|
|
| 1. YandeYa jei cheve: “Ekua egua metei ɨrɨru ñaeu pegua, oñaeu-apo vae güi, jare eraja nderupíe amogüe tenondegua reta tëta pegua jare amogüe sacerdote reta tenondegua. |
| 2. Javoi pekua ɨvɨtɨ päu ipe kavi vae Ben-hinom pe, kuaraɨ oëa kotɨ öke oï vae re katu oï vae pe, jare joko pe emoërakua ñee reta, che amombeuta ndeve vae. |
| 3. Ere körai: ‘Judá pegua mburuvicha guasu reta jare Jerusalén pe peiko vae reta, peyeapɨsaka kuae ñee yandeYa Imbaepuere yae ete vae Israel iTumpa jei vae re: Aruta susere ikavimbae yae vae kuae ɨvɨ re, jare kia nunga vae oendu yave oipɨayuka eteita. |
| 4. Echa Israel iñemuña reta chereeya, jare omongɨa reta kuae ɨvɨ; oapɨ reta ikäti kavi vae incienso tumpa-raanga reta pe, jae reta mbaetɨ oikuaa vae pe, iñemuñagüe reta ave jare mburuvicha guasu reta Judá pegua mbaetɨ oikuaa vae pe; jare kuae ɨvɨ omotɨnɨe reta jekombae jugüɨ pe. |
| 5. Omopüa reta vi mbaemboete renda reta Baal peguarä, opaetei oyeapɨ vaerä joko pe imichia reta Baal pe; che mbaetɨ etei ayókuai jese reta vae, mbaetɨ vi kërai ave yepe ayemongeta jese vae. |
| 6. Jáeramo oväeta ara kuae ɨvɨ mbaetɨ vaerä ma oñeenɨi Tofet, ani ɨvɨtɨ päu ipe kavi Ben-hinom pe ave, jaeño oñeenɨita Ɨvɨtɨ päu ipe kavi vae Yeyuka Renda. |
| 7. Kuae pe Judá pegua reta jare Jerusalén pegua reta iyemongeta opata arokomegua chugüi reta. Ameeta jovaicho reta ipo pe oa reta vaerä, opa vaerä oyuka reta; jare jëogüegüe reta chucha reta jembiurä jare mbaeporou reta jembiurä. |
| 8. Aipoepɨta kuae tëta opɨta vaerä ipombae jare kɨɨyearä, opaete oasa jokoropi vae ipɨakañɨta jese jare okɨɨye yaeta opaete oyemboai vae re. |
| 9. Ameeukata jou reta taɨ reta jare tayɨ reta ae, jare oyoupii aeño oyou retata, tovaicho reta oiporarauka chupe reta yave, oikëse reta yave tëta guasu.’ |
| 10. Kuae opa rere yave, eyoka jókuae ɨrɨru yogüɨraja nderupíe vae reta jóvai, |
| 11. jare ere chupe reta: ‘YandeYa Imbaepuere yae ete vae jei körai: Kia oyoka ɨrɨru ñaeu pegua yave opa oyembojaɨ jare mbaetɨ ma ikavi oyeapo kavi ye vaerä, jökoraita ayapo kuae ɨvɨ Judá jare tëta guasu Jerusalén. Omanogüe reta oñotɨ retata Tofet pe, mbaetɨ ketɨ oñeotɨ vaerä jeko pegua. |
| 12. Jökoraita ayapo kuae tëta guasu jare pɨpegua reta. Tofet rami. |
| 13. O reta Jerusalén pegua jare mburuvicha guasu reta Judá pegua jo reta, jare o reta iárambo ikäti kavi vae incienso oapɨ reta yasɨtata reta pea pe, jare omee reta mbota vino oyepɨyere vae tumpa ambuae pe vae, ikɨata opɨta cheróvai Tofet rami.’ ” |
| 14. Kuae jaɨkue rupi Jeremías ou ye Tofet güi, yandeYa omondo jee re imiaría güi, jare oyemboɨ tupao joka pe jei opaete vae reta pe: |
| 15. “YandeYa Imbaepuere yae ete vae Israel iTumpa jei: ‘Ambouta kuae tëta guasu re jare opaete tëta iyɨvɨrigua reta re tembiporara amoërakua chupe reta vae, echa oyembopɨa täta yae reta mbaetɨ vaerä oendu reta cheñee reta.’ ” |
|
|
| 1. Sacerdote Pasur, Imer taɨ, jae ko tupao re oyangareko vae reta juvicha; jae oendu Jeremías omoërakua mbae maratuta vae yave, |
| 2. omondo oinupauka jare oñonouka ɨvɨrakua oï öke ɨvatea Benjamín jee vae kotɨgua pe, tupao iyɨpɨ pe. |
| 3. Pɨareve pe Pasur omondo güeruruka Jeremías ɨvɨrakua güi. Jayave Jeremías jei chupe: “YandeYa oipoepɨ nderee Pasur, Magor-misabib pe. |
| 4. Echa yandeYa jei körai: ‘Ropoepɨta kɨɨye rupi reiko vaerä jare opaete ndevɨa-ïru reta okɨɨyeta ndegüi; nderovake ndevɨa-ïru reta opata omano tovaicho reta ipo pe. Ameeta opaete Judá pegua reta mburuvicha guasu Babilonia pegua ipo pe, jae güɨrajata iɨvɨ güi ani oyukata kɨsepuku pe. |
| 5. Ameeta vi tovaicho reta ipo pe opaete mbaeyekou kuae tëta guasu pegua, opaete mbaembae jare opaete mbaembae jepɨ vae reta, jare opaete mburuvicha guasu Judá pegua imbaembae jepɨ vae reta, güɨraja vaerä Babilonia pe. |
| 6. Jare nde, Pasur, reyererajaukata Babilonia pe, opaete ndero pegua reta ndive. Joko pe remanota, joko pe vi neñotɨ retata opaete ndevɨa-ïru reta ndive, jókuae ndeapu reve remoërakua mbae maratuta vae re chupe vae reta.’ ” |
| 7. CheYa Tumpa, nde ko chembotavɨ, jare che chetavɨ; nepɨ̈rata yae chegüi jare chemoamɨri. Ara ñavo cheyóyai yóyai reta vae; opaete vae opuka cheré. |
| 8. Chemiari ñavo, amoërakua susere jare kañɨtei; cheyóyai yóyai reta jare opuka reta avei cheré, echa neñee amoërakua. |
| 9. Jae yave: “Agüɨye mo tachemaendúa cheYa re, agüɨye mo tachemiari jee re.” Ërei jayave neñee cheɨvɨte pe tata rami, chekägüe rupi ojo, aipota tëi aropɨa, ërei mbaetɨ chepuere. |
| 10. Aendu jeta vae iñeenguru jei reta: “¡Oime kɨɨye opaete rupi!” “¡Peyu, ñañeapo Jeremías re!” Chevɨa-ïru reta ave oäro ambaeyavɨ vaerä. Jei reta: “Güɨramoi ombaeyavɨta; jayave jëguata yandeve, javoi yayepɨ jese.” |
| 11. Ërei ngatu nde cheYa, oime reï che ndive, metei ñeraro regua imbaepuere yae vae rami; jáeramo, oeka teko cheré vae reta, ngaraa ipuere chemoamɨri; ipuereä jeko pegua imara yaeta opɨta jekuae avei rupi, jare ngaraa iñakañɨ reta chugüi vae. |
| 12. CheYa Imbaepuere yae ete vae, nde remae kavi jupi rupi yogüɨreko vae re vae, nde reikuaa katu kuimbae ipɨa iyemongeta vae, eechauka cheve kërai reiporarauka chupe reta vae, echa che añeñono ndepo pe. |
| 13. ¡Petairari yandeYa pe, pemboete yandeYa! Echa jae oepɨ oyererekoasɨ katu vae, jeko kavimbae reta ipo güi. |
| 14. ¡Amotareɨ jókuae ara aa pɨpe vae! ¡Jókuae ara chesɨ güi aa vae agüɨye toyemboete! |
| 15. ¡Tijeko jókuae kuimbae omboyerovia cheru vae, omombeu yave chupe michia raɨ kuimbae ko oa chupe vae! |
| 16. ¡Jókuae kuimbae, toiko tëta guasu reta yandeYa opa omboai jekuae avei pegua rami! ¡Toendu avei täse ndeimbove yave, jare kuaraɨ ara mbɨte yave, sapúkai ñeraro pegua, |
| 17. echa mbaetɨ omaeño amano chesɨ jɨe peve! Jökorai chesɨ jɨe oikota tëi ko cheve tɨvɨarä, jare che mbaetɨta tëi aa. |
| 18. ¿Maera ra aë chesɨ jɨe güi, aecha vaerä jasɨ katu vae jare mbɨatɨtɨ, amano regua ñemomarai pe? |
|
|
| 1. Oyerovia ko, jupi rupi yogüɨreko vae reta, yogüɨreko yandeYa iporookuai rupi vae reta. |
| 2. Oyerovia ko, yandeYa iporookuai oyapo vae reta, jare oeka opaete ipɨa ndive vae reta; |
| 3. echa mbaetɨ ko oyapo ikavimbae, jae jemimbota rupi yogüɨreko vae reta. |
| 4. Nde reporookuai ko, oyembopo kavi vaerä opaete ndeporookuai reta. |
| 5. ¡Mbae mona, aiko avei ndeporookuai reta jeigüe rupi! |
| 6. Jayave ngaraa añemomaraiuka, aendu katu yave opaete ndeporookuai reta. |
| 7. Romboeteta chepɨa sɨmbi rupi kavi, aikuaa yave ndeporookuai jupi vae. |
| 8. ¡Ayapota ndeporookuai jeigüe! ¡Agüɨye chereeya ete! |
|
|
| 13. Ketɨgua omborɨ ipía vaerä vae güi epɨ̈ro jemimonde, epɨ̈ro chugüi, omborɨ ombopiauka vaerä vae jeko pegua. |
|
|
| 1. Añave cherɨvɨ reta, pomoñera jare pomboarakuaa yandeYa Jesús re, kërai peyemboe oregüi kërai peiko vaerä jare pemboyerovia vaerä Tumpa, jökorai jeiete avei peyapo. |
| 2. Echa pe reta peikuaa mborookuai reta romombeu peve yandeYa Jesús oreokuai vae. |
| 3. Echa Tumpa jemimbota ko peñeñono tee vaerä chupeguarä. Peyembosɨrɨ vaerä aguasa güi; |
| 4. metei ñavo pegüi güɨnoi vaerä jembireko ae, jupi rupi jare mboromboete rupi, |
| 5. agüɨye pekuña pota güiño, echa jökorai ko Tumpa re güɨroviambae reta. |
| 6. Agüɨye peyapo kuae nunga ikavimbae vae. Echa kuae nunga ikavimbae vae peyapo yave, peyapo ko ikavimbae vae perɨvɨ reta pe. Echa yandeYa oiporaraukata ko peve kuae re, romombeu ma peve rami, |
| 7. echa Tumpa mbaetɨ ko ñanereenɨi yaiko vaerä pɨ̈chɨi vae pe, ñanereenɨi ko yaiko tee vaerä chupeguarä. |
| 8. Jáeramo, kia güɨröɨro yave oreporomboe, güɨröɨro ko Tumpa, jókuae omee yandeve Espíritu Santo vae. |
| 9. Ërei mboroaɨu penoi vae regua, aecha mbaetɨ jupi aikuatía vaerä peve. Echa peikuaa ma Tumpa pemboe ma ko peyoaɨu vaerä. |
| 10. Jare pe reta peaɨu ko opaete oporogüɨrovia vae Macedonia pegua reta. Ërei pomoñera jeiete avei peyoaɨu yae cherɨvɨ reta; |
| 11. jare peiko pɨagüive avei, peyemoambeko peparavɨkɨ re ae. Peparavɨkɨ pepo pe etei ore poyókuai rami. |
| 12. Jökorai yave, peyemboeteukata ko oporogüɨroviambae vae reta pe, jare ngaraa mbae oata peve. |
| 13. Cherɨvɨ reta, mbaetɨ roipota pepɨta peikuaambae omanogüe vae reta regua, agüɨye vaerä pepɨatɨtɨ, jókuae mbaetɨ mbae oäro vae reta rami. |
| 14. Echa yande yarovia Jesús omano ko jare oikove ye ko. Jökoraiño vi Tumpa omoingove yeta Jesús ndive oporogüɨrovia jese vae reta. |
| 15. Jáeramo romombeu peve yandeYa omombeu oreve vae, kërai yande oimeño yaikove yandeYa ou ye yave vae reta ngaraa yande räri yaja omanogüe vae reta güi. |
| 16. Echa yandeYa etei ogüeyɨta ara güi ñee mbaepuere pegua ndive, araɨgua tenondegua vae iñee jare Tumpa jemimbɨ guasu ndive. Jare Cristo re güɨrovia reve omano vae reta oikove yeta jae reta räri; |
| 17. jaɨkue rupi yande yaikoveño ñaï vae reta yayererajaukata jae reta ndive amapɨtu re ñaövaiti vaerä yandeYa. Jare jökorai yaikoita yandeYa ndive jekuae avei pegua. |
| 18. Jáeramo, peñomoäta ngatu päve kuae ñee reta pe. |
|
|
| Guarani Bible 2001 |
| Biblia DC Guaraní Bolivia Bolivian Bible Society, 2001 |