Biblia en un año

1. Jayave yandeYa jei cheve:
2. “Nde kuimbae, emae Jerusalén kotɨ jare emondo neñee o mbaemboetea reta kotɨ. Emoërakua maratuta ɨvɨ Israel vae.
3. Ere ɨvɨ Israel kotɨ: ‘YandeYa Tumpa jei körai: Che ayovaicho ndekotɨ, anoeta chekɨsepuku jɨru güi, jare ayukata ndegüi jupi vae reta jare iyoa vae reta.
4. Chekɨsepuku anoe jɨru güi ramo, ayukata opaetei arayevɨ güive ɨvɨtuguasu kotɨ.
5. Jare opaete vae oikuaata che ko anoe chekɨsepuku jɨru güi vae, jare ngaraa añoña ye jɨru pe.’
6. Jare nde kuimbae, eyaeo ndepɨatɨtɨ yae jare jasɨ katu yae reve; eyaeo opaete vae reta jovake.
7. Jae reta jei yave ndeve: ¿Maera pa reyaeo? Nde ere chupe reta: Oime mbae jërakua; jare jókuae oyeapota yave, opaete vae ipɨatɨtɨta, mbaetɨ etei kia ipuereta mbae oyapo, orɨrɨita okɨɨye güi. Ko ma ou jare oyeapota, che ndeYa Tumpa jae.”
8. YandeYa Tumpa jei cheve:
9. “Nde kuimbae, emoërakua maratuta vae körai: YandeYa Tumpa jei körai: ‘¡Kɨsepuku, kɨsepuku! Oyeimbee jare jembipe oï.
10. Oyeimbee oporoaseokɨ̈ti vaerä, jembipe overa vaerä;
11. omoembipe güɨnoi vaerä ipo pe. Kɨsepuku jaimbe jare jembipe oï, omee vaerä oporoyuka vae ipo pe.
12. Nde kuimbae, ¡neräse jare jasɨ katu reve eyaeo, echa kuae kɨsepuku oyukata chembae vae reta jare opaete mburuvicha reta Israel pegua! Jae reta omanota chembae vae reta ndive, ekua ndeu re ndepɨatɨtɨ güi;
13. jae ko kuae rupi amboaporova chembae vae reta. Jae reta ngaraa etei ipuere oyapo mbae; opaeteita okañɨtei. Che peYa ko jae jökorai.’
14. Nde kuimbae, emoërakua maratuta vae; ekua ekua ndepo re emboarasɨuka yeyé kɨsepuku oporoyukata vae. Kuae ko kɨsepuku yavaete oparapiti vae, omomburu jeta vae oipota rupi.
15. Kuae kɨsepuku oporomongɨɨye yaeta, jeta yaeta oporoyuka. Opaete o reta rupi oimeta kɨɨye kɨsepuku oporoyuka vae güi. Kuae kɨsepuku jembipe oï overa vaerä, oyeimbeeasɨ oporoaseokɨ̈ti vaerä vae.
16. Kɨsepuku, ¡nderaimbeasɨ yeyé aipota reï, oipota rupi reporoasɨa vaerä!
17. Che vi akua akuata chepo re chearasɨ poi regua. Che peYa ko jae kuae.”
18. YandeYa Tumpa jei cheve körai:
19. “Nde kuimbae, eyapo mókoi tape, mburuvicha guasu Babilonia pegua oasa vaerä ikɨsepuku ndive jokoropi. Mókoi reve tape toë jókuae tëtaguasu güi. Tape oyemboɨpɨa ñavo emokañɨmaa, kia nunga tëta kotɨ ko ojo jókuae tape vae.
20. Eyapo metei tape jokoropi ou vaerä mburuvicha guasu ikɨsepuku ndive tëta guasu Rabá pe, Amón iñemuña reta jëta jare Jerusalén tëta guasu jëguambae Judá pegua pe.
21. Echa mburuvicha guasu Babilonia pegua ojota tape jakambɨa pe, jókuae mókoi tape oyemboɨpɨa pe, oyembosuerte vaerä uvɨ rupi, oparandu itumpa-raanga reta pe jare mbaemɨmba ipɨagüe rupi oikuaa vaerä.
22. Jare ipo iyakatu kotɨ oë chupe suerte Jerusalén regua, oporepeña vaerä jese, omboɨpɨ vaerä oporoyuka, osapúkai vaerä sapúkai ñeraro pegua, oyoka vaerä jöke reta tembiporu öke iyokaa pe jare omopüa vaerä yeupika reta tëta guasu ikësea re, opaetei vaerä oñova.
23. Ërei Jerusalén pegua reta pe jókuae suerte regua oñemoërakua vae apu ramiñota, ñemoïru oyapo jae reta ndive jeko pegua. Ërei kuae ko metei yemomaendúa mbaeyoa oyapo reta vae re jare oyepɨɨuka reta vaerä.
24. Jáeramo yandeYa Tumpa jei körai: Ikavimbae peyapo vae jare peporoyuka vae oyekuaa oï; opaete mbaeyoa peyapo vae oyekuaa oï. Echa opaete peyoa reta re yemomaendúa oï ramo peñemeeukata perovaicho reta ipo pe.
25. Jare nde mburuvicha guasu Israel pegua jeko kavimbae yae vae, oporoyuka vae, ou oväe ndeve ara, iyapɨ vaerä opaete ikavimbae reyapo vae.
26. Che ndeYa Tumpa jae körai: Opɨ̈rota ndegüi neäka-regua, jare äka-regua jembipe vae, jare opaete oyepoepɨta. ¡Oyembotuichata, oñemomichi yogüɨreko vae reta jare oñemomichita, oyembotuicha yogüɨreko vae reta!
27. Opata amboaiasɨ yeyé aeya tëtagüerä. Ërei kuae oyeapota ou yave jókuae ambouta vae, oyapo vaerä jupi vae.
28. Nde kuimbae, emoërakua maratuta Amón iñemuña reta imbaeyuvanga katu vae reta kotɨ, ere: CheYa Tumpa jei körai: Kɨsepuku, kɨsepuku jɨrumbae ma oï oporoaseokɨ̈ti vaerä, jembipeasɨ overa oï oporoyuka vaerä.
29. Omoërakua ndeve vae añetembae ko, imbaekuaa vae maratuta vae re omombeu ramiño ko, apu ko. Kɨsepuku pe opata oñeaseokɨ̈ti jókuae oporoyuka vae reta. Köiño ma ou ara oiporara reta vaerä.
30. ¡Eñoña ndekɨsepuku jɨru pe! Che rojäata ndeɨvɨ pe, jókuae ɨvɨ rea pɨpea pe.
31. Aitɨta nderé chearasɨ, metei tata jendɨ yavaete vae rami; romeeta kɨɨyea yae reta jare ipïrimbae oporomboai vae reta ipo pe.
32. Peyeapɨukata, perugüɨ oyepɨyereta kuae ɨvɨ pe, ngaraa ye ma kia imaendúa peré, echa che peYa jae jökorai.”
1. YandeYa jei cheve:
2. “Nde kuimbae, ere kuae tëta guasu oporoyuka vae pe mbae oasata vae. Emboeko opaete pɨ̈chɨi yae oyapo vae re,
3. ere chupe körai: ‘YandeYa Tumpa jei körai: Tëta guasu, oyuka ipo reta vae jare oyapo itumpa-raanga retarä oyemongɨa pɨpe vae, ¡orata ma ndeve!
4. Jeta reporoyuka vae rupi ndeyoa, jare tumpa-raanga reta reyapo vae rupi reyemongɨa; jókuae rupi jeieteño remoköi ora ndeyeupe, jare ou ara iyapɨ vaerä ndeve. Jáeramo roapota tëtaguasu reta nemomarai vaerä, jare opaete vae reta ndeyóyai yóyai vaerä.
5. Köiño ñogüɨnoi vae jare mombɨrɨ ñogüɨnoi ndegüi vae ndeyóyai yoyaita, nde tëta guasu nerërakua itumpa-raanga pota vae pe jare netɨnɨe ikavimbae pe vae.
6. Nderapɨpe yogüɨreko mburuvicha reta Israel pegua vae, ipuere rupi oporoyuka reta.
7. Nderapɨpe yogüɨreko vae reta omboeteä tu jare ichɨ, oiporarauka reta ketɨgua pe, opɨ̈ro reta mbae tɨ̈reɨ güi jare imemano vae güi.
8. Pemboeteä mbaemboetea renda reta chembae jare cheara mbutuu pegua.
9. Nderapɨpe yogüɨreko vae reta iyapu reve imiari vae reta oporoyukauka, yogüɨraja reta aretea pe oñemee yave mbaemboete ɨvɨtɨ re tumpa-raanga reta pe, jare oyapo reta pɨ̈chɨi cheve vae.
10. Amogüe reta oasa tu jembireko ndive, ani omboeteä kuña imbaerasɨ yave oï, yasɨ ñavo vae.
11. Amogüe reta oyapo ikavimbae yae vae: Oasa japicha jembireko ndive, taɨ jembireko ndive, ani oasa jeindɨ tu tee vae ndive.
12. Nderapɨpe yogüɨreko vae reta oipɨɨ vɨari korepoti oyuka vaerä ïru vae; oiporuka korepoti oasa ete okovara ye vaerä jese, oyuvanga katu japicha re jare iñakañɨ reta chegüi. Che peYa jae.
13. Akua akuata chepo re chearasɨ yae ndembaeyuvanga katu jare reporoyuka vae jeko pegua.
14. Agüɨye eyemongeta ndepuereta reyemboɨ cheróvai rojäa yave. Che peYa jae jare ayapota kuae:
15. Romoaita opaete ïru tëtaguasu reta rupi, romoaita opaete ɨvɨ rupi, rotɨota opaete ndekɨa cheróvai vae güi;
16. nde aeño reñemoërakua pɨ̈chɨiukata ïru tëtaguasu reta rupi, ërei chekuaata che ko jae ndeYa vae.’ ”
17. YandeYa jei cheve:
18. “Nde kuimbae, Israel iñemuña reta opa oyepoepɨ chegüi mbae ikɨagüe oë iárambo rami; jae reta ko jiero iyu vae, estaño, jiero, plomo horno pe rami; ërei oyepoepɨ reta korepoti ikɨagüe oë rami.
19. Jáeramo, che peYa Tumpa jae körai: Pe reta opa peyepoepɨ mbae ikɨagüe rami ramo, che pomboatɨta Jerusalén mbɨte pe.
20. Kia omboatɨ korepoti, jiero iyu vae, jiero, plomo jare estaño horno pe, omondɨkui vaerä rami, jökorai pomboatɨta chearasɨ yae reve pomondɨkui vaerä.
21. Pomboatɨta tëta guasu pe, joko pe ayatapɨta peré chearasɨ yae reve jare opata pomondɨkui.
22. Korepoti oyemondɨkui horno pe rami, peyembondɨkuita tëta guasu pe. Jayave pe reta chekuaata che peYa ko aitɨ chearasɨ peré vae.”
23. YandeYa Tumpa jei cheve:
24. “Nde kuimbae, ere ɨvɨ Israel pe: Nde ko ɨvɨ reiporara ama re jare ɨ re chearasɨ rupi vae;
25. nde ko jae ɨvɨ, neñeemombeúa reta yaguapope rami oporoyuka vae; oporoyuka reta, opɨ̈ro reta ɨvɨ jare mbaeyekou, ombojeta reta imemano vae tëta guasu pe.
26. Ndesacerdote reta oporomboe kaviä cheporookuai re, omongɨa reta chero mbaemboetea; mbaetɨ omboyoavɨ reta oporomboe oñeñono tee vae oñeñono teembae güi, mbaetɨ oikuaauka reta ikɨa Tumpa jóvai vae ikɨambae vae güi. Mbaetɨ omboete reta cheara reta mbutuu pegua, jare mbaetɨ chemboete reta.
27. Nderuvicha reta aguarayaɨmba reta rami oporoyuka, opɨyere reta tugüɨ, oporoyuka reta oyemboikokatu vaerä.
28. Neñeemombeúa reta omombeu jaangaiño mbae outa vae, imbaekuaa vae maratuta vae re omombeu iyapu reve ramiño ko, jei reta: ‘YandeYa Tumpa jei körai.’ Ërei che mbaetɨ chemiari chupe reta.
29. Opaete vae reta oporogüɨrekoasɨ katu jare omaeñomi reta; omaepɨ̈ro reta paravete vae güi jare oata mbae re vae güi, jare oyapo reta jupimbae ketɨgua reta pe.
30. Aeka tëi kia oñemoe kuae ɨvɨ re vae, oepɨ vaerä, oyerure vaerä cheve, agüɨye vaerä opa amboai, ërei mbaetɨ aväe chupe.
31. Jáeramo aitɨ chearasɨ jese reta, chearasɨ yae reve amboai reta, aiporarauka vaerä chupe reta jeko. Che peYa Tumpa jae kuae.”
1. YandeYa güeru ye yave tembipɨɨ güi Sión, ¡ropaɨuecha rami ko!
2. Jayave ropuka, rotairari royerovia ramo. Jayave tëtaguasu pegua reta jei: “¡Tumpa omborɨ tuicha rupi kuae reta!”
3. Añete, tuicha rupi oremborɨ oreYa, royerovia roï.
4. ¡OreYa Tumpa, opa orereru ye tembipɨɨ güi, ɨ̈aka reta Neguev pegua rupi ɨ oguata ye rami!
5. Oyaeo reve omaetɨ vae reta, oyerovia reve ombaearɨvota.
6. Ojo yaeo reve temitɨ kavi güɨraja vae, oyerovia reve oyerova yeta, güeru reve imbaagüɨye reta.
23. Japicha pe omboeta mbae re vae, taɨkue rupi imboetea yae ko, jókuae iñee yeaeä raanga vae güi.
19. Jáeramo, cherɨvɨ reta, yandepuere yaike yakɨɨyembae reve cuarto oñeñono tee kavi yaea pe Jesucristo jugüɨ rupi,
20. tape ipɨau jare oikove vae jae oipea asoya o imboyaoa vae rupi, kuae ko jae Cristo jete;
21. ñanoi ramboeve sacerdote tuichagüe vae, Tumpa jo pe,
22. yayemboya Tumpa re yandepɨa jupi reve, yarovia kavi reve, yandepɨa oyetɨo reve yemongeta ikavimbae güi, jare yanderete oyeyoe reve ɨ ikɨambae pe.
23. Jekuaeño ñanemomɨ̈rata yaipoɨumbae reve ñaäro vae re, echa jupi ko jókuae güɨrökuavee vae.
24. Yaeka kërai yayomborɨ päve vaerä, ñañomoäta ngatu yayoaɨu vaerä jare tembiapo reta ikavigüe pe.
25. Agüɨye yaata yemboatɨa pe, amogüe vae reta oyepokuaa rami, jaeño yayomboarakuaa; jeiete ñañemoäta ngatu, yaikuaa jókuae ara köi yae ramo.
26. Echa yandeyoa yave ñanekɨ̈reɨ reve añete vae yaikuaa güire, mbaetɨ ye ma kia oñemee vaerä mbaeyoa reta re;
27. jaeño ñaärota yavaetegüe Tumpa iporojäa, tata yavaetegüe omboaita Tumpa kotɨ oyemboyovaicho vaerä reta.
28. Kia nunga vae oyapoä Moisés iporookuai yave, mókoi ani mboapɨ vae omombeu yave iyoa re, tomano oyepararekombae reve.
29. Vɨtei pa güɨröɨro iyeugüi Tumpa Taɨ vae reta, oiporara yaeta ko, jare güɨröɨro tugüɨ morogüɨrökuavee päve pegua vae, jókuae tugüɨ rupi ñaneñono tee tëi iyeupeguarä, jökorai güɨröɨro Espíritu ipɨakavi.
30. Yaikuaa ko Tumpa jei: “Oiporarauka vae ko che. Che tamboekovia chupe.” Jei vi: “YandeYa oiporaraukata imbae vae reta pe.”
31. ¡Yavaete yae ko yaa yave Tumpa oiko tee vae ipo pe!
32. Ërei pemaendúa ara reta oasagüe re, kërai Cristo re peyemboe yave, ïru vae reta oiporarauka yae peve yave pepɨ̈rata peporogüɨrovia pe,
33. ïru vae reta pereröɨro, echa jei reta ikavimbae vae peve jare oyapo reta ikavimbae vae peve, opaete vae reta jovake. Jaeramiño vi peñemoïru pekɨ̈reɨ ngatu reve pe rami oiporara vae reta ndive.
34. Echa peiparareko tembipɨɨrɨru pe ñogüɨnoi vae reta. Jare ïru vae reta pembaembae opɨ̈ro pegüi yave, peiporara peyerovia katu reve. Echa peikuaa penoi ko ara pe mbaembae ikavigüe opambae.
35. Jáeramo peyeko avei Tumpa re, echa jókuae tuicha rupi jekoviata peve;
36. echa jaekavi ko pepɨaguasu vaerä, peyapo vaerä Tumpa jemimbota, jökorai penoi vaerä jae güɨrökuavee vae.
37. Echa Tumpa Iñee pe jei: “Echa joko ñoete ma, jókuae outa vae outa ko.
38. Tumpa ombojupi vae güɨnoita tekove oporogüɨrovia ramo; ërei oime yave kia opia, ngaraa chemboyerovia.”
39. Ërei yande jaeä ko Tumpa güi oyerova ye okañɨtei vaerä vae reta, yande reta ko jae oyemboasauka iporogüɨrovia re vae reta.
Guarani Bible 2001
Biblia DC Guaraní Bolivia Bolivian Bible Society, 2001