Bible in one year

1. Îthandûkû rîa MWATHANI rîakarîre nthîgûrû ya Afilisti mîeri mûgwanja.
2. Afilisti bareeta athînjîri-mîrungu na aringia, barabooria, “Tûkathithia atîa na Îthandûkû rîa MWATHANI? Twîreni tûkarîcokia narîa rîkaraga na mbi?”
3. Barabacokeria, “Këethîra bûgacokia Îthandûkû rîa kîrîkanîro kîa Mûrungu wa Israeli, bûtîrîcokia ûtheri, bûkarîcokia na kîewa gîa kûthiria maatia jeenu. Rîu bûkoorua mîrimo yeenu na bûkomba kûmenya gîtûmi kîa abûkanûkia.”
4. Nabo barooria, “Nî kîewa kîrîkû gîa kûthiria maatia tûkamwikîria?” Nabo baracokia, “Nî tûmîng'uanano tûtano tûkarî ta maûûtî twa thaabu, na tûmîng'uanano tûkari ta ngaara twa thaabu. O ta ûrîa athani ba Afilisti bang'ana, tontû mûrimo jûrîa jûrabûthangîkîtie nî jûrarî kinya kîrî athani bau.
5. Tontû bûû, bûkathithia mîng'uanano ya maûûtî na ya ngaara irîa ciînyangagia nthî yeenu, na bûkumie Mûrungu wa Israeli, kwombîka agatiga kûbûkanûkia amwe na mîrungu yeenu na nthî yeenu.
6. Nîmbi îgûtûma bûûmia nkoro cieenu ta ûrîa Amisri na Farao boomîrie nkoro ciaao? Rîrîa Mûrungu abakanûkîrie mono teeka batiganîre na Aisraeli bareeta?
7. Nandî rî, tumeeni kagaarî gakeerû na bûjûkie ng'ombe ijîîrî îrîa itathekeerwa gîchooki; bûcitheekere kagaarîîne kau îndî bûcokie tûjaû twaacio nja.
8. Rîu bûjûkie Îthandûkû rîa kîrîkanîro kîa MWATHANI bûrîkîre kagaarîîne. Ningî bwîkîre mîng'uanano îrîa ya thaabu îthandûkûûne na bûrîîke rûteere rwa Îthandûkû rîa kîrîkanîro. Mîng'uanano îîu îkeethîrwa îrî kîewa gîa kûthiria maatia bweenu. Rîu bûrekeerie kagaarî kau gaciîtîre.
9. Bûraithîrie bwoone ûrîa kageeta. Gakëeja kûthingata njîra ya gwîta ntûûreene ya Bethishemeshi îrîa îrî nthîgûrû îrîa rîaumîre, rîu tûkamenya atî nî Mûrungu wa Israeli ûtûthithîrîtie mantû jaja jamathûûku. Îndî gakëeja kûrega kûthingata njîra îîu, tûkamenya atî tîwe ûtûkanûkîtie îndî nî mantû jatwîjîîrîte o ûu.”
10. Barathithia o ûrîa beerîrwe, barajûkia ng'ombe ijîîrî îrîa ciaakamagwa baraithekeera kagaarîîne na baraingîra tûjaû twaacio nja.
11. Bareekîra Îthandûkû rîa MWATHANI kagaarîîne na kinya îthandûkû rîrîa rîaarî na mîng'uanano ya maûûtî na ngaara cia thaabu.
12. Ng'ombe ireeta cierekerete Bethishemeshi ithingatîte njîra o îîu ikîanagia ciîtîte. Nacio itagarûka bwa ûrîo kana bwa ûmotho, na athani ba Afilisti bareeta baithingatîte nyuma mwanka mwankeene jwa Bethishemeshi.
13. Antû ba Bethishemeshi nî baakethaga nkano ciaao kîgwanthîîne. Rîrîa baciûkîrie meetho baroona Îthandûkû rîa kîrîkanîro, nî baagwîrîrue mono.
14. Kagaarî kareeta muundeene jwa Joshua wa Bethishemeshi kararûngama o. Iiga rîrînene nî rîarî o. Antû bau baraatûranga mbaaû cia kagaarî kau na barooraga ng'ombe iu na bararita irî kîgongwana kîa gwakîîria kîrî MWATHANI.
15. Alawi barakinyithia nthî Îthandûkû rîa MWATHANI na ithandûkû rîu rîngî rîaarî na mîng'uanano ya thaabu. Barajeeka îgûrû rîa iiga rîu rînene. Rîu antû ba Bethishemeshi bararita biewa bia gwakîîria na igongwana bingî kîrî MWATHANI ntukû îîu.
16. Rîrîa athani bo-batano ba Afilisti boonere ûu, baracoka Ekironi o ntukû îîu.
17. Afilisti nî baatûmîre mîng'uanano îtaano ya maûûtî îthithîtue na thaabu îrî kîewa kîa kûthiria maatia jaao kîrî MWATHANI: mûng'uanano jûmwe nîûntû bwa Ashidodi, na jûngî nîûntû bwa Gaza, jûngî nîûntû bwa Ashikeloni, jûngî nîûntû bwa Gathi na jûngî nîûntû bwa Ekironi;
18. Ningî nî baatûmîre ngaara cia thaabu kûringana na ntûûra cionthe cia Afilisti cia athani bau batano; ntûûra irîa ciairigîri na irîa itairigîri. Iiga rîu rînene rîrîa rîaarî muundeene jwa Joshua wa Bethishemeshi, rîrîa rîarîkîîri Îthandûkû rîa kîrîkanîro kîa MWATHANI, nîrîo mûkûûjî mwanka naarua îîjî.
19. MWATHANI arooraga antû mîrongo mûgwanja ba Bethishemeshi, tontû nî baraithîrîîrie Îthandûkû rîa kîrîkanîro kîa MWATHANI ndeene. Antû nabo baraithikîîra nîûntû MWATHANI nî ooragîte antû mono.
20. Rîu antû ba Bethishemeshi barooria, “Nûû ûûmba kûrûngama mbere ya MWATHANI, Mûrungu Ûmûtheru? Nî kîrî ûû ageeta aume kîrî tuî?”
21. Tontû bûu baratûmana kîrî atûûri ba Kiriathi-jearimu bakîbeeraga, “Afilisti bagûcokia Îthandûkû rîa kîrîkanîro kîa MWATHANI. Înameni bûrîîjîre bûriikie kweenu.”
1. Rîu antû ba Kiriathi-jearimu bareeja barajûkia Îthandûkû rîa MWATHANI, barariikia nyomba ya muntû ûmwe weetagwa Abinadabu ûrîa watûûraga karîmeene. Baretûrîra Eleazari mûtaana waawe maguta nîkenda akamenyagîîra Îthandûkû rîa MWATHANI.
2. Kuuma ntukû îrîa Îthandûkû rîa MWATHANI rîakinyîre Kiriathi-jearimu, nî rîakarîre kûu kagiita gakaraja, mîaka mîrongo îîrî. Îgiita rîu rîonthe Aisraeli bonthe nî barîragîra MWATHANI nîkenda abateethia.
3. Samueli areera antû ba Israeli atîrî, “Bûkëethîra nîka bûcokete kîrî MWATHANI na nkoro cieenu cionthe, riteni mîrungu mîgeni na ya mûng'uanano jwa Ashitarothi kuuma gatîgatî keenu, na bûcokeere kîrî MWATHANI na bûmûthaathagie we wenka, nawe akabwoonokia kuuma kîrî Afilisti.”
4. Tontû bûbû Aisraeli bararita mîrungu ya Baali na Ashitarothi gatagatîîne kaao, na baraathîkîra MWATHANI wenka.
5. Rîu Samueli, arabeera, “Ûthûranieni antû ba Israeli bonthe Mizipa, naani nkaromba MWATHANI nîûntû bweenu.”
6. Rîu baroothûrana Mizipa, na barataa rûûjî bararwîtûûra rûrî kîgongwana kîrî MWATHANI. Ningî baraciata biakûrîa mûthenya jûu junthe na barauga atîrî, “Nî twîîrîîtie MWATHANI.” Samueli araa mûgambi wa antû ba Israeli au Mizipa.
7. Rîrîa Afilisti baigîrue atî antû ba Israeli nî baatirimanîte Mizipa, athani ba Afilisti nî beetîre kûrwaa na Israeli. Nabo Aisraeli bakwigua ûu barakîra Afilisti na
8. bareera Samueli atîrî, “Ûgátiga gûkaîra MWATHANI Mûrungu weetû nîûntû bweetû, nîkenda atwonokia kuuma kîrî Afilisti.”
9. Rîu Samueli arajûkia gatûrûme gagwonka arakaritîra MWATHANI konthe karî kîgongwana gîa gwakîîria. Samueli arakaîra MWATHANI nîûntû bwa Israeli, na MWATHANI aramûcokeria maromba jaawe.
10. Rîrîa Samueli aaritaga kîgongwana kîa gwakîîria, Afilisti nî baakuîrîîrie Aisraeli nîkenda barwaa nabo. Îndî MWATHANI aragondokera Afilisti na kajû gakanene ta ka ngorogoro na arabangaratania. Aisraeli baraboomba ndweene.
11. Aisraeli barauma Mizipa barengana na Afilisti bakîboragaga mwanka ntûûra ya Bethikari.
12. Rîu Samueli arajûkia iiga ararîrûngîka gatîgatî ka Mizipa na Sheni na ararîîta Ebenezeri akiugaga “MWATHANI nîwe ûtûtethetie mwanka nandî.”
13. Tontû bûû, Afilisti nî boombîrwe ndweene na bataaithûkîra nthîgûrû ya Israeli kaîrî. MWATHANI nî eetîre na mbere gûkanûkia Afilisti matukû jonthe jarîa Samueli aarî mwoyo.
14. Ntûûra irîa Afilisti baarî bagûtaa kuuma Ekironi mwanka Gathi iracokerua Aisraeli. Aisraeli baratunyûkia nthîgûrû yaao kuuma kîrî Afilisti na kûragîa thîîrî gatîgatî kaao na Aamori.
15. Samueli aratongeeria Aisraeli matukû jonthe ja ûtûûro bwaawe.
16. Nî aathiûrûkanagia na ntûûra cia Betheli na Giligali na Mizipa mwaka o mwaka akîgambagîra Israeli.
17. Nî aacokaga Rama nîûntû nja yaawe nîku yaarî, na kinya kûu nî aagambagîra Aisraeli. Ningî nî aakîîre MWATHANI kîritîro kîa igongwana kûu.
1. Igua îromba rîaakwa itû Mûrungu, ûmbigue ndagûkaîra.
2. Nthikîîra ûncokerie îromba rîaakwa; nî nthangîkîte mono.
3. Nî ngûkîra nîûntû bwa gîtuma kîrîa anthû baakwa bakûringa, na nîûntû bwa kwinyîîrua nî barîa baaî. Bancwagîra thîîna nîûntû bwa ûrîa banthwîre.
4. Nî nkûringwa nî nkoro, ngîkîraga gûkua
5. Ngwati nî ûguaa, ga nkwinaina nthiri inya buru nîûntû bwa kîmako.
6. Ndiuga atîrî, “Këethîra ndî na mathagu ta kîjea, nî ka mbuurûûka ngeeta naarîa mbonekia kînogoko.
7. Îî mbuurûûka ngeeta kûraaja buru, ngeeta gûtûûra rwanda.
8. Nî ka mbîta gûcwaa giitumo ngaiciitha kîbuubani na ngai înene.”
14. Muntû ûmûûme acwaga kwongeera ûûme, îndî kîaa ikîng'anagîrwa nî kwaria nteto cia waa.
20. “Rîrîa bûkoona ntûûra ya Jerusalemu îcîgîîrîîtue nî njûûrî cia asikarî, bûmenye îgiita rîa kûmomorwa kwa ntûûra îîu rîrî akuî gûkinya.
21. Îgiita rîu barîa bakeethîrwa barî Judea nî bamatûke irîmeene, na barîa bakeethîrwa barî ntûûreene nî baumagare oome ya ntûûra. Ningî barîa bakeethîrwa barî miuundeene, bagákûrûka ntûûreene.
22. Nîkwîthîrwa iu ikeethîrwa irî ntukû cia îkanûkia nîkenda jarîa jaandîki jakoojûra.
23. “Wûûi kîrî barîa bakeethîrwa barî na îu kana barî na tûkenke tûgwonka! Nîkwîthîrwa mîthangîko îkoojûra nthîgûrû na mûthûûro jwa Mûrungu jûkinyîre antû baba bonthe.
24. Bamwe bakooragwa na nchiû na bangî bagatawa baikue ithamîrioone nthîgûrû ingî. Antû batî Ayahudi bakainyîîria antû ba Jerusalemu mwanka rîrîa îgiita rîa kwaathana rîa antû bau rîkaathira.”
25. “Mantû ja kûmakania jakooneka jakiuma riûeene na mweriine na kinya kuuma kîrî njota. Antû ba kuuma mîgongo yonthe bakaaga wîrîgîîro na baigue ûguaa nîûntû bwa kûruruma kwa mîgombe ya îria.
26. Antû bakagirîka nî ûguaa bagîkîraga mantû jarîa bakwona jeejîîrîte nthîgûrû. Nîkwîthîrwa mainya ja îgûrû jakainainua kuuma kûrîa jakaraga.
27. Nyuma ya jau nîrîo bûkoona Mûtaana wa Muntû eejîte arî îtuune arî na inya na mwago jûmûnene.
28. Rîrîa bûkoona mantû jau jaambîrîria gûkarîka, gîeni na ûchamba nîûntû gûkûûrwa kweenu kûrî akuî.”
29. Rîu Jesû arabeera ngerekano îîjî: “Tegeeni mûkûû, na bûtege mîtî ingî yonthe.
30. Rîrîa bwonaga îkîtheûka, nî bûmenyaga îgiita rîa ngai rîrî akuî.
31. O ûu kinya buî, rîrîa bûkoona mantû jau jonthe jagîkarîka, bûmenye atî Ûnene bwa Mûrungu bûrî akuî.”
32. Ndîbwîra na mma atî nthukî îîjî îtîthira, mantû jaja jonthe jatîrakarîka.
33. Îgûrû na nthî bikathira, îndî nteto ciaakwa itîthira.
34. Ningî Jesû arabeera, “Kareeni bwithuranîrîte na bwimenyere bûtîkeeje kwîthîrwa ngûgî yeenu nî kûrîa na kûnyua na kûmakîra mantû ja ûtûûro bûbû. Bwathithia ûu Ntukû îîu îkabûkirimania bûtithûranîrîte.
35. Nîkwîthîrwa Ntukû îîu îgaakinya rîrîa antû bonthe barîa batwîre nthîgûrû batîkûmenya.
36. Îmenyereeni magiita jonthe bûtîkûthithia mantû jamaaî, bûkîrombaga Mûrungu abwee inya ya kûûmîîria mantû jaja jonthe jagîkarîka. Ningî bûrombe nîkenda bûûmba gwîtîkîrîka nî Mûtaana wa Muntû.”
37. Jesû aakaraga akîritanaga kîûrûûne mûthenya na gwatuka ageeta kûraara kîrîmeene kîa Mîzeituni.
38. O rûûkîrî kainda antû bonthe nî beetaga kîûrûûne kûthikîîria akîritana.
Songe Bible 2018
KIMERU BIBLE WITH DC Bible Society of Kenya, 2009, 2018