Biblia en un año

1. YandeYa jei: “¡Paravete, cheraɨ oyembosɨrɨ chegüi vae reta, oyemongeta reta mbae oyapo vaerä, oparandumbae reve cheve, oyupavo reta mbae oyapo vaerä, mbaetɨ reve che añono ipɨa pe, jökorai jeiete omoïru reta mbaeyoa iyeupe!
2. Iyandeko reve yogüɨraja reta Egipto kotɨ, jare mbaetɨ oparandu reta cheve; oeka reta yemborɨ Faraón güi, oyerovia reta Egipto re.
3. Ërei Faraón iporomborɨ, omomaraiuka retata, jare Egipto re oñepɨ̈ro reta tëi vae, omomichiuka retata.
4. Yepe tëi pemondota peruvicha reta imiari vaerä peregua tëta guasu Zoán pe jare tëta guasu Hanes pe,
5. jeseve pemarata jókuae tëta guasu mbaetɨ pemborɨ vae jeko pegua, mbaetɨ ikavi peve, mbaetɨ ombou peve yemborɨ, jaeño ñemomarai jare susere peväe peyeupe.”
6. Ɨvɨ Neguev pegua mbaeporou reta maratuta vae regua: Ɨvɨ jeta mbaesusere pɨpe vae rupi, jeta pɨpe yaguapope reta, mboi jare mboi oveve vae, jokoropi güɨraja reta imbaembae ikavigüe jare jepɨ vae mburika re jare camello re, güɨraja reta omboepɨ yemborɨ Egipto pe, tëta mbaetɨta ipuere omborɨ vae pe,
7. echa Egipto iporomborɨ mbaetɨ osirive. Jáeramo ko körai ambojee: “Mbaeporou iñeeäta tëi vae, ërei mbaetɨ mbae oyapo vae.”
8. Jayave eikuatía añave, kuae mbaembae oasata vae metei ɨvɨra oyemboipegüe re, eikuatía eñono metei tembikuatía pe, kuri peguarä, oporomomaendúa avei vaerä, jekuae avei rupi.
9. Echa kuae tëta pegua reta ko ipɨapochɨ vae jare yapu yae vae, mbaetɨ oipota reta oendu yandeYa iporookuai vae.
10. Maratuta vae imombeúa reta pe jei: “Agüɨye peecha mbae maratuta vae”, ñeemombeúa reta pe jei: “Agüɨye pemombeu oreve jupi rupi; pere oreve mbae ipöra vae, mbae nunga oremboyerovia vaeño.
11. Peeya jupi vae, peyembosɨrɨ jókuae güi, agüɨye peyapo jókuae, agüɨye peñono oreróvai Iyoambae Israel pegua.”
12. Jáeramo, Iyoambae Israel pegua jei: “Pe reta peröɨro kuae ñee, jare peyeko teko kavimbae reño, ikavimbae reño perovia katu;
13. jáeramo, kuae mbaeyoa oï ko peve, metei ovapetea ɨvate vae oyekagüe jeieteño oyeka rami, jare güɨramoiño opata osururu vae rami;
14. opata ko oyeka metei ɨvɨñae opa oyeka rami, opaeteita jaɨ jaɨ, mbaetɨta jaɨgüe ave ikavi tätapɨi oyeupi vaerä ani ɨ oyeyara ɨkua güi vaerä yepe.”
15. YandeYa Tumpa, Iyoambae Israel pegua jei: “Pepɨagüiveño, agüɨye peyembokepegua, jare peasayepeta ko, echa jayave ko oime mɨ̈rata.” Ërei pe reta mbaetɨ peipota,
16. jaeño pere: “Ani, rotekuaraita ko kavayu re.” Petekuaraita ko jökorai, añete. Pere vi: “Ropota kavayu reta iñäkua vae re.” Ërei peraɨkuemoña vae reta iñäkua yaeta vi ko.
17. Metei tovaicho güi, petekuaraita mil pe reta, pandepo vae güi, opaeteita petekuarai, ɨvɨra jaeño oï ɨvɨtɨ guasu re rami, ani metei bandera oï ɨvɨtɨ re rami.
18. Ërei yandeYa oärota, güɨnoi vaerä mboroparareko peré, oïndaivi oï oechauka vaerä mboroparareko peve, echa yandeYa jae ko Tumpa jupi vae. ¡Oyekou, opaete jese oyeko vae reta!
19. Sión pegua reta, Jerusalén ipo reta: Ngaraa ye ma peyaeo. Mboroparareko güɨnoi vae, pepararekota, oendu yave pesapúkai ikotɨ vae.
20. Yepe tëi yandeYa omeeta peve mbaeporara ani mbɨatɨtɨ reta; pemboe vae reta ngaraa ye ma oñemi pegüi; peecha eteita.
21. Pepia pota tëi tape güi yave, peenduta pekupe kotɨ ñee jei peve: “Kuae ko jae tape, peguata kuae rupi. Agüɨye pepia ketɨ ave yepe.”
22. Jayave, reröɨrota remae mbae iä korepoti pe jare oro pe oñeova vae reta re. Opata kuae mbaembae reta renoe remombo mbae ikavimbae rami, ɨtɨ rami remaeta jese reta.
23. Jayave yandeYa omongɨta peremitɨ reta re iara pe kavi, oime pemaetɨ yave, jare ɨvɨ omoñemuñata jeta mbaembae. Jókuae ara rupi perɨmba reta jembíu katuta.
24. Pegüeye reta jare pemburika reta pemombaravɨkɨ vae reta ave oimeta jeta jembíu kavi.
25. Ou oväe jókuae yeyuka guasu iara yave, jare oa tëta guasu jëguambae reta yave, oimeta jeta ɨ ɨvɨtɨ guasu reta rupi.
26. YandeYa oipoanota pepere. Jayave yasɨ omoembipeta kuaraɨ rami, jare kuaraɨ omoembipeasɨ yaeta chiu kuaraɨ jembipe rami.
27. Mase, yandeYa ou matɨ güi; iyarasɨ jendɨ tata yavaete yae vae rami, jembe re oyekuaa iyarasɨ vae, jare ikü tata yavaete yae vae rami,
28. ipɨ̈túe ko, ou oväe ɨ yave oyepɨyere rami, ɨ yandeayu rupi yanderé rami, outa opa omboai tëtaguasu reta mbae nunga jiero pegua pe, oñonota kayurupegua opaete vae reta iyuru pe, ombojopa vaerä.
29. Ërei peveguarä oimeta tairari, arete Pascua pe rami; pepɨa oyeroviata, kia nunga vae oyerovia reve mimbɨ iñee ndive ojo yandeYa iɨvɨtɨ kotɨ rami, Imbaepuere yae vae Israel pegua kotɨ.
30. YandeYa oendukata iñeeäta jare oechaukata imbaepuere arasɨ pegua, tata yavaete yae vae rami vae, kusumirou rupi, ama ɨvɨtuai reve vae rupi jare amandau rupi.
31. Asiria oiporaraukase yae yepi vae, oiporarata vi yandeYa iñee rupi,
32. jare yandeYa oitɨ ichikote jese ñavo, oyemboputa angúa raɨ jare arpa. YandeYa etei oñerarota jae reta ndive yavaetegüe.
33. Echa kuae ɨma ma oyeapo katu oiko Asiria peguarä jare juvicha guasu peguarä, oiporarata pɨpe vae ipɨguasu jare kɨ̈pe, tata oyemoendɨ jeta yepea ndive vae. YandeYa omoendɨta ipɨ̈túe pe, jókuae ko azufre jeta oyepɨyere vae rami.
1. ¡Paravete, opa yogüɨraja Egipto kotɨ oeka yemborɨ vae reta, kavayu reta re oyerovia vae reta, oyeko reta käretou jeta ko vae re, jare kavayu regua reta, echa jëia yae reta, jare mbaetɨ omae reta Iyoambae Israel pegua re, mbaetɨ oeka reta yandeYa!
2. Ërei jae iyarakuaa vae ko jare oikatu güeru vaerä susere, jae jei yave mbae, mbaetɨ oipoepɨ. Oñemopüata jeko ikavimbae vae reta kotɨ, iyoa vae reta omborɨ vae reta kotɨ.
3. Egiptoɨgua reta kuimbaeño ko, Tumpaä ko; ikavayu reta, kavayu tumpaä ko. Jayave yandeYa omopüa ipo oinupa reta vaerä yave, opata ko ñamɨri oporomborɨ vae jare oyemborɨuka vae vi, opaete voita omano reta.
4. YandeYa jei cheve körai: “Yaguapope ani yaguapope raɨ oñee jembia iárambo vae mbaetɨ okɨɨye, yepe tëi vecha iyangarekoa reta oyomboatɨ oiämondo vaerä isapúkai pe, ngaraa oñeiämondouka chupe reta, jökoraita ko yandeYa Imbaepuere yae ete vae ou oepɨ tëta imbae vae ɨvɨtɨ Sión re.
5. Güɨra oveve jaitɨ iárambo rupi oyangareko vaerä, jökoraita yandeYa Imbaepuere yae ete vae oyangareko Jerusalén re, oñovatuta, güɨroasayepeta, oepɨta, oyorata.”
6. Israel iñemuña reta, peyerova ye jókuae peyembopɨapochɨ yae ikotɨ vae kotɨ.
7. Echa, opaete pe reta metei ara pemombo petumpa-raanga reta korepoti pegua ani oro pegua, peyapo peyeupe vae jare peyemboyoa pɨpe vae yave,
8. Asiria ñamɨrita ñeraro pe, ërei kuimbae potaä omoamɨri. Otekuaraita ñeraro güi, jare taɨrusu vae reta ñeraro regua opata oyepɨɨ tembipɨɨrä;
9. jare okɨɨye güi opata oë otekuarai oñemía güi, jare sundaro ruvicha reta opata omombo oeya ibandera. Jökorai jei yandeYa, jae oime güɨnoi Sión pe, Jerusalén pe tata.
1. Mase, oimeta metei mburuvicha guasu sɨmbi rupi kavi oporookuai vae, jare iyɨvɨrigua mburuvicha reta jupi rupi kavi oporookuaita vi.
2. Jókuae mburuvicha guasu oïta ɨvɨtuai güi ñañemi jese vae rami, ani okɨrai vae güi ñañemi pɨpe vae rami, ani ɨvɨ otinía pe oime ɨ̈aka raɨ rupi ɨ vae rami, ani ɨ̈vavira iküaraɨa araku yaea pe oï vae rami.
3. Jayave ikɨ̈reɨ oecha vae reta, ipuereta oecha, jare ikɨ̈reɨ oendu vae reta, ipuereta oendu;
4. jare iyarakuaambae reta, iyarakuaata, jare iñee ngatumbae reta, iñee ngatuta.
5. Ngaraa ye ma omboete reta kuimbae jeko kavimbae vae, jeko kavi vae rami, ngaraa ye ma omboete reta kuimbae jeko pɨ̈chɨi vae, imboetea vae rami.
6. Echa kuimbae jeko kavimbae, imiarita ko ikavimbae re, oyemongeta ipɨa pe, oyapo vaerä ikavimbae, ani jei ikavimbae vae yandeYa kotɨ; yɨmbɨaɨ vae güi opɨ̈ro jembíu, ani iɨuve vae güi opɨ̈ro ɨ.
7. Jeko kavimbae oeka kërai oyapo vaerä ikavimbae, ikaviä oyemongeta ipɨa pe; apu rupi oyapo ikavimbae vae paravete vae kotɨ jare ñeapo rupi oeka tëi oime vaerä jupi rupi ñeñono kavi chupe vae kotɨ.
8. Ërei ngatu ipɨa ikavi vae, ikavi oyemongeta, jare jókuae iyemongeta kavi re oñemomɨ̈rata.
9. Pe, kuña reta, mbaetɨ peyemoambeko mbae re vae, peyeapɨsaka kuae jaeta vae re. Pe, kuña reta, peiko pɨagüive vae reta, peyeapɨsaka ñee jaeta vae re.
10. Peiko pɨagüive añave, ërei metei año jaɨkue rupi pekɨɨyeta, echa peechata uva oyepoogüe opa, jare mbaetɨ yeta mbaarɨvo.
11. Pe, peiko pɨagüive vae reta, perɨrɨi pekɨɨye güi, jare pepɨa kɨɨye, pemboi jókuae peremimonde reta, jare peyemonde temimonde mbɨatɨtɨ pegua pe.
12. Peipete pepɨtía pepɨatɨtɨ güi, pepɨatɨtɨ jókuae kó ikavigüe re, jare uvarupa ikavigüe re.
13. Chembae vae reta iɨvɨ pe oñemuñata ñurati jare ñana, opaete jókuae o reta yerovia katu oimea rupi ave, tëta guasu yerovia katu pegua pe.
14. Mburuvicha jo kïrii ngatuta opɨta; tëta guasu jeta tëi ipo vae ipombae opɨtata; maeka ɨvate vae reta jare ñepɨ̈roka reta oyeeyata jekuae avei pegua; joko pe oñemoëtata mburika ñana rupigua reta, jare mɨmba reta ikaruarä opɨtata.
15. Ërei yandeYa iEspíritu outa yanderé ɨvate güi, jayave ɨvɨ ipombae, ikavi yeta oñemaetɨ pɨpe vaerä, jare ɨvɨ kavi jeiete yaeta ikavi.
16. Sɨmbi vae jare jupi vae oimeta opaete kuae ɨvɨ pe.
17. Jupi vae omboyekuaata, mbɨakatu, mbutuu jare yerovia katu jekuae avei pegua.
18. Jare tëta chembae vae oiko pɨagüiveta, jëguambaea pe oikota, jare oputuuta,
19. yepe tëi amandau opa omboai kaa reta, jare tëta guasu opa oyemboai,
20. ërei pe reta peyekou aveita, oime aveita pemoäkɨ vaerä peremitɨ reta, jare pemburika jare peguaka reta jembíu katu aveita.
7. Tumpa jei jo mbaemboetea güi: “¡Ayerovia reve amboyaota Siquem, ajäata ɨvɨtɨ päu ipe kavi vae Sucot!
8. Chembae ko Galaad jare Manasés; Efraín ko cheäka-ɨru jiero pegua rami, Judá jae ko chepopoka mborookuai pegua rami;
9. Moab, jae ko cheyepoekarɨru rami; Edom re amombota chepɨapaa; ¡aporomoamɨri güi asapukaita filisteo reta re!”
10. ¿Kia pa chererajata tëta guasu oñekëse kavi vae kotɨ? ¿Kia pa chererajata Edom kotɨ?
11. Echa nde, cheRu Tumpa, oremombo, ¡mbaetɨ ma reo oresundaro reta ndive!
12. Oremborɨ orerovaicho reta re, echa kuimbae iporomborɨ mbaeä etei ko.
13. Tumpa iporomborɨ rupi yayapota mbae tuichagüe; ¡jae ko omoamɨrita yanderovaicho reta!
23. Ɨvɨtuguasu kotɨgua ɨvɨtu omaeñoä okɨ; jökorai ko indaye pota vae re, jova arasɨ omae vae.
24. O ipɨmii vae pe yaiko vae ikaviño, o ipɨguasu vae pe kuña iñe rarose vae ndive yaiko vae güi.
16. Jae ye vi peve: Agüɨye kia ave toyemongeta imbokere vae ko che. Ërei jökorai peyemongeta cheré yave, pemaeño tachemiari peve, che vi ayemboete vaerä michi pegua.
17. Kuae jae vae, mbaetɨ ko jae yandeYa jei vae, jaeño ayembotuicha imbokere vae rami.
18. ¡Echa oime jeta oyemboete jae aeño vae, che vi tayembotuicha!
19. Pearakuaa katu tëi reve, peropɨa imbokere vae reta.
20. Echa peropɨa guasu peokuaiasɨ katu vae reta, omaepɨ̈ro pegüi vae reta, pembotavɨ vae reta, pereröɨro vae reta jare perovapete vae reta.
21. Yepe tëi chemara jae vaerä, ¡ore reta mbaetɨ orepuere jökorai roiko! Ërei ïru vae reta oipoɨuä oyemboete yave, che vi ayemboete aipoɨumbae reve yepe tëi mbokere.
22. Jae reta hebreo, che jaeramiño vi. Jae Israel pegua reta, che jae vi ko. Jae reta Abraham iñemuña reta pegua, che jae vi ko.
23. Jae reta Cristo jembiokuai (imbokere vae rami tae), che ayapɨraa reta. Mbaravɨkɨ pe, jeta yae ayapo chugüi reta. Ñenupa pe, jeta yae. Tembipɨɨrɨru pe, jeta yae vi. Jeta yae amano seri.
24. Judío reta pandepo ye chenupa chikote pe; chenupa reta metei oata cuarenta oiporu reta vaerä cheré.
25. Mboapɨ ye chenupa reta ɨvɨra pe. Metei vese cheapi reta ita pe. Mboapɨ ye aiporara barco ɨguasu pe okañɨ vae; metei pɨare jare metei ara oiko ɨguasu pe.
26. Jeta yae aguata opaete kerupi; mbovɨ ye ɨ chereraja seri. Imonda vae reta chepïaro. Cherëtaɨgua reta chepïaro jare vi judiombae vae reta. Amano seri tëta guasu reta pe, ñuu rupi, ɨguasu rupi jare oporogüɨrovia raanga vae reta.
27. Täta aparavɨkɨ aiporara reve. Jeta aiporara topeɨ, yɨmbɨaɨ ɨuve, iroɨ jare nandi.
28. Jare jeta ïru mbaembae, oime chemboyemongeta yae vae ko jae opaete oporogüɨrovia vae reta.
29. Kia imbaerasɨ yave, che vi aiporara. Kia oporombogüɨapiuka vae yave, che vi chearasɨ ikotɨ.
30. Oime yave mbae re ayemboete vaerä, tayemboete jókuae chepɨ̈ratambae re.
31. Tumpa, yandeYa Jesucristo Tu, imboetea avei vae oikuaa mbae jae vae añete ko.
32. Damasco pe aï yave, mburuvicha guasu Aretas jee vae jembiokuai oipota tëi chepɨɨ. Jáeramo oyókuai sundaro reta oäro vaerä opaete tëta guasu jöke reta;
33. ërei chembogüeyɨ reta metei kanata pe tëta guasu Damasco ikësea iventana rupi. Jare jökorai aasayepe chugüi reta.
Guarani Bible 2001
Biblia DC Guaraní Bolivia Bolivian Bible Society, 2001