Biblia en un año

1. Ayapo morogüɨrökuavee cheyeupe, agüɨye vaerä amae kuñatai re.
2. Echa, ¿mbae pa Tumpa Imbaepuere yae ete vae omeeta cheve ɨvate güi?
3. ¿Jeko pɨ̈chɨi vae retaä yera osusereta, ani iyoa vae reta?
4. Jae oikuaa opaete chereko, jare opaete ayapogüe.
5. Cheapu ra aiko vae, jare cherangai ra aja ambotavɨ kia.
6. Tumpa tachejäa imbaejäaka jupi vae pe, jare jökorai toikuaa cherekombae vae.
7. Apia ra tape isɨmbi vae güi, chemoamɨri ra mbaepotarai, oime ra mbae ambuae oñeväe chepo pe.
8. Ïru vae reta tou, che añotɨgüe jare topa toapomondoro cheremitɨ.
9. Kuña pe añemoamɨriuka yave, ani aipïaro aiko cherapicha jembireko yave,
10. cherembireko toiko ïru vae jembiokuairä, jare ketɨgua toyapakua toke jae ndive.
11. Echa ayapogüe ngaraa jërakua kavi, jupi ko oporojäa vae reta oiporarauka vaerä kuae re.
12. Echa tata oporomboai rami vae ko, omboaita Abadón ave, omboaita opaete mbae anoi vae.
13. Aröɨro ra cherembiokuai kuimbae ani kuña reta jupi jei vae, oyoaka reta yave che ndive.
14. ¿Mbae ra ayapota Tumpa chejäa yave? ¿Mbae ra jaeta oparandu cheve yave?
15. Chesɨ jɨe pe cheapo vae, ¿jae viä pa oyapo jae reta? ¿Metei vaeñoä yera oreapo vae?
16. Paravete vae reta amborɨ mbae oata chupe yave, mbaetɨ amaeño imemano vae reta oiporara yɨmbɨaɨ.
17. Mbaetɨ che aeño akaru, amee vi okaru tɨ̈reɨ reta.
18. Chetaɨrusu güive tɨ̈reɨ reta pe aiko tu rami, jare imemano vae reta re ayangareko.
19. Aecha yave amogüe pe oata temimonde, ani paravete vae pe oata asoya,
20. chevecharaagüe pe oyemonde reta, jare oyerovia opɨta che ndive.
21. Mbaetɨ amomburu tɨ̈reɨ, aecha tëi mburuvicha oporojäa vae reta ipuere chemborɨ.
22. Kuae reta mbaetɨ añete yave, cheyɨva reta toa chegüi, toyeekɨ cheatiɨ güi.
23. Che akɨɨye Tumpa iporonupa güi; ngaraa chepuere aropɨa jae oñonogüe.
24. Mbaetɨi oro re añono chepɨa, jare jae cheyeupe: “Kuae re taiko.”
25. Mbaetɨi jae cheyeupe: “Tayemboikokatu yae, ani tanoi jeta korepoti.”
26. Aecha kuaraɨ jembipe, jare yasɨ omoembipegüe.
27. Ërei mbaetɨ amboete vɨari aiko, ani chepo aupi ikotɨ amboete vaerä.
28. Kuaekuae reta jupi ko oñejäauka vaerä, ¡echa aröɨrota tëi ko viña Tumpa ara pe oï vae!
29. Mbaetɨi ayóyai cherovaicho osusere oï yave, ani ayerovia ikavimbae pe oï yave.
30. Mbaetɨi ayepopeyu jese, ani aipota omano vaerä.
31. Oike yave kia oiko che ndive vae, oipota oyuvanga ketɨgua re,
32. che mbaetɨ amaeño opɨta ikatu pe pɨ̈tu yave, jekuaeño aipea cheröke oguata vae reta pe.
33. Mbaetɨ añomi ayavɨgüe kia reta güi, ïru reta rami, mbaetɨ ayemongeta añomi areko vaerä.
34. Echa akɨɨye jeta vae reta güi, jare chemongɨɨye chero pegua reta chereröɨro vae chekïrii, jare mbaetɨ aë chero güi.
35. ¡Oime mona kia oyeapɨsaka cheré! Aikuatiata opaete jaegüe: Añave Imbaepuere yae ete vae timiari cheré, jare cherovaicho reta toikuatía tupapire cheregua.
36. Añete che ko avoɨta opaete kuae reta, jare tañono cheyé äka-regua rami.
37. Che aï kavita Tumpa ndive opaete ayapogüe re, metei mburuvicha re rami ayemboyata ikotɨ.
38. Cheɨvɨ mbaetɨ oñeapo cheré, temitɨ reta ñogüɨnoi pɨpe vae mbaetɨ vi ipɨatɨtɨ.
39. Ërei oime ra kia güi añomi jemitɨ iagüe, ani apɨ̈ro iya reta güi.
40. ¡Cheɨvɨ pe toñemuña yuu trigo jekovia pe, jare ñana cebada jekovia pe! Kuae pe Job opa imiari iyegua.
1. Kuae mboapɨ kuimbae reta opa ikuérai omboyevɨ ñee Job pe, jae oyembojupi ramo iyeugüi aeño.
2. Jayave Eliú, Baraquel taɨ buzita Ram iñemuña pegua, iyarasɨ Job kotɨ; iyarasɨ echa jae mbaetɨ oyemboeko Tumpa jóvai.
3. Jaeramiño vi iyarasɨ mboapɨ Job ivɨa-ïru reta kotɨ, echa mbaetɨ oväe reta ñee omboyevɨ vaerä Job pe, yepe tëi jae reta ojäa Job.
4. Eliú taɨrusu ramo, oäro ïru reta opa vaerä imiari Job ndive;
5. ërei Eliú oecha yave jókuae mboapɨ vae reta mbaetɨ ipuere omboyevɨ ñee Job pe; jae iyarasɨ
6. jare omboɨpɨ omoë iñee, jei: Che chetaɨrusu jare pe reta pekuakuaa ma, jáeramo akɨɨye jare aipoɨu amombeu cheyemongeta.
7. Che jae cheyeupe: “Timiari oikuaa ma kuae teko vae reta; jare ɨma ma yogüɨreko vae reta tomboyekuaa iyarakuaa.”
8. Añete, opaete kuimbae oime güɨnoi arakuaa, echa Imbaepuere yae ete vae oikuaauka chupe.
9. Mbaetɨ kia ɨma oiko güiño yarakuaa, ani indechi güiño oikuaa jupi vae.
10. Jáeramo che jae peve: “Peyeapɨsaka cheré, tamombeu vi peve arakuaa anoi vae.”
11. Che ayeapɨsaka kavi yae peré, aendu peyemongeta reta, jare aecha peeka ñee jaekavi vae pemboyevɨ vaerä.
12. Jare aecha pegüi reta metei ave mbaetɨ pemboyevɨ kavi Job pe pemiari yave.
13. Agüɨye vaerä peyererovia katu arakuaa pe, Tumpa ko omboyevɨta chupe mbaetɨ ko kuimbae.
14. Ërei Job mbaetɨ vi mbae jei cheve, jare che mbaetɨ vi amboyevɨta ñee chupe, pe reta rami.
15. Job, kuae mboapɨ reta oyembojopa ñogüɨnoi, jare oata chupe reta ñee omboyevɨ vaerä ndeve;
16. ërei agüɨye ere che chekïriita jae reta kïrii ramo, echa iñeembae opɨta reta.
17. Jáeramo che vi tamoë cheñee, che vi tae cheyemongeta.
18. Jeta yae ñee reta anoi, mbaetɨ ma chepuere chekïrii.
19. Vino, jɨru pe ipɨ̈tuembae oï rami aï, jɨru mɨmbapire pegua osorota ma oï rami.
20. Chemiarita chepɨakatu vaerä, amboyevɨta ndeve neñee.
21. Mbaetɨta kia aepɨ, oyovake chemiarita peve.
22. Echa mbaetɨ aikatu aporombotuicha, ¡echa jökorai yave, aramoete yandeapoa oiporaraukata cheve!
1. ¡Petairari yandeYa pe tairari ipɨau vae, echa oyapo jeta mɨakañɨ reta! ¡Oporomoamɨri imbaepuere tuichagüe jare ikɨambae rupi!
2. YandeYa oechauka iporogüɨroasayepe, imbaejupi oechauka opaete tëtaguasu reta jesa róvai;
3. imaendúa iporoparareko re jare iñee re Israel iñemuña reta kotɨ vae re. ¡Opaete ɨvɨ pegua reta oecha iporogüɨroasayepe!
17. Agüɨye ndepɨa pe emotareɨ iyoa vae reta; eipoɨu avei yandeYa güiño;
18. jökorai yave reiko kavita mbaembae reä ro vae ngaraai oyemboai ndegüi.
1. Cherɨvɨ reta, aja pépɨri amombeu vaerä peve añete vae Tumpa regua yave. Mbaetɨ chemiari peve ñee tuichagüe rupi ani arakuaa rupi.
2. Echa pepɨte pe aï ramboeve, añeñono mbaetɨ oikuaa vaerä ïru mbae re jaeño amombeu vaerä peve Jesucristo kërai omano kurusu re vae regua.
3. Jare pepɨte pe aï yave, ayembopɨtu jare arɨrɨi akɨɨye güi;
4. jare chemiari peve ani añemoñee peve yave, mbaetɨ aiporu ñee reta arakuaa pegua, jaeño Espíritu imbaepuere rupi vae,
5. peporogüɨrovia agüɨye vaerä oï kuimbae reta iyarakuaa re, jaeño Tumpa imbaepuere re.
6. Ërei ore roiporu ñee arakuaa pegua ipɨ̈rata ma iporogüɨrovia pe vae reta ipɨte pe. Ërei mbaetɨ roiporu arakuaa ɨvɨ pegua ani ɨvɨ pegua mburuvicha reta iyarakuaa. Echa kuae mburuvicha reta opata ko.
7. Ërei oremiari ko Tumpa iyarakuaa yaikuaa rapembae vae, arakuaa oñemi vae; kuae ko Tumpa ombosɨrɨ ndei ɨvɨ oyeapo mbove, yayemboeteuka vaerä.
8. Ërei mbaetɨ metei ave ɨvɨ pegua mburuvicha reta oikuaa kuae arakuaa. Echa oikuaa reta yave mona, ngaraa tëi ko oyuka kurusu re yandeYa imboetea yae vae.
9. Ërei oyekuatía oï: “Mbaetɨ kia oecha jare mbaetɨ kia oendu vae, mbaetɨ vi kia oyemongeta jese vae, jókuae mbaembae omokätɨro ma Tumpa oaɨu vae reta pe vae.”
10. Ërei Tumpa oikuaauka yandeve Espíritu Santo rupi. Echa Espíritu Santo oikuaa opaete mbae. Oikuaa vi opaete Tumpa regua yavai yae yaikuaa vaerä vae.
11. Kia mbaetɨ ipuere oikuaa ïru vae ipɨa pe. Jae eteiño oikuaa. Jökoraiño vi mbaetɨ kia ave oikuaa Tumpa ipɨa. Jaeño Tumpa iEspíritu.
12. Jare yande mbaetɨ yamboresive espíritu kuae ɨvɨ pegua. Jaeño Espíritu Santo Tumpa güi ou vae, yaikuaa vaerä mbaembae Tumpa omee yandeve vae.
13. Kuae re oremiari, mbaetɨ roiporu kuimbae reta iyarakuaa re royemboe vae rupi. Jaeño Espíritu Santo oremboe jese vae rupi: roikuaauka ïru vae reta pe mbaembae Espíritu regua Espíritu Santo ipɨa pe oiko vae reta pe.
14. Ërei oporogüɨroviambae mbaetɨ oikuaa mbaembae Tumpa iEspíritu regua, echa mbokere ko chupeguarä. Ipuereä oikuaa. Echa jaeño Espíritu Santo rupi ipuere oikuaa.
15. Echa Espíritu Santo oiko ipɨa pe vae ipuere oikuaa kavi opaete kuae mbaembae. Ërei mbaetɨ kia ipuere oyangao vae.
16. Echa “¿kia pa oikuaa yandeYa iyemongeta? ¿Kia pa ipuereta omboe?” Ërei yande ñanoi Cristo iyemongeta.
Guarani Bible 2001
Biblia DC Guaraní Bolivia Bolivian Bible Society, 2001