûkunîkîra îema rîa gûtirimanîra, na barareeta nanga.
35. Barareeta Îthandûkû rîa kîrîkanîro, na mîgaamba yaarîo na gîtî gîa Kîaao kîarîo.
36. Meetha na into biaayo bionthe, na mîgaate îrîa yaritîri MWATHANI.
37. Barareeta gîtugî gîa kûrîkîîra taawa kîa thaabu întheru, na taawa ciaakîo, na into biaakîo, na maguta ja taawa.
38. Nî bareetere kîritîro kîa igongwana kîa thaabu, na maguta jarîa ja kûtheria na kwathûra, na ubaani îrîa yeeraga bwega, na nanga ya mwari jwa îema rîa gûtirimanîra.
39. Ningî barareeta kîritîro kîa igongwana gîa îturutia, na rûtara rwaakîo na îturutia, na ikingi biaakîo, na into biaakîo bionthe bia gûtumîka, na kîraî na gîkinyithio gîaakîo.
40. Barareeta nanga cia gûcuurua kîaragoone, na itugî biaakîo, na ikinyithio biaabio, na rwambambio rwa gûcuuria mpingîroone ya kîarago, na mîrigi yaaru, na biango bia îema na into bionthe bia gûtumîrwa îemeene rîa gûtirimanîra.
41. Barareeta nguû îrîa yaatumi bwega nîûntû bwa gûtumîrwa antû arîa atheru, ta cio nguû irîa ntheru cia mûthînjîri-Mûrungu Aaroni, na cia ataana baawe athînjîri-Mûrungu.
42. Antû nabo baathithîrie ngûgî yonthe kûringana na ûrîa bunthe MWATHANI eerîte Musa.
43. Musa aratega aroona ngûgî yonthe îrîa baathithîtie, nayo yaathithîtue kûringana na bûrîa bunthe MWATHANI augîîte. Musa arabatharima.
1. MWATHANI nî eerîre Musa atîrî,
2. “Ntukû ya mbere mweriine jwa mbere nîrîo bûkarûngîka îema rîa gûtirimanîra.
3. Bwîîke Îthandûkû rîa kîrîkanîro ku ndeene, na îthandûkû rîu bûrîkunîkîre na rwambambio.
4. Nayo meetha bûmîkûrûkie ndeene na into biaayo bûbiîke bwega meetheene. Bûkûrûkie gîtugî gîa kûrîkîîrwa taawa amwe na tawe ciaakîo.
5. Nakîo kîritîro kîa igongwana kîrîa kîa thaabu gîa kûritîra igongwana bia ubaani bûgîîke mbere ya Îthandûkû rîa kîrîkanîro na bwîîkîre rwambambio rwa gûkunîka mwari jwa îema rîa gûtirimanîra.
6. Nakîo kîritîro kîa igongwana bia gwakîîria no mwanka bûgîîke mbere ya mwari jwa îema rîa gûtirimanîra.
7. Nakîo kîraî bûgîîke gatîgatî ka îema rîa gûtirimanîra na kîritîro kîa igongwana, na bwîkîre rûûjî kîraîîne kîu.
8. Naabuî bûthithie kîarago kûthiûrûkîra îema na bûkunîke mpingîro yaakio na rwambambio.
9. “Rîu, nîrîo naagwe ûkaajûkia maguta ja kûtheria na kwathûra, wîîtûûrîrie îema rîa gûtirimanîra, na bionthe birîa birî ku ûkîtherie na gûkîathûra o amwe na into bia mîtî bionthe biaakio. Narîo îema rîu rîa gûtirimanîra rîkaa rîrîtheru.
10. Ûgatûûrîria maguta jau kîrî kîritîro kîa igongwana gîa kûritîra igongwana bia gwakîîria na into biaakîo bionthe ûbiathûre na ûbitherie. Nakîo kîritîro kîa igongwana kîu gîkaa gîkîtheru buru.
11. Wîîtûûre maguta kîrî kîraî kîrîa na gîkinyithio gîaakîo ûkîtherie na ûkîathûre.
12. Rîu nîrîo ûkareeta Aaroni na ataana baawe mwariine jwa îema rîa gûtirimanîra ûbathaambie na rûûjî,
13. na wîkîre Aaroni nguû irîa ntheru, na ûmwîtûûrîrie maguta ûmûtherie na ûmwathûre nîkenda antumîkagîra arî mûthînjîri-Mûrungu.
14. Kinya ataana baawe ûbareete ûbeekîre kanjû,
15. ningî ûbeetûûrîrie maguta ûbatherie na ûbaathûre o ta ûrîa wathithîria îthe, nîkenda bantûmîkagîra barî athînjîri-Mûrungu. Naku gwîîtûûrîrua maguta kûu nîku gûkabeetikîîria kwaa athînjîri-Mûrungu amwe na nchiarwa ciaao rîonthe na nthukîîne cionthe.”
16. Ûu nîu Musa aathithîrie, kûringana na jarîa MWATHANI aamwîrîte.
17. Tontû bûû, ntukû ya mbere ya mweri jwa mbere jwa mwaka jwa îîrî nîrîo îema rîa gûtirimanîra rîarûngîkîrwe.
18. Musa nîwe waarîrûngîkîre; ararikia ikinyithio biaarîo na areenjîra mîînjîro yaarîo, na mîgaamba yaarîo aramîîkîra na kûrûngîka itugî biaarîo.
19. Aratambûrûkia îema îgûrû rîa kîrombero kîu, na mîgûûta îrîa yaarî ya kûrîkunîkîra aramîrîkîîra îgûrû rîaarîo, o ta ûrîa MWATHANI aamwîrîte.
20. Arajûkia maiga jarîa ja maathana arajeekîra îthandûkûûne. Areekîra mîgaamba mîkang'iine ya îthandûkû na aracoka ararekîîra gîtî gîa Kîaao îgûrû rîaarîo.
21. Nawe arakûrûkia Îthandûkû rîa kîrîkanîro îemeene, na aracuuria rwambambio au mbere yaarîo ararîthiîka, o ta ûrîa MWATHANI aamwîrîte.
22. Areeka meetha îemeene rîa gûtirimanîra rûteere rwa ûrîo na oome ya rwambambio rûu.
23. Areeka mîgaate îrîa îritîri MWATHANI îgûrû rîa meetha, o ta ûrîa MWATHANI aamwîrîte.
24. Areeka gîtugî gîa kûrîkîîra taawa rûteere rwa ûmotho îemeene rîa gûtirimanîra kîerekanîrîte na meetha îîu.
25. Nawe aragwatia taawa au mbere ya MWATHANI o ta ûrîa MWATHANI aamwîrîte.
26. Au mbere ya rwambambio îemeene rîa gûtirimanîra ndeene, Musa nî eekîre kîritîro kîa igongwana kîrîa kîa thaabu o,
27. na araîîthîîria ubaani o kûringana na ûrîa MWATHANI aamwîrîte.
28. Ningî aracuuria rwambambio mwariine jwa îema rîa gûtirimanîra.
29. Au oome ya mwari jwa îema rîa gûtirimanîra areeka kîritîro kîa igongwana gîa kûritîra igongwana bia gwakîîria o. Nî aaritîîre kîgongwana gîa gwakîîria na kîa irio îgûrû rîaakîo ta ûrîa MWATHANI aamwîrîte.
30. Gatîgatî ka îema rîa gûtirimanîra na kîritîro kîa igongwana kîu areeka kîraî o na areekîra rûûjî rwa kûthaamba kû.
31. Au nîo Musa na Aaroni na ataana ba Aaroni baathaambaga njara na magûrû.
32. Nabo baathaambaga rîrîa bagûkûrûka îemeene rîa gûtirimanîra na rîrîa bagûkueria kîritîro kîa igongwana o ta ûrîa MWATHANI eerîte Musa.
33. Musa nî airigîîre kîarago kûthiûrûkîra îema rîa gûtirimanîra na kîritîro kîa igongwana. Ningî aracuuria nanga mpingîroone ya kîarago. Tontû bûû, Musa ararîîkia ngûgî îîu.
34. Nîrîo îtu rîakunîkîre îema rîa gûtirimanîra na weerû bwa ûkumio bwa MWATHANI bûroojûra îemeene.
35. Musa atoombîre gûtonya îemeene rîa gûtirimanîra tontû îtu nî rîarîkunîkîte na weerû bwa ûkumio bwa MWATHANI bwojûra îemeene.
36. Antû ba Israeli, rûgendoone rwaao runthe, baakamataga îema rîa gûtirimanîra bagîîta rîrîa akî îtu rîu rîatiga gûkunîka îema.
37. Nabo antû ba Israeli batîngîûmba gwîta bauma antû au mwanka ntukû îrîa îtu rîu rîkauma îemeene.
38. Narîo îtu rîu rîa MWATHANI nî rîakaranagia nabo rûgendoone rwaao runthe rîgîkunîkaga îema rîa gûtirimanîra mûthenya, na ûtukû nî mwanki jwakunîkaga îema rîa gûtirimanîra. Îtu na mwanki jûu nî bionagwa nî antû ba Israeli bonthe.
16. Nthiûrûkîri nî gîkundi kîa barîa baaî; îî, banthiûrûkîrîte ta kurû bantambûrangîte njara na magûrû.
17. Ndomba gûtara mîîndîîndî jaakwa jonthe. Nabo barînkûnîîra bakambikumîria.
18. Nguû ciaakwa ka bakûgaana; ka bakwiringîra kuura boona ikaa ciaaû.
19. Îndî gwe MWATHANI, ûgákara kûraaja! Itû nîgwe inya yaakwa, îjaanga ûnteethie!
20. Onokia mwoyo jwaakwa jûtîkooragwe, tunyûkia ûtûûro bwaakwa bûtîkooragwe nî kurû iji!
21. Ndita kanyueene ka ngatûnyi, ûmbonokie kuuma ngoji cia mbogo.
22. Rîrîa MWATHANI oombaga into karaaja, nî ni aambîrîîrie naani.
23. Ndoombîrwe o tene, kîambîrîriene buru, mbere ya nthîgûrû îtîrombwa.
24. Ndaarî o mbere ya îria rîgîa o, na kinya mbere ya ithima bitûrîka.
25. Nî ndaarî o mbere ya irîma biûmbwa na kinya mbere ya tûrîma twîthîrwa tûrî o.
26. Ndaarî o mbere ya Mûrungu oomba nthîgûrû na ithaka biaayo, na kinya mbere ya oomba mûthetu.
27. Agîîka îgûrû arîa rîrî, nî ndaarî o, na akîathûrana îgûrû na îria nî ndaarî o.
28. No ndaarî o agîîka matu îgûrû, na no ndaarî o agîtûra nthongo cia îria.
29. Rîrîa eekagîra mîanka ya îria, nîkenda rûûjî rûtîgaakûrûkage arîa arwîkîte, nî ndaarî o, na no ndaarî o rîrîa eekagîra mûsingi jwa nthî.
30. Rîu nî ndaarî amwe nawe ta mwaki. Naani nî ndaamûgwîragia ntukû cionthe nîûntû nî ndaarî amwe nawe.
31. Nî ndaagwîragua nîûntû bwa nthîgûrû yaawe, na nkagwîrua nîûntû bwa antû barîa batwîre kû.
1. Rûûneene rûkîîrî kainda athînjîri-Mûrungu barîa anene bonthe amwe na akûrû barîa atongeeria bareetîkanîîria kûûraga Jesû.
2. Baramûtheeka na baramwikia kîrî Pilatû, ûrîa waatûmi kuuma Roma aa mûrûngamîîri wa nthîgûrû îîu.
3. Rîrîa Judasi ûrîa wamûkûnyanîîre oonere Jesû agûtuîrwa kûûragwa, nî airirîre na aracokeria athînjîri-Mûrungu barîa anene na akûrû barîa atongeeria mbeecha irîa mîrongo îthatû cia fetha.
4. “Nî mbîîtie gûkunyanîra muntû ûtî na maatia ooragwa.” Îndî baramwîra atîrî, “Bûu tî ûntû kîrî tuî! Jau nî mantû jaaku.”
5. Judasi aragera mbeecha iu kîûrûûne, na areeta araicuuria.
6. Athînjîri-Mûrungu barîa anene barajûkia mbeecha iu na barauga, “Waatho bûtîtîkîîrîtie tûringanîra mbeecha iji na mbeecha cia kîûrû nîûntû nî itûmîte muntû ooragwa.”
7. Tontû bûû, bararîîkania na bareeta kûgûra kîthaka kîa mûûmbi wa nyongû nacio nîkenda bathikaga ageni ku.
8. Kîu nîkîo gîtûmi kinya naarua tûrî, kîthaka kîu gîtagwa Kîthaka kîa Tharike.
9. Rîu nteto irîa kîroria Jeremia augîîte iroojûra: “Nî baajûkîrîe mbeecha irîa mîrongo îthatû cia fetha. Mbeecha iu nîcio antû ba Israeli beetîkîîrîtie kûrîaa nîûntû bwaawe.
10. Baragûra nacio kîthaka kîa mûûmbi wa nyongû o ta ûrîa Mwathani aambîrîte.”
11. Jesû ararûngama mbere ya mûrûngamîîri ûrîa waathaga nthîgûrû îîu. Mûrûngamîîri ûu aramûûria atîrî, “Ûgwe nîgwe mûnene wa Ayahudi?” Jesû aramwîra, “Ûkuuga u.”
12. Îndî rîrîa athînjîri-Mûrungu barîa anene na akûrû barîa atongeeria baamûthitangîre, Jesû arakira ki.
13. Tontû bûû, Pilatû aramûûria, “Ningî nî ûkwigua mantû jarîa bagûkûthitangîra?”
14. Îndî Jesû arakira ki na ararega kûmûcokeria noo atîa. Bûu bûrarigaria mûrûngamîîri ûu mono.
15. Nî kwaarî wîîthîre mûrûngamîîri wa nthîgûrû îîu kûthaûra mûbungwa ûmwe ûrîa kîrîndî kîaugaga athaûrwe îgiita rîa thîgûûnkû ya Pasaka.
16. Îgiiteene rîu nî kwaarî muntû ûmûthûûku mono ncheera weetagwa Baraba.
17. Tontû bûû, rîrîa antû boothûranîre amwe, Pilatû nî aaboorîrie atîrî, “Nûû bûkûenda mbûthaûrîra: Nî Baraba kana nî Jesû ûrîa wîtagwa Kristû?”
18. Aboorîrie ûu nîûntû nî aamenyaga bwega atî nî rûriitho rwatûmîte banenkanîra Jesû ooragwa.
19. Rîrîa Pilatû aarî akuî kûgiita îgamba, mwekûrû waawe nî aatûmanîre kîrî we arauga atîrî, “Ûgátonyeera mantûûne jegiî muntû ûu ûtî na maatia, nîûntû ûtukû nî ndîrathangîkîre mono kîrootoone nîûntû bwaawe.”
20. Athînjîri-Mûrungu barîa anene na akûrû barîa atongeeria bareerenca antû bauge nî bathaûrîrwe Baraba na bauge Jesû ooragwe.
21. Mûrûngamîîri ûu, tawe Pilatû arabooria kaîrî, “Nî ûrîkû kîrî baba bobaîrî bûkwenda mbûthaûrîra?” Baramûcokeria, “Nî Baraba!”
22. Pilatû arabooria, “Nî atîa nthithia na Jesû ûrîa wîtagwa Kristû?” Bonthe barauganîria, “Mwambithie!”
23. Pilatû arabooria, “Nîkî bûkwenda aambwa? Nî ûthûûku bûrîkû athithîtie?” Îndî bararinga gîtuma nkûrûki bakiugaga, “Mwambithie!”
24. Rîrîa Pilatû oonere atî mantû nîka jagwîta na mbere jakîthûûkaga, na gîtuma ka gîkwongeereka, nî aajûkîrie rûûjî na arathamba njara mbere yaao akiugaga, “Ûûni tî ni ndaatûma muntû ûûjû ooragwa, akua nî îgûrû rîeenu!”
25. Antû bonthe baramûcokeria, “Îî, nî akuee u atî nî tuî na nchiarwa cieetû twamûûraga!”
26. Rîu Pilatû arareekeria Baraba kuuma ncheera, na aranenkanîra Jesû beeta kûmwamba.
Songe Bible 2018
KIMERU BIBLE WITH DC Bible Society of Kenya, 2009, 2018