Ngilawi 5:1-19 1. “Muntû akëeja gwîtwa îgambeene arita ûkûûjî bwa mantû jarîa aigîîtue kana oona, nawe akarega kûrita ûkûûjî bûu, muntû ûu agaakanûkua. 2. Muntû akëeja kûringithia gîntû kîrî na mûgiro; kîeethîrwa nî kiimba kîa nyomoo, muntû ûu, akaagîa mûgiro na eethîrwe arî na maatia kinya këethîra aringithîtie atîkûmenya. 3. Muntû akëeja kûringithia gîntû kîonthe gîtîtheri kiumîte mwîrî jwa muntû atîkûmenya, rîrîa akamenya akeethîrwa arî na maatia. 4. Ningî muntû akëeja gûciîtia na kanyua kaawe kûthithia ûntû bûbûthûûku kana bûbwega atîambîte kûthûgaania bwega, o mûciîtio junthe jûrîa muntû oomba gûciîtia atîthûgaanîtie bwega, akëethîrwa atiijî nî ûthûûku, rîrîa akaamenya, akeethîrwa arî na maatia. 5. Muntû akëethîrwa arî na mûgiro kuumania na bûmwe bwa mantû jau, no mwanka aumbûre meeyia jarîa athithîtie. 6. Nawe akaaritîra MWATHANI kîgongwana gîa kûthiria maatia jaawe. Agaikia ng'ondu nka kana mbûri nka nîûntû bwa kîgongwana kîa kûthiria meeyia. Nawe mûthînjîri-Mûrungu akaarita kîgongwana nîkenda muntû ûu arekerwa meeyia. 7. “Îndî muntû akëethîrwa atîûmba kwona ng'ondu kana mbûri, no aritîre MWATHANI kîgongwana kîa kûthiria maatia jaawe gîa nkûngûthikû ijîîrî kana biana biîrî bia ijîa, kîmwe kîrî kîgongwana kîa kûthiria meeyia na kîngî kîrî kîgongwana kîa gwakîîria. 8. Nawe akaabiikia kîrî mûthînjîri-Mûrungu, nawe mûthînjîri-Mûrungu aambe arite nyoni îmwe îrî kîgongwana kîa kûthiria meeyia. Nawe akamîthiora nkingo îndî atîgiitanûra kîongo buru. 9. Ningî akaminya tharike îmwe îînamanie na rûteere rwa kîritîro kîa igongwana. Nayo tharike îîu îngî amîîtûûre gîtina gîa kîritîro kîa igongwana. Kîu nî kîgongwana gîa kûthiria meeyia. 10. Ningî agaacoka arite nyoni îîu îngî îrî kîgongwana gîa gwakîîria kûringana na ûrîa ûûni MWATHANI mbugîîte. Nawe mûthînjîri-Mûrungu akathiria meeyia ja muntû ûu, na arekerwe meeyia. 11. “Îndî muntû akëethîrwa atî na nkûngûthikû ijîîrî kana biana biîrî bia ijîa no arite kilo îmwe ya mûtu jûmwinyu buru jûrî kîgongwana gîa kûthiria meeyia. Îndî atîbuîrîte gwîkîra maguta kana ubaani mûtuune jûu nîûntû nî kîgongwana gîa kûthiria meeyia. 12. Nawe akaajwîkia kîrî mûthînjîri-Mûrungu, nawe mûthînjîri-Mûrungu ajûrûme nkuundi îmwe îrî ngerekano amîakîîrie kîritîroone kia igongwana îgûrû rîa igongwana bia gwakîîria bia MWATHANI. Kîu nî kîgongwana kîa kûthiria meeyia. 13. Nawe mûthînjîri-Mûrungu akamûrombera kweberua kwa meeyia jarîa athithîtie kîrî Mûrungu, jarîa akeethîrwa athithîtie kîrî jau jagweti, nawe akaarekerwa. Naju mûtu jûrîa jûgatigara jûkaa jwa mûthînjîri-Mûrungu o ta kîrî kîgongwana kîa irio.” 14. MWATHANI nî aarîîrie Musa aramwîra atîrî, 15. “Muntû akëeja kwîyia atîkûmenya nîûntû bwa kwîthîrwa atînenkanîrîte into birîa biathûrîri MWATHANI, akaaritîra MWATHANI kîgongwana gîa kûthiria maatia gîa ntûrûme îtî na antû aathûûku noo amwe nîûntû bwa gûtera kûrîa aterete. Nayo yaambe yoonwe këethîra nî îng'ani ya ntero îîu kûringana na ûgûri bwa Shekeli cia fetha bwa ntûrûme ta îîu bwa kîrombero. Kîu nî kîgongwana gîa ntero. 16. Ningî no mwanka arîee gîntû kîu atîranenkanîrîte kîa birîa biathûrîri Mûrungu, na oongeere gîchunchî kîa bitaano gîaakîo, anenkere mûthînjîri-Mûrungu. Nawe mûthînjîri-Mûrungu akaamûritîra kîgongwana gîa kûthiria maatia gîa ntûrûme îîu, nawe muntû ûu akaarekerwa. 17. “Muntû kinya ûrîkû akëeja kwîyia, akathithia ûntû no bûmwe bwa jarîa MWATHANI akaananîtie kinya eethîrwa atîkûmenya nî eeîîtie arî na îgi, na mûrigo jwa meeyia jwaawe nî îgûrû rîaawe. 18. Akaaretera mûthînjîri-Mûrungu ntûrûme îtî na antû aathûûku noo amwe îtaari kuuma ndîîthieene ya ng'ondu. Nayo îîthîrwe îringeene ûgûri na ntûrûme ya kîgongwana gîa ntero. Nawe mûthînjîri-Mûrungu akaamûritîra kîgongwana kîa kûthiria maatia jarîa athithîtie atîkûmenya, nawe muntû ûu akaarekerwa. 19. Kîu nî kîgongwana gîa kûthiria maatia nîûntû nî aterete mbere ya MWATHANI.”
Ngilawi 6:1-23 1. MWATHANI nî aarîîrie Musa aramwaa mawaatho jaja: 2. “Muntû akëeja kwaîria muntû ûngî, akarega kûmûcokeria into birîa anenkeri agwatagîîra nîûntû bwa îraandû, kana agatuunya muntû ûngî into, kana akainyîîria muntû ûngî, muntû ûu akeethîrwa eeîîtie kîrî ni. 3. Ningî muntû akëeja gûciîtia atî atoona gîntû kîûrîte na akîoneete, muntû ûu akeethîrwa eeîîtie kîrî ni. 4. Muntû akëeja kûthithia meeyia ta jau akeethîrwa arî na maatia. Abuîrîte gûcokia into birîa atuunyanîte, kana birîa ajûkîtie nîûntû bwa kwinyîîria bangî kana into birîa ajûkîtie agwatîîra nîûntû bwa îraandû, kana birîa oojeete biûrîte, 5. kana birîa aaciîtîtie îndî arega kûûjûria mûciîtio. Ntukû ya kûthirîrua maatia, no mwanka muntû ûu acokie into bionthe kîrî mwene bio, birîa ajûkîîtie na waayia. Ningî oongeere into biu gîchunchî kîmwe kîrî bitaano mbere ya acokeria mwene. 6. Muntû ûu akaarita ntûrûme kana mbûri îtî na antû athûûku noo amwe amiikie kîrî mûthînjîri-Mûrungu îrî îrîi rîa maatia jaawe kîrî MWATHANI. Ntûrûme îîu îîthîrwe îrî ya ûgûri bwa îrîa îritagwa nîûntû bwa kîgongwana gîa kûthiria maatia. 7. Nawe mûthînjîri-Mûrungu akaarita kîgongwana gîa kûthiria meeyia nîûntû bwa muntû ûu. Naani nkaarekera muntû ûu, meeyia jonthe jarîa athithîtie.” 8. MWATHANI nî aarîîrie Musa aramwîra atîrî, 9. “Îîra Aaroni na ataana baawe ûrîa babuîrîte kûthithagia rîrîa bakûrita igongwana bia gwakîîria. Kîgongwana gîa gwakîîria kîbuîrîte kûraaraga gîgîakagîîrua ûtukû bunthe mwanka rûkîîrî au kîritîroone kîa igongwana. 10. Nawe mûthînjîri-Mûrungu eekîrîte rwambambio na churubaarî îtumi na ndigi cia bamba, arite mûju kîritîroone kîa igongwana, ajûûmbie rûteere rwaakîo. 11. Acoke arite nguû irîa agwîkîrîte, eekîre ingî. Rîu ajûkie mûju jûu, ajuumagarie oome ya kambî, ajwîtûûre antû arîa kûthereetue a gwîtûûraga mûju ta jûu. 12. Mwanki jûrîa jwîthagîrwa jûrî kîritîroone kîa igongwana bia gwakîîria jûtîbuîrîte kûrekeerua jwoora. Mûthînjîri-Mûrungu abuîrîte kûjwîkagîra nkû o rûkîîrî o rûkîîrî. Ningî mûthînjîri-Mûrungu aîîthagîrie maguta ja kîgongwana gîa gûcwaa thîîrî mwankiine jûu. 13. Mwanki jûtîbuîri kûrekeerua jwoora kîritîroone kîa igongwana; jûbuîrîte gûkaraga jûgîakanaga magiita jonthe.” 14. Ningî MWATHANI nî eetîre na mbere kwaria arauga atîrî, “Thithagieni ûjû rîrîa antû bakûrita igongwana bia irio. Mûthînjîri-Mûrungu wa rûrîîjo rwa Aaroni nîwe ûkaandeetagîra kîgongwana kîa irio, au kîritîroone kîa igongwana. 15. Mûthînjîri-Mûrungu agakumbata mûtu jûmwinyu jwa kîgongwana kîu kîa irio, na ajûkie maguta, na ubaani îrîa îrî îgûrû rîa kîgongwana kîu. Akîîrie au kîritîroone kîa igongwana gîchunchî kîmwe kîrî gîchunchî gîa kûririkanagwa. Nakîo gîkethagîrwa kîrî kîgongwana kîrî na yeera rîrîega kîrî ni. 16. Gîchunchî kîu kîngî gîa kîgongwana kîu kîa irio, gîkaarîîwa nî athînjîri-Mûrungu. Nakîo gîkaarîîwa gîtî na mûtheega jwa kwimbithia barî antû arîa atheru îemeene rîa gûtirimanîra. 17. Kîgongwana kîu gîtîbuîrîte gûkaandwa na mûtheega jwa kwimbithia. Biu mbanenkerete kuumania na birîa bitigaraga ndaritîrwa igongwana bia gwakîîria. Nabîo nî kîgongwana gîkîtheru mono, o ta kîgongwana kîrîa nditagîrwa gîa kûthiria meeyia kana gîa kûthiria maatia. 18. Gûtî muntû ûngî ûbuîrîte kûrûma kîgongwana kîu kîa irio nditîri, tiga arûme ba rûrîîjo rwa Aaroni akî. Muntû ûngî kinya ûrîkû ûrîa ûkaaringithia kîgongwana kîu kîa irio akoonua ndaaû nî ûtheru bwaakîo.” 19. Ningî MWATHANI nî aaere Musa mawaatho aramwîra atîrî, 20. “Ntukû îrîa mûthînjîri-Mûrungu akathuuragwa na kwathûrwa, nîrîo akaaritaga kilo îmwe ya mûtu jûmwinyu buru jûrî kîgongwana kîa irio kîrî MWATHANI. Aritage mûtu jwa nusu kîlo îîu rûkîîrî na nusu îngî ûgoro. 21. Mûtu jûu, jûkaunganua na maguta jûkaandwe na jûrugwe. Jûcoke jûng'enyûrangwe na jûritwe jûrî kîgongwana kîa irio. Narîo îeera rîaaju rîkaangwîria ni MWATHANI. 22. Mûthînjîri-Mûrungu ûrîa wonthe wa rûrîîjo rwa Aaroni ûrîa ûthuuri nîkenda amûrîa ûkua, nîwe ûkaritaga kîgongwana kîu. Ndaaritîrwa kîo, ûûni MWATHANI, kîîthagîîrue buru. Waatho bûu, bûthingatagwe magiita jonthe. 23. Kîgongwana kîa irio kîonthe kîrîa mûthînjîri-Mûrungu akaritaga kîbuîrîte kwîthagîîrua buru. Gîtîbuîrîte kûrîîwa.”
Ngieosio 24:1-6 1. Nthîgûrû nî ya MWATHANI, na bionthe birîa birî ku; nthîgûrû yonthe nî ya MWATHANI na bonthe barîa batûûraga ku. 2. Nîkwîthîrwa nîwe waamîînjîîre ndûûjîîne ndeene; areeka mûsingi jwaayo îrieene ndeene. 3. Nûû ûûmba gwitia kîrîmeene kîa MWATHANI? Nûû ûûmba gûkûrûka kîûrûûne kîaawe? 4. Nî muntû ûrîa ûrî mathithio jameega ûrîa ûrî nkoro întheru; ûrîa ûtîthaathagia mîrungu ya mîng'uanano, ûrîa ûtîciîtagia mîciîtio ya ûrongo. 5. Ûu nîwe ûkoona kîtharimo kîa MWATHANI; Mûrungu ûrîa ûmwonokagia amûtue ûmwagîru. 6. Ûu nîu antû barîa bacwaga MWATHANI bakari; barîa bacwaga kwîthîrwa barî amwe na Mûrungu wa Jakubu.
Ngakamatak 9:7-9 7. Ûkëeja gûkaania mûthûmbania ûntû gaakûruma, na ûkëeja gûtetia muntû ûmûthûûku no rworo agwîkîra. 8. Ûkéeja gûkaania mwikumia ûntû këethîra ûtîkwenda akûthûûra. Îndî ûgäkaania muntû ûmûûme ûntû, agakwenda. 9. Ûkäritana muntû ûmûûme ka eetaga na mbere kûûmîa, na ûkäritana muntû ûmwagîru, ka ûûme bwaawe bwongeerekaga.
Matayo 28:1-20 1. Ntukû ya sabatû îkûthira, kûrî akuî gûkea ntukû ya mbere ya kiumia, Maria Magidalina na Maria ûrîa ûngî nî beetîre kaburiine. 2. O ntûti nthîgûrû îrainaina mono nîkwîthîrwa mûraîka wa Mwathani nî aarî akwinama kuuma îgûrû na aingiritia iiga rîrîa rîaingîte kaburi na ararîkarîra. 3. Aatharaga ta rweni, na nguû ciaawe ciaarî injerû ta îra. 4. Barîa baakarîtie kaburi nî bainainîre mono nî ûguaa, mwanka barakara teeka baakuîte. 5. Îndî mûraîka ûu areera eekûrû bau atîrî, “Bûgákîra! Nîkwîthîrwa nî mbijî nî Jesû ûrîa ûraambîrwe bûgûcwaa. 6. Atî aja, nîûntû nî ariûkîre o ta ûrîa aaugîîte. Njûûni bwoone antû arîa areeki. 7. Tontû bûû, îteeni na mpwîî bûkeere aritwa baawe atî nî ariûkîte kuuma gîkuûûne, na nandî nî etîte Galili arî mbere yeenu. Kûu nîku bûkamwona. Bûkórîrua nî nteto iu ndabwîra.” 8. Rîu eekûrû bau barauma kaburiine na mpwîî barî na ûguaa îndî bagwîrîtue mono, na baroogîa kwîra aritwa baawe. 9. Jesû arabaumîîra o rîmwe na arabeera, “Gîeeni na thîîrî!” Eekûrû bau bareeta na baraturia maru mbere yaawe baramûgwata magûrû na baramûthaathayia. 10. Rîu Jesû arabeera, “Bûgakîreeni! Îteeni bûkeere aritwa baakwa beete Galili na kûu nîku bakambona.” 11. Rîrîa eekûrû bau baaciîtîrîte, asikarî bamwe barîa baakarîtie nî beetîre ntûûreene kwîra athînjîri-Mûrungu barîa anene mantû jarîa jaarî jagûkarîka. 12. Athînjîri-Mûrungu barîa anene baraireba amwe na akûrû barîa atongeeria bareetîkanîîria ûrîa bakathithia. Barakukuma asikarî barîa na mbeecha inyingî na barabeera, 13. “Îreeni antû ûjû: ‘Aritwa baawe nî bareejîre ûtukû, na baiya mwîrî jwaawe tûmami.’ 14. Mûrûngamîîri wa nthîgûrû îîjî akëeja kwigua mantû jau, tuî tûkaaria nawe na bûtîtonya nthîîneene.” 15. Tontû bûû asikarî bau barajûkia mbeecha na barathithia o ta ûrîa beerîtûe. Mantû jau no jaaragua nî Ayahudi mwanka naarua tûrî. 16. Aritwa barîa îkûmi na ûmwe nî beetîre kîrîmeene kîrîa Jesû aabathîîrîte kûu Galili. 17. Rîrîa baamwonere baramûthaathayia kinya këethîra bamwe baao nî baarî na nkaanja. 18. Jesû areeta akuî nabo na arabeera, “Nî mpeei waathani bunthe îgûrû na nthî. 19. Rîu, îteeni bweethie antû ba mîgongo yonthe aritwa baakwa, bûkîbabatithagia riîtweene rîa Baaba, na rîa Mûtaana na rîa Roho Ûmûtheru, 20. na bûbaritanage kwathîkagîra mantû jonthe jarîa mbwaathîte. Naani nkeethîrwa ndî amwe naabuî ntukû cionthe mwanka mûthiro jwa nthîgûrû.”
Songe Bible 2018
KIMERU BIBLE WITH DC Bible Society of Kenya, 2009, 2018