1:1-21 1. Abdías omboresive ñee yandeYa güi Edom regua, mbae oechauka chupe vae rupi. Roendu yandeYa güi ñee; metei ñee jerajaa ojo tëtaguasu reta rupi, jei vaerä chupe reta: “¡Pepüa! ¡Yaja ñañeraro Edom pegua reta ndive!” YandeYa Tumpa jei Edom pegua reta pe: 2. “Pomomichita opaete tëtaguasu reta güi jare peiporara yaeta. 3. Pepɨapochɨ pe peyembotavɨuka. Peiko ɨ̈vavira ipäu rupi, jare peiko ɨvate yae vae pe, jáeramo peyererovia katu yae mbaetɨ kia ipuere pemoamɨri. 4. Ërei yepe tëi peyemboɨvate yae güɨraké rami yepe tëi peñono peraitɨ yasɨtata reta re, joko güi poitɨta.” YandeYa jei: 5. “Imonda vae reta yogüeru yave omaeñomi vaerä pegüi pɨ̈tu yave, ngaraa opaete güɨraja pegüi; yogüeru yave peve ombaepoo vae reta, ngaraa opaetei oyevɨka jese pegüi. Ërei ngatu perovaicho reta opaeteita pemboai pereeya. 6. ¡Esaú, kërai opaetei mbae oñepɨ̈ro ndegüi! ¡Opa oñomi ndegüi opaete ndembaembae jepɨ yae vae! 7. Opaete pe ndive oñemoïru vae pe peyembotavɨuka; perenoe pemombo peɨvɨ güi ae, pevɨa-ïru reta ave oyovaicho pekotɨ jare pevɨa-ïru reta oñono peraperä pe ñuai. ¡Edom pegua reta mbaetɨ güɨnoi arakuaa katu!” 8. YandeYa jei: “Amokañɨteita Edom pegua reta, opaete joko pe iyarakuaa katu vae reta, ɨvɨ Esaú pe ɨvɨtɨ guasu rupi yogüɨreko vae reta. 9. Temán pegua ñeraro regua reta orɨrɨita okɨɨye güi, ɨvɨ Esaú pe ɨvɨtɨ guasu rupi yogüɨreko vae reta, opaeteita omano. 10. Neñeeasɨ katu jare rerekoasɨ katu nderɨvɨ Jacob jeko pegua repɨtata ñemomarai pe, rekañɨteita jekuae avei pegua. 11. Tovaicho opɨ̈ro yave tëta guasu pegua mbaembae jepɨ vae, ketɨgua sundaro reta oike yave öke reta Jerusalén pegua rupi, ¡pe reta peñeñono ïkotɨa! Oyembosuerte yave Jerusalén pe mbae oñepɨ̈rogüe reta re, ¡pe reta peyapo vi jókuae reta jeko rami! 12. Agüɨyeta tëi ko peyerovia peecha yave perëtara reta, jókuae ara mbaesusere rupi yogüɨreko yave, agüɨyeta tëi vi peyerovia, peecha yave Judá pegua reta jókuae ara rupi opa oyemboai, agüɨyeta tëi vi peyóyai yóyai, jókuae ara mbɨatɨtɨ rupi yogüɨreko yave. 13. Agüɨyeta tëi ko peike tëta guasu pe, chembae vae reta yogüɨrekoa pe, jókuae ara rupi oiporara yogüɨreko yave, agüɨyeta tëi ko peyerovia, jókuae ara rupi yogüɨrekoasɨ katu yave, jókuae ara mbaetɨ mbae güɨreko reta yave, agüɨyeta tëi ko peñomi chugüi reta mbaembae jepɨ vae, jókuae ara tembiporara rupi yogüɨreko yave. 14. Agüɨyeta tëi ko peyemboɨ tape oyoasaa ñavo rupi, peyuka vaerä otekuaraigüe reta, agüɨyeta tëi ko peipɨɨ pemee otekuaraigüe reta mbɨatɨtɨ ara pe. 15. Ïru reta pe peyapo rami oyeapota vi pe ndive: ¡Jókuae peyapo vae jekoviata peve! Köi ma oï yandeYa iporojäa iara opaete tëtaguasu reta peguarä. 16. Pe peiporara cheɨvɨtɨ oñeñono tee vae re, jökoraita vi oiporara opaete tëtaguasu pegua; oiporara retata opaetei okañɨtei regua. 17. Ërei ɨvɨtɨ Sión pe oimeñota jembɨregüe oasayepe vae, yogüɨreko teeta Tumpa peguarä. Jacob iñemuña reta opɨ̈ro yeta iɨvɨ; 18. Jacob iñemuña reta yogüɨrekota tata rami, José iñemuña reta yogüɨrekota tataendɨ rami. Ërei Esaú iñemuña reta yogüɨrekota mbae javiyugüe rami, jókuae tata omoendɨta opaetei omboai regua. ¡Mbaetɨta metei ave Esaú iñemuña reta oasayepe vae! Echa che peYa ko, jökorai jae.” 19. Israel iñemuña reta Neguev pe yogüɨreko vae opɨ̈rota ɨvɨ Esaú jare Sefela pegua reta opɨ̈rota filisteo reta iɨvɨ; opɨ̈ro retata vi ɨvɨ Efraín jare ɨvɨ Samaria; Benjamín iñemuña reta opɨ̈rota ɨvɨ Galaad. 20. Jare Israel iñemuña reta tembipɨɨrä yogüɨreko vae opɨ̈rota cananeo reta iɨvɨ, Sarepta kotɨ ojo oväe regua jare Jerusalén pegua tembipɨɨ reta Sefarad pe yogüɨreko vae reta opɨ̈rota tëta guasu reta Neguev pegua. 21. Oporomoamɨri retata oyeupi ɨvɨtɨ Sión kotɨ, oporojäa reta vaerä ɨvɨ Esaú pegua reta kotɨ; jare yandeYa oporookuaita joko pe.
143:7-12 7. CheYa Tumpa, emboyevɨ cheve jarembae cheyerure, echa amanota ma, agüɨye esɨrɨ chegüi, agüɨye taiko omanogüe reta tɨvɨa pe ojo rami. 8. Ndeimbove yave eikuaauka cheve ndeporoparareko, echa ndereño ayeko. Eikuaauka cheve kërai aiko vaerä, echa ndeveño ayerure. 9. CheYa Tumpa chereepɨ cherovaicho reta güi, echa nde ko jae cheñepɨ̈roa. 10. Chemboe tayapo nderemimbota, echa nde ko jae cheTumpa, ¡ndeespíritu tachereraja sɨmbi rupi kavi! 11. Cheya Tumpa, nderee ae re emee tekove cheve, nde ko jupi vae, ¡cherenoe mbɨatɨtɨ güi! 12. Ndeporoparareko rupi, ¡emokañɨtei cherovaicho reta! ¡Emokañɨtei opaete cherovaicho reta, echa che nderembiokuai ko!
30:5-5 5. Opaete Tumpa iñee, ikɨambae ko, jae ko yeopiaka, opaete jese güɨ rovia vae reta peguarä.
Apocalipsis 7:1-17 1. Kuae jaɨkue rupi aecha irundɨ araɨgua reta oyemboɨ ñogüɨnoi ɨvɨ jembeɨ mbeɨ pe. Metei oï kuaraɨ oëa kotɨ, ïru oï kuaraɨ oikea kotɨ, ïru oï ɨvɨtuguasu kotɨ jare ïru oï arayevɨ kotɨ. Jare jae reta oyopia irundɨ ɨvɨtu ɨvɨ rupi oyepeyu vae, agüɨye vaerä oipeyu ɨvɨ, ɨguasu reta jare ɨvɨra reta. 2. Jare aecha ïru araɨgua ou kuaraɨ oëa kotɨ güi, jare jókuae güeru Tumpa oikove vae oporomokañɨmaa pɨpe vae. Jare iñeeäta reve jei jókuae irundɨ araɨgua reta oñemee mbaepuere güɨrokomegua vaerä ɨvɨ jare ɨguasu vae pe, 3. jei reve: “¡Agüɨye perokomegua ɨvɨ jare ɨguasu jare ɨvɨra reta, ndei ñaneTumpa jembiokuai reta jesɨva romokañɨmaa mbove!” 4. Jare aendu mbovɨ ko Tumpa jembiokuai reta araɨgua reta omokañɨmaa vae, jae ko: Ciento cuarenta y cuatro mil opaete Israel pegua ñemuña reta güi. 5. Judá iñemuña reta güi doce mil, Rubén iñemuña reta güi doce mil, Gad iñemuña reta güi doce mil, 6. Aser iñemuña reta güi doce mil, Neftalí iñemuña reta güi doce mil, Manasés iñemuña reta güi doce mil, 7. Simeón iñemuña reta güi doce mil, Leví iñemuña reta güi doce mil, Isacar iñemuña reta güi doce mil, 8. Zabulón iñemuña reta güi doce mil, José iñemuña reta güi doce mil, Benjamín iñemuña reta güi doce mil. 9. Kuae jaɨkue rupi amae jare aecha jeta yeyé vae opaete tëtaguasu reta güi, ñemuña reta, ñee ambuae mbuae, tëta reta yaipapa rapeä vae oyemboɨ ñogüɨnoi jókuae mburuvicha iguapɨa jare Vecha kuimbae taɨrusu vae jóvai. Jae reta jemimonde tïi jare ipo pe güɨnoi karandaɨ jogüe. 10. Jare iñeeäta reve jei reta: “¡ÑaneTumpa mburuvicha iguapɨa pe oguapɨ jare Vecha kuimbae taɨrusu vae güi ou yemboasa!” 11. Jare opaete araɨgua reta oyemboɨ ñogüɨnoi jókuae mburuvicha iguapɨa, tenondegua okuakuaa vae reta jare jókuae irundɨ oikove vae reta iyɨ́vɨri rupi; jae reta oyetavatɨka itindɨasɨ reve mburuvicha iguapɨa jóvai jare omboete reta Tumpa, 12. jei reta reve: “¡Amén! Mbaemboete jare yemboetea, arakuaa jare yasoropai, yemboete, mbaepuere jare mɨ̈rata, toiko ñaneTumpa pe jekuaekuae avei rupi. ¡Amén!” 13. Jayave metei jókuae tenondegua okuakuaa vae oparandu cheve: “Kuae jemimonde tïi vae reta ¿kia reta pa jare ketɨ güi pa yogüeru?” 14. Jare che jae chupe: “Cheru, nde ko reikuaa.” Jayave jae jei cheve: “Kuae reta ko jae yogüeru tembiporara guasu güi vae. Oputuka jemimonde jare omotïi Vecha kuimbae taɨrusu vae jugüɨ pe vae. 15. ‘Jáeramo ñogüɨnoi Tumpa iguapɨa jóvai, jare oyeokuai reta Tumpa pe ara rupi jare pɨ̈tu rupi tupao pe. Mburuvicha iguapɨa pe oguapɨ vae oyangareko aveita jese reta. 16. Ngaraa ye ma iyɨmbɨaɨ ani iɨuve reta, ani jasɨ chupe reta kuaraɨ, ani araku chupe reta; 17. echa Vecha kuimbae taɨrusu vae jókuae guapɨa mbɨte pe oï vae oyangarekota jese reta jare güɨrajata omboɨu ɨ tekove pegua pe, jare Tumpa oyoeta jesaɨ chugüi reta.’ ”
Guarani Bible 2001
Biblia DC Guaraní Bolivia Bolivian Bible Society, 2001